Mühəndislik Akademiyasının illik hesabat-seçki yığıncağı

Akademik Arif Paşayev akademiyanın prezidenti seçilmişdir

Azərbaycan Mühəndislik Akademiyasının (AMA) illik hesabat-seçki yığıncağı keçirilmişdir. AMA-dan AzərTAc-a bildirmişlər ki, yığıncağın gündəliyinə Mühəndislik Akademiyasının hesabat məruzəsinin müzakirə olunması, nəzarət-təftiş komissiyasının hesabatı, qurumun rəhbərliyinin, büro üzvlərinin və nəzarət-təftiş komissiyasının yeni tərkibinin seçilməsi daxil edilmişdir.

Hesabat məruzəsində son beş ildə AMA-da elm, texnika və innovasiya fəaliyyətinin təkmilləşdirilməsi istiqamətində işlərin geniş təhlili öz əksini tapmışdır. Həmçinin ali məktəblərlə, təşkilat və müəssisələrlə bağlanmış müqavilələr çərçivəsində əməkdaşlığın səmərəliliyini artırmaq istiqamətində konkret tədbirlərin hazırlanması tövsiyə olunmuşdur. Ümumi yığıncaqda gizli səsvermə ilə akademiyanın yeni rəhbərliyi seçilmişdir. Akademik Arif Mir Cəlal oğlu Paşayev Azərbaycan Mühəndislik Akademiyasının prezidenti seçilmişdir. Havar Məmmədov vitse-prezident, Əhəd Canəhmədov vitse-prezident - baş elmi katib, Natiq Cavadov isə nəzarət-təftiş komissiyasının sədri seçilmişlər.

Azərbaycan.- 2011.- 8 oktyabr.- S. 5.