Azərbaycan-Türkiyə əlaqələri bütün sahələrdə uğurla inkişaf edir

Oktyabrın 14-də Türkiyə Respublikasının diyanət işləri başqanı Mehmet Görmezin başçılıq etdiyi nümayəndə heyəti ölkəmizə səfəri çərçivəsində Qafqaz Müsəlmanları İdarəsində (QMİ) olmuşdur.

AzərTAc xəbər verir ki, görüşdə QMİ-nin sədri şeyxülislam Allahşükür Paşazadə dost və qardaş ölkələrimiz arasında bütün sahələrdə əməkdaşlığın gündən-günə möhkəmləndiyini, dini-mənəvi əlaqələrin genişləndiyini xüsusi vurğulamış, iki dini qurum arasında əməkdaşlığın perspektivlərindən danışmışdır.

Mehmet Görmez də öz növbəsində ölkələrimiz, o cümlədən iki dini qurum arasında əlaqələrin inkişaf dinamikasından məmnunluğunu diqqətə çatdırmış, Dağlıq Qarabağ münaqişəsinin Azərbaycanın ərazi bütövlüyü çərçivəsində tezliklə öz həllini tapacağına əminliyini bildirmişdir. Qonaq demişdir ki, səfərin məqsədi iki qardaş ölkə arasında dini-mənəvi əlaqələrin möhkəmlənməsi, bu sahədə mövcud potensialdan daha səmərəli istifadə olunmasına şərait yaratmaqdır.

Türkiyəli qonaq dövlət müstəqilliyinin bərpasının 20-ci ildönümü münasibətilə Azərbaycan xalqını təbrik etmişdir.

Daha sonra iki dini qurum arasında birgə bəyannamə imzalanmışdır. Bəyannaməni Allahşükür Paşazadə və Mehmet Görmez imzalamışlar.

Görüşdən sonra keçirilən mətbuat konfransında jurnalistlərin sualları cavablandırılmışdır.

Tədbirdə Milli Məclisin deputatları, QMİ-nin elmi-dini şurasının üzvləri, Bakı Dövlət və Bakı İslam universitetlərinin tələbə və müəllim heyəti iştirak etmişlər.

Azərbaycan.- 2011.-15 oktyabr.- S. 10.