Ankarada «Türkdilli respublikalar müstəqilliklərinin 20-ci ilində» mövzusunda beynəlxalq toplantı keçirilir

Oktyabrın 5-də Ankaradakı "Rixos" otelində Türkiyə Nazirlər Kabineti Xalq Diplomatiyası İdarəsi və Türkiyənin Xarici İşlər Nazirliyi Strateji Araşdırmalar Mərkəzinin təşkilatçılığı ilə "Türkdilli respublikalar müstəqilliklərinin 20-ci ilində" mövzusunda beynəlxalq toplantı öz işinə başlamışdır.

Azərbaycanın ədliyyə naziri Fikrət Məmmədov, Azərbaycan Respublikası Prezidenti yanında Strateji Araşdırmalar Mərkəzinin direktor müavini Gülşən Paşayeva, ölkəmizin Türkiyədəki səfiri Faiq Bağırov toplantının açılış mərasimində iştirak etmişlər.

Türkiyə Prezidenti Abdullah Gül toplantının açılışında çıxış edərək Azərbaycan, Qazaxıstan, Qırğızıstan, Türkmənistan və Özbəkistanı müstəqilliklərinin 20-ci ildönümü münasibətilə təbrik etmiş, qardaş ölkələrin güclənməsi və inkişafından qürur duyduğunu demişdir. Prezident Abdullah Gül 2009-cu il oktyabrın 3-də Naxçıvanda keçirilmiş türkdilli ölkələrin dövlət başçılarının IX zirvə görüşündə qəbul olunmuş tarixi qərarların əhəmiyyətini vurğulamış, türkdilli ölkələrin əməkdaşlığının möhkəmlənməsində Baş Katibliyi İstanbulda yerləşən Türkdilli Ölkələrin Əməkdaşlıq Şurası və Baş Katibliyi Bakıda olan Türkdilli Ölkələrin Parlamentlər Assambleyası, habelə TÜRKSOY-un rolunu qeyd etmişdir.

Türkiyə Prezidenti bildirmişdir ki, türkdilli xalqların daha da sıx birləşməsinə nail olmaq üçün yeni layihələr və proqramlar həyata keçirilməli, deputatlar, alimlər və universitetlər arasında əməkdaşlıq gücləndirilməlidir.

Türkiyənin xarici işlər naziri Əhməd Davudoğlu da türkdilli ölkələrin dövlət müstəqilliklərinin əhəmiyyətindən danışmış, yeni qlobal dünyada öz layiqli yerini tutmaq üçün bu dövlətlərin əməkdaşlığının zəruri olduğunu vurğulamışdır. Türk dünyasının ərazi bütövlüyündən bəhs edən natiq Dağlıq Qarabağın hələ də işğal altında olduğunu xatırladaraq buna tezliklə son qoyulacağını vurğulamışdır.

Sonra Türkiyə Prezidenti Abdullah Gül və toplantı iştirakçıları türkdilli ölkələrin dövlət müstəqilliklərinə həsr olunmuş sərgi ilə tanış olmuşlar.

Açılış mərasimindən sonra "Avrasiyadakı türk topluluqları: yeni sərhədlər və kimliklər", "Türk dövlətləri regional və qlobal siyasətlərin fonunda" bölmələrindəki müzakirələrdə türk dünyasında siyasi, iqtisadi, mədəni və elmi əlaqələrin qiymətləndirilməsi aparılmışdır.

Oktyabrın 6-dək davam edəcək beynəlxalq toplantıda Xoca Əhməd Yasəvi Universitetinin Orta Asiya bölgəsinə dair hesabatları dinləniləcək, Türkiyə Nazirlər Kabineti yanında Atatürk Mədəniyyət Mərkəzinin Avrasiya bölgəsindəki türk topluluqları ilə bağlı layihəsinin təqdimatı keçiriləcəkdir.

Bundan başqa, toplantıda TRT televiziya kanalının hazırladığı sənədli film göstəriləcək, iştirakçılar Türk Tarix Qurumu və Türk Dil Qurumunun türk dünyası haqqında elmi tədqiqatları ilə tanış olacaqlar.

Toplantıda türkdilli ölkələrdən yüzdən çox alim və siyasətçi iştirak edir.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2011.- 6 oktyabr.- S. 6.