Türkiyənin IX Prezidenti Süleyman Dəmirəl ümummilli lider Heydər Əliyevin məzarını və Şəhidlər xiyabanını ziyarət etmişdir

Bakıda keçirilən Beynəlxalq Humanitar Forumda iştirak edən, Türkiyənin IX Prezidenti Süleyman Dəmirəl oktyabrın 11-də Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə əklil qoymuş, ruhuna dualar oxumuşdur.

Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üzərinə güllər düzülmüşdür.

Sonra Şəhidlər xiyabanına gələn Süleyman Dəmirəl 1918-ci ildə Azərbaycanda və paytaxt Bakıda qırğınlar və vəhşiliklər törədən silahlı erməni daşnak dəstələri ilə döyüşlərdə həlak olmuş türk əsgərlərinin xatirəsinə ucaldılmış abidə kompleksini ziyarət edərək önünə əklil qoymuşdur.

AzərTAc

Azərbaycan.- 2011.- 12 oktyabr.- S. 2.