Xüsusi xidmət orqanları üçün peşəkar kadrlar hazırlayan Akademiya

Müstəqilliyinin bərpasının 20-ci ildönümünü qeyd etdiyimiz respublikamızda ötən dövr ərzində həyata keçirilən dövlət quruculuğunun ən möhtəşəm səhifələrindən biri ölkənin və xalqın milli maraqlarının keşiyində sadiq dayanmış xüsusi xidmət orqanlarının formalaşdırılmasıdır.

Bu günlərdə "Azərbaycan" qəzetinin Milli Təhlükəsizlik Nazirliyinin Heydər Əliyev adına Akademiyası ilə birgə keçirdiyi "dəyirmi masa"da respublikamızın milli təhlükəsizliyinin təmin edilməsində əsas dövlət strukturlarından olan MTN-nin keçdiyi inkişaf yollarına və kadr hazırlığı istiqamətində görülən işlərə nəzər salındı.

"Dəyirmi masa" iştirakçıları əvvəlcə ulu öndər Heydər Əliyevin abidəsi önünə əklil qoydular, ölkəmizin peşəkar milli təhlükəsizlik orqanlarının formalaşdırılmasında misilsiz xidmətləri olan bu dahi şəxsiyyətin xatirəsini yad etdilər. Ümummilli lider Heydər Əliyevin həyat və fəaliyyətini əks etdirən "Şöhrət" muzeyi ilə tanış oldular.

"Dəyirmi masa"nı giriş sözü ilə açan "Azərbaycan" qəzetinin baş redaktoru, Milli Məclisin deputatı Bəxtiyar SADIQOV dedi:

- Hörmətli "dəyirmi masa" iştirakçıları!

Hər bir dövlətdə konstitusiya quruluşuna, milli maraqlara və cəmiyyətin sağlam inkişafına təhdid yaradan əməllərin qarşısının alınmasında təhlükəsizlik məsələlərinə cavabdeh olan orqanların üzərinə böyük məsuliyyət düşür. Təbii ki, qanunazidd hərəkətlərin vaxtında aşkar edilməsində və ya önləyici tədbirlərlə qarşısının alınmasında spesifik fəaliyyəti ilə seçilən xüsusi xidmət orqanlarının peşəkarlığından çox şey asılıdır.

1991-ci ilin noyabrında Milli Təhlükəsizlik Nazirliyi təsis edildikdən sonra qarşısında duran vəzifələr yeni dövrün və ictimai-siyasi formasiyanın mahiyyətinə uyğun olaraq fəaliyyət göstərmək, hələ kövrək olan müstəqilliyimizə və ölkəmizin maraqlarına qarşı daxili və xarici təhdidlərin müəyyənləşdirilməsi və bu istiqamətdə mübarizə sahəsində mühüm tədbirlərin görülməsi idi. Lakin 1991-1993-cü illərdə ölkə həyatının digər sferalarında olduğu kimi, bu sahədə də ciddi problemlər, nöqsanlar yaranmışdı. Tez-tez hakimiyyət dəyişikliyinin baş verməsi, ictimai-siyasi sabitliyin olmaması MTN-nin fəaliyyətinə mənfi təsir göstərmişdi. İşgüzar, təcrübəli əməkdaşların tutduqları vəzifələrdən uzaqlaşdırılması, onların yerinə naşı adamların gətirilməsi nəticəsində əməliyyat tədbirlərinin səmərəliliyi aşağı düşmüş, peşəkarlıq azalmışdı. Beləliklə, dövlət maraqlarının müdafiəsində çətinliklər yaranmışdı, təxribatçı qüvvələr ölkədə milli-etnik münasibətləri süni şəkildə qızışdırmağa çalışır, ərazi separatizminə rəvac verirdilər.

1993-cü ilin iyununda xalqın tələbi ilə hakimiyyətə qayıdan ümummilli lider Heydər Əliyev siyasi təcrübəsi, qətiyyəti və cəsarəti ilə dövlətçiliyi məhv olmaq təhlükəsindən xilas etdi. Tezliklə böyük uzaqgörənliklə hüquqi dövlət quruculuğuna başlayan Heydər Əliyevin qarşıya qoyduğu əsas vəzifələrdən biri müstəqil Azərbaycan dövlətinin etibarlı milli təhlükəsizlik sisteminin formalaşdırılması idi.

Heydər Əliyev hələ sovet dövründə təhlükəsizlik orqanlarında şərəfli xidmət yolu keçmişdi. Leytenant rütbəsindən general-mayor rütbəsinədək, əməliyyat müvəkkilindən Azərbaycan DTK-nın sədri vəzifəsinədək yüksəlmişdi. Onun iştirakı ilə həyata keçirilmiş əməliyyatlar təhlükəsizlik orqanlarının əməkdaşları üçün əsl peşəkarlıq nümunələridir. Ona görə təhlükəsizlik orqanlarının fəaliyyətinin yüksək səviyyədə qurulmasını ən incəliklərinə qədər gözəl bilirdi.

Heydər Əliyev DTK-da rəhbər vəzifələrdə çalışdığı zaman xalqımızın milli mənafelərini daim önə çəkmiş, milli-ədəbi irsi, milli təfəkkür və düşüncə sistemini keçmiş rejimin amansız təhdidlərindən qorumaq naminə böyük iradə, qətiyyət nümayiş etdirmişdir. Bu böyük insanın diqqət və qayığsı ilə o dövrdə təhlükəsizlik orqanlarında azərbaycanlıların sayı artmağa başladı. Bu mənada şərəfli və mənalı ömrünün 25 ilini dövlət təhlükəsizlik orqanlarında xidmətə həsr etmiş Heydər Əliyevin bu spesifik sahədəki fəaliyyətini böyük ehtiramla xatırlayırıq. Odur ki, məhz Heydər Əliyevin təcrübəsi sayəsində ölkəmizin etibarlı təhlükəsizlik sisteminin formalaşdırılmasında, MTN-nin fəaliyyətinin müasir dövrün tələbləri səviyyəsində qurulmasında çətinliklər yaranmadı. Bütövlükdə MTN-nin fəaliyyətində ciddi dönüş baş verdi.

Ulu öndər Azərbaycan müstəqillik qazandıqdan sonra da ölkəmizin təhlükəsizlik orqanları üçün milli kadrların hazırlanması məsələsinə xüsusi diqqətlə yanaşmış, bu məqsədlə 1998-ci il dekabrın 1-də Milli Təhlükəsizlik Nazirliyinin Akademiyasının təşkili barədə sərəncam imzalamışdır. Bununla da Azərbaycanda ilk dəfə olaraq xüsusi xidmət orqanları üçün milli kadrların hazırlanması işinin təməli qoyulmuşdur.

Ümummilli lider Heydər Əliyevin milli təhlükəsizlik siyasəti və strategiyası onun layiqli siyasi davamçısı, Azərbaycan Respublikasının Prezidenti İlham Əliyev tərəfindən uğurla davam etdirilir. Dövlət başçısı sürətlə inkişaf edən və hər bir sahədə inanılmaz uğurlara imza atan respublikamızın milli təhlükəsizliyinin qorunmasını daim vacib məsələ kimi önə çəkmişdir. Bu baxımdan Prezident İlham Əliyevin 23 may 2007-ci ildə təsdiq etdiyi Azərbaycan Respublikasının Milli Təhlükəsizlik Konsepsiyası da dövlətimizin müstəqilliyini, ərazi bütövlüyünü, konstitusiya quruluşunu, xalqın və ölkənin milli maraqlarını daxili və xarici təhdidlərdən qorumağa yönəlmiş siyasətin məqsəd, prinsip və yanaşmalarını müəyyən edən mükəmməl sənəddir. Bundan başqa 2004-cü ildə qəbul edilən "Milli təhlükəsizlik haqqında", "Kəşfiyyat və əks-kəşfiyyat fəaliyyəti haqqında" Azərbaycan Respublikasının qanunlarında ölkəmizin milli təhlükəsizliyi ilə bağlı vacib məsələlər təkmil formada tənzimlənir.

Xalqın və dövlətin təhlükəsizliyinin yüksək səviyyədə təmin olunması Azərbaycanda həyata keçirilən mövcud siyasi kursun prioritet istiqamətini təşkil edir. Azərbaycanın təhlükəsizlik orqanları ölkəmizin milli maraqlarının keşiyində hər an ayıq-sayıq dayanıblar. Son vaxtlarda din pərdəsinə bürünərək Azərbaycan dövlətçiliyinə zidd fəaliyyətlə məşğul olan şəxslərin, cinayətkar qrupların üzvlərinin ifşa olunaraq istintaqa cəlb edilməsi və digər bu kimi faktlar bunun aydın göstəricisidir.

Qazanılan uğurlar MTN-in müstəqillik illərində böyük inkişaf yolu keçdiyini göstərir. Əminliklə deyə bilərik ki, Azərbaycanın milli təhlükəsizlik orqanlarının peşəkar fəaliyyətinin qarşısında dövlətimizin və xalqımızın maraqlarına qarşı olan istənilən təhdid acizdir.

İndi isə söz Milli Təhlükəsizlik Nazirliyinin Heydər Əliyev adına Akademiyasının rəisi, general-leytenant Ziya YUSİFZADƏnindir.

Ziya YUSİFZADƏ:

- Bu il Azərbaycan xalqı uzun illər arzuladığımız və nəhayət sovetlər birliyinin süqutu nəticəsində qovuşduğumuz müstəqilliyin 20-ci ildönümünü təntənəli şəkildə qeyd edir.

Azərbaycan Respublikasının parlamenti 18 oktyabr 1991-ci ildə Azərbaycanın müstəqilliyi haqqında Konstitusiya Aktı qəbul edərək, azadlığımızı dünya ölkələrinə bəyan etdi. Lakin xalqımıza nəsib olmuş azadlığın yüksəkliyində dayana bilməyən o zamankı iqtidar tarixin millətimizə bəxş etdiyi bu əvəzsiz milli sərvəti nə lazımınca qiymətləndirə, nə də onun qorunub saxlanması qüdrətində olduğunu nümayiş etdirə bilirdi. 1991-1993-cü illər nəinki Azərbaycanın müstəqillik tarixində itirilmiş illər hesab olunur, həm də bu illərdə Azərbaycan müstəqilliyini itirmək təhlükəsiylə üzləşmişdi.

1993-cü ilin yayında vəziyyət böhran həddinə çatmışdı. Bir tərəfdən erməni işğalçıları torpaqlarımızı zəbt edir, digər tərəfdən daxildə hakimiyyət uğrunda mübarizə zəminində vətəndaş müharibəsi yetişirdi. O günləri xalqımız yaxşı xatırlayır. Çoxlarına elə gəlirdi, vəziyyət çıxılmazdır. AXC-Müsavat iqtidarının səriştəsizliyi nəticəsində ölkənin bütün bölgələrində yaranmış qeyri-qanuni silahlı dəstələr ərazilərdə quldurluq edir, xalqı qorxu içində saxlayırdı. Xalqımız belə bir ümidsiz çağında imdad dolu nəzərlərini Heydər Əliyevə, onun həmin dövrdə yaşayıb fəaliyyət göstərdiyi Naxçıvan torpağına dikmişdi. Xalqın iradəsi və zamanın hökmü ilə dünya şöhrətli siyasətçi Heydər Əliyev müstəqil dövlətimizin uçurum qarşısında qaldığı bir vaxtda yenidən böyük siyasətə qayıtdı. Xalqın inamına və qüdrətinə arxalanan ulu öndərimiz az zaman kəsiyində ölkədə hökm sürən anarxiya və hərcmərcliyə, hakimiyyət boşluğuna son qoydu, xarici və daxili pozucu qüvvələrin terror-təxribat cəhdlərinin qarşısını qətiyyətlə aldı, qeyri-qanuni silahlı dəstələr buraxıldı, dövlət çevrilişi cəhdlərinin qarşısı məharətlə və qətiyyətlə alındı.

Cəbhə bölgəsində atəşkəsə nail olundu. Tərəqqinin əsasını qoymuş "Əsrin müqaviləsi" imzalandı. Azərbaycan dünyada mühüm coğrafi-siyasi və iqtisadi məkana çevrildi, demokratik dövlət quruculuğunun sistemi formalaşdırıldı, qanunun aliliyi, insan haqlarının qorunması kimi demokratik prinsiplər bərqərar edildi. Bu gün inamla demək olar ki, o zaman müdrik dövlət başçımız tərəfindən bu taleyüklü addımlar atılmasaydı, dünya xəritəsində Azərbaycan adlı ölkənin varlığı böyük sual altında olardı.

Bütün varlığı ilə öz xalqına, vətəninə bağlı olan bu dahi şəxsiyyət bir-birinə zidd iki sistemdə fəaliyyət göstərsə də, ən çətin tarixi dövrlərdə, amansız təqiblər şəraitində belə doğma Azərbaycanın çiçəklənməsinə, xalqının iqtisadi, elmi, mədəni potensialının, maddi rifahının yüksəldilməsinə xidmət etmişdir. Təsadüfi deyil ki, uzaqgörən siyasəti, fenomenal şəxsi keyfiyyətləri, ilahi müdrikliyi sayəsində müstəqilliyimizi itirmək təhlükəsindən qurtaran, dövlətçiliyimizin xilaskarı və qurucusu, milli şüurumuzun, milli dərkimizin yaradıcısı ulu öndərimiz Heydər Əliyevin taleyini Azərbaycanın taleyindən ayrılıqda dərk etmək mümkün deyil!

Heydər Əliyev, mübaliğəsiz bəşəriyyətin ən nadir və qüdrətli şəxsiyyətlərindən biridir! Dahi öndərimiz bütün mənalı həyatını xalqına həsr etməklə kifayətlənmədi, xalqının və ölkəmizin gələcək taleyini düşünərək öz siyasi məktəbində yetişdirdiyi möhtərəm İlham Əliyevi xalqımızın xidmətinə verdi.

Artıq səkkiz ildir ki, Azərbaycan xalqı və dövləti möhtərəm Prezidentimiz, xalqımızın sevimli oğlu İlham Əliyevin rəhbərliyi ilə müstəqillik yolu ilə inamla addımlayır. "Mən bütün azərbaycanlıların Prezidenti olacağam" deyən İlham Əliyevin müdrik, son dərəcə səmərəli, qətiyyətli, uzaqgörən daxili və xarici siyasəti nəticəsində ölkəmiz bütün sahələrdə dinamik şəkildə inkişaf edir, əhalinin sosial rifahı ildən-ilə yaxşılaşır. Vətənimizin dünyada siyasi-iqtisadi nüfuzu və çəkisi də ildən-ilə artır. Azərbaycan regionda lider dövlətə çevrilmişdir. Bütün bunlar möhtərəm Prezidentimiz İlham Əliyev tərəfindən böyük uğurla və yaradıcılıqla həyata keçirilən Heydər Əliyev siyasi kursunun qələbəsi və təntənəsidir.

Zəngin həyatının 25 ilini Azərbaycanın təhlükəsizlik orqanlarına həsr etmiş, sıravi əməkdaşdan Təhlükəsizlik Komitəsinin sədri, leytenant rütbəsindən ali general rütbəsinə yüksəlmiş, bu orqanların milli təhlükəsizlik konsepsiyasını və öz məktəbini yaratmış, əfsanəvi əməliyyatçı, müstəqil dövlətçiliyimizin banisi və qurucusu Heydər Əliyev hələ sovetlər dönəmində totalitar rejimin qadağalarına baxmayaraq, qibtə ediləcək cəsarət və uzaqgörənliklə XX əsrin ortalarından başlayaraq Azərbaycan təhlükəsizlik əməkdaşlarının milliləşdirilməsi siyasətini böyük ustalıqla, mərhələ-mərhələ həyata keçirmişdir.

Bu gün milli təhlükəsizlik orqanları əməkdaşlarının 99,9 faizini azərbaycanlılar təşkil edirsə, bu, 20 illiyini təntənəli şəkildə qeyd etdiyimiz müstəqil Azərbaycanı doğma xalqına bəxş etmiş ulu öndərimiz Heydər Əliyevin uzun illər təkbaşına gərgin şəraitdə apardığı milli kadr siyasətinin qələbəsi deməkdir.

Milli təhlükəsizlik orqanlarının fəaliyyətini daim diqqət mərkəzində saxlayan ulu öndərimiz müstəqillik illərində təhlükəsizlik sisteminin hüquqi bazasını yaradaraq, orqanların milli əsaslara söykənən fəaliyyət istiqamətlərini və vəzifələrini müəyyənləşdirmiş və beləliklə, millətə, dövlətə və müstəqil dövlətçiliyimizə sədaqəti təhlükəsizlik orqanlarının əsas qayəsinə və amalına çevrilməsinə nail olmuşdur. Ulu öndərimiz Heydər Əliyev çox gözəl bilirdi ki, Azərbaycanı sarsılmaz dövlətə çevirmək, onun müstəqilliyini əbədiləşdirmək və təhlükəsizliyini etibarlı təmin etmək üçün təxirə salmadan xalqımıza və dövlətçiliyimizə son dərəcə sədaqətli, vətənpərvər, sağlam milli düşüncəyə, yüksək mənəvi-əxlaqi keyfiyyətlərə, geniş əməliyyat təfəkkürünə və dünyagörüşünə malik milli kadr potensialı yetişdirmək taleyüklü məsələdir. Məhz bu əsas amilləri nəzərə alaraq hərbi təhsili siyasi kursunun tərkib hissəsinə çevirmiş ulu öndərimiz 1 dekabr 1998-ci ildə Milli Təhlükəsizlik Nazirliyinin Akademiyasının təsis edilməsi haqda sərəncam imzaladı.

Artıq bu tarixi sərəncamdan 12 il keçir. İlk illərdə tikinti və quruculuq, təşkilati və kadr məsələləri ilə əlaqədar qarşıya çıxan bir sıra çətinliklərə baxmayaraq, Akademiya 2000-2001-ci tədris ilindən fəaliyyətə başladı. 2005-2006-cı illər Akademiya üçün yaddaşlardan silinməyəcək tarixi hadisələrlə zəngin olmuşdur. Belə ki, 2005-ci il dekabr ayının 20-də nazir Eldar Mahmudovun təşəbbüsü ilə MTN-in Akademiyasına möhtərəm Prezidentimiz İlham Əliyevin fərmanı ilə ümummilli liderimiz Heydər Əliyevin adı verilmişdir. 2006-cı il mart ayının 27-də isə Ali Baş Komandan İlham Əliyev Akademiyaya təşrif buyurmuş, ulu öndərimiz Heydər Əliyevin möhtəşəm abidəsini, məzmunu və nəfis tərtibatı ilə seçilən "Şöhrət" muzeyini açmış, sücaət rəmzi olan "Döyüş bayrağı"nı şəxsən Akademiya rəisinə təqdim etmişdir.

Quruculuq və tədris şəraiti ilə yaxından tanış olan Ali Baş Komandan şəxsi heyət qarşısında proqram xarakterli çıxışında Akademiyada qısa müddətdə həyata keçirilmiş geniş quruculuq işlərini yüksək qiymətləndirərək demişdir: "Akademiya ən yüksək dünya standartlarına cavab verir və burada kursantlar yaradılmış bütün imkanlardan səmərəli istifadə etməli, yaxşı oxumalı, bu şərəfli peşəyə dərindən yiyələnməlidirlər. Akademiya Heydər Əliyev adını daşıyır və əlbəttə, bu, əlavə məsuliyyət deməkdir. Mən ümid edirəm ki, bu Akademiyada oxuyan kursantlar gələcəkdə Azərbaycanın dövlət müstəqilliyinin daha da möhkəmləndirilməsində fəal rol oynayacaqlar."

Ali Baş Komandan İlham Əliyevin və milli təhlükəsizlik naziri, general-leytenant Eldar Mahmudovun çıxışlarından irəli gələn vəzifələr və tələblər mütəmadi olaraq xüsusi plan-proqram əsasında həyata keçirilir, kursantların vətənpərvərlik və azərbaycançılıq ruhunda tərbiyə olunmasında öz səmərəli nəticələrini göstərir.

Bu gün Akademiyada 5 fakültə və 16 kafedra, o cümlədən 4 xüsusi təyinatlı kafedra fəaliyyət göstərir. Ötən illər ərzində MTN-in demək olar ki, bütün baş idarələrini və strukturlarını təmsil edən 946 nəfər əməliyyat işçisi 3-cü fakültənin 1 illik ali kurslarını, 561 nəfər isə təhsil müddəti 4 və 5 il olan əməliyyat və sərhəd qoşunları fakültələrini bitirərək Milli Təhlükəsizlik Nazirliyində və Dövlət Sərhəd Xidmətində fəaliyyətə başlamışlar. Bu müddət ərzində 574 nəfər əməkdaş (o cümlədən şəhər və rayon şöbələrinin rəhbər heyəti) 2 və 3 aylıq ixtisasartırma və təkmilləşdirmə kurslarında təhsil almışlar.

Təhsildə yüksək müvəffəqiyyət qazanan, elmi-yaradıcılıq fəaliyyəti ilə məşğul olan və Akademiyanın ictimai həyatında fəal iştirak edən əlaçı kursantlara milli təhlükəsizlik naziri tərəfindən təsis edilmiş Heydər Əliyev adına təqaüd verilir.

Akademiyanı bitirən kursantlara müvafiq diplomlar və MTN-in əmri ilə ilk "leytenant" hərbi rütbəsi verilərək milli təhlükəsizlik orqanlarına təyinat alırlar.

Akademiya tədrisə başlayanda xüsusi, məxfi fənlər üzrə Azərbaycan dilində heç bir dərslik olmadığı halda, hazırda 10 il ərzində professor-müəllim heyətinin gərgin elmi fəaliyyəti nəticəsində xüsusi fənlər üzrə 100-dən çox dərslik, dərs vəsaitləri, monoqrafiyalar, tədris metodiki vəsaitlər, təlimatlar və s. işlənilərək kursant və dinləyicilərin tədrisdə istifadəsi üçün Akademiyanın xüsusi kitabxanasına verilmişdir.

Akademiyada dərslər dünya standartlarına cavab verən tədris korpuslarında aparılır. Tədris prosesini yüksək səviyyədə təşkil etmək üçün ən müasir kompyuterlər, audio-video texnika, proyektorlar, monitorlar və stendlərlə təchiz edilmiş xüsusi təyinatlı siniflər, kabinetlər və laboratoriyalar, bir sıra kompyuter və linqafon zalları, kriminalistik tədris kompleksi, zəngin fonda malik xüsusi, ümumi və bədii kitabxanalar, zəruri avadanlıq və trenajorlar quraşdırılmış geniş idman zalları və meydançaları və s. kursant və dinləyicilərin ixtiyarına verilmişdir.

Akademiyada tədris yüksək ixtisaslı mütəxəssislər, o cümlədən elmlər doktorları və namizədləri, eləcə də uzun illər təhlükəsizlik orqanlarında xidmət etmiş, geniş əməliyyat biliklərinə və dünyagörüşünə malik təcrübəli kadrlar tərəfindən həyata keçirilir. Hazırda Akademiyada 1 akademik, 4 elmlər doktoru, 13 elmlər namizədi, 2 professor və 8 dosent fəaliyyət göstərir. Akademiyanın 5 əməkdaşı doktorluq, 10 əməkdaşı isə namizədlik dissertasiyaları üzərində çalışırlar.

Fəxrlə bildirirəm ki, ulu öndərimiz Heydər Əliyev tərəfindən yaradılan və onun ölməz adını qürurla daşıyan MTN-in Akademiyası möhtərəm Prezidentimiz İlham Əliyevin gündəlik qayğısı və diqqəti sayəsində 20 yaşlı müstəqil ölkəmizin ən mötəbər hərbi təhsil ocaqlarından biridir.

Bəxtiyar SADIQOV:

- Təhlükəsizlik orqanlarında çalışanları fərqləndirən mühüm keyfiyyətlərdən biri dövlətə və xalqa son dərəcə sadiq olmalarıdır. Çünki onların əsas vəzifəsi dövlətin və xalqın milli maraqlarının keşiyində etibarlı dayanmaqdır. Bu mənada Akademiyanın müəllim kollektivinin üzərinə böyük məsuliyyət düşür. Görülən işlərlə bağlı danışmaq üçün söz MTN-in Heydər Əliyev adına Akademiyasının rəisinin müavini, general-mayor İsgəndər ALLAHVERDİYEVə verilir.

İsgəndər ALLAHVERDİYEV:

- Müstəqil Azərbaycan Respublikasının memarı və qurucusu Heydər Əliyev özünə əziz və doğma saydığı təhlükəsizlik orqanlarından diqqət və qayğısını heç bir zaman əsirgəməmiş, Azərbaycan xalqına qarşı yönəlmiş qüvvələrlə mübarizənin ön sıralarında dayanan və onun əsas ağırlığını öz çiyinlərində daşıyan, ölkənin milli təhlükəsizliyini təmin etmək kimi müqəddəs bir missiyanı şərəflə yerinə yetirən bu təşkilatın möhkəmlənməsini Azərbaycan dövlətinin qarşısında dayanan ən mühüm və başlıca vəzifələrdən biri kimi dəyərləndirmişdir.

"Azərbaycanın ən böyük sərvəti onun müstəqilliyidir" deyən ümummilli liderimiz xalqın təkidli tələbi ilə hakimiyyətə ikinci qayıdışından sonra müstəqil Azərbaycan Respublikasının mühüm dövlətçilik təsisatlarından biri olan milli təhlükəsizlik orqanlarının formalaşması və inkişafında mühüm rol oynayan yeni nəsil peşəkar və ixtisaslı kadrların hazırlanmasını həyata keçirə biləcək təhsil ocağının yaradılmasını zəruri saymış və özünün 1 dekabr 1998-ci ildə imzaladığı sərəncamla Milli Təhlükəsizlik Nazirliyinin Akademiyasını təsis etmişdir. Akademiya olduqca gəncdir, lakin gənc olmasına baxmayaraq Azərbaycan Respublikasının ali təhsil müəssisələri arasında öz layiqli yerini tutmuş, ictimaiyyət tərəfindən həmişə yüksək qiymətləndirilmişdir.

Akademiyamızda təhsil alan heyətin dövlətinə və xalqına sədaqətli insanlar, Heydər Əliyev məktəbinin layiqli davamçıları kimi yetişdirilməsi qarşımızda duran ən mühüm vəzifədir. Bu vəzifənin uğurla həyata keçirilməsi tərbiyəvi işin düzgün və səmərəli təşkilindən asılıdır. Təlim-tərbiyə prosesinin ayrılmaz hissəsi olan tərbiyəvi iş fasiləsiz və mütəhərrik fəaliyyət sahəsidir. Hər bir kursanta, dinləyiciyə fərdi yanaşma prinsipləri üzərində qurulan tərbiyəvi iş sxematikliyi sevmir, yaradıcı yanaşma və daim axtarışda olmağı tələb edir.

Tərbiyənin əsas məqsədi xalqa, vətənə və dövlətçilik ənənələrimizə sadiq gənclər yetişdirməkdir. İlk növbədə təhsil ocağımızın ulu öndər Heydər Əliyevin adını daşıması hər bir zabit və kursantın mənəvi məsuliyyətini artırır, tərbiyə işinin təşkilində istiqamətverici rol oynayır. Ümumilikdə isə Akademiyada aparılan təlim-tərbiyə işinin mahiyyəti təhsil alanlara respublikanın təhlükəsizliyinin təmin edilməsi üçün zəruri olan yüksək vətəndaşlıq məsuliyyəti hissini aşılamaq, onları vətənpərvərlik, Azərbaycan Respublikası Konstitusiyasına və qanunlarına, insan hüquqlarına hörmət, öz peşəsinə sədaqət, xidməti borcunun yerinə yetirilməsinə məsuliyyət ruhunda tərbiyə etmək, zəruri mənəvi-psixoloji, əxlaqi və hərbi peşəkarlıq keyfiyyətləri aşılamaqdır.

Təhsil müəssisəsində tərbiyəvi işin effektli təşkili təlim-tədrisin və ümumiyyətlə xidmətin səmərəliliyini artırır, daha yüksək nəticələrin əldə olunmasını təmin edir. Akademiyanın professor-müəllim və zabit heyəti belə bir mühüm sahədə iş apararkən təhsil alanların intellektual və mədəni səviyyələrinin daha da yüksəlməsinə, şəxsiyyət kimi Azərbaycan xalqının çoxəsrlik milli-mənəvi irsi əsasında formalaşmasına, milli və ümumbəşəri dəyərlərə yiyələnməsinə böyük önəm verir.

Əməkdaşlarımız kursantların asudə vaxtının səmərəli təşkil olunması, hərbi xidmətin yeknəsək və darıxdırıcı rejimə çevrilməməsi, Akademiyanın ictimai həyatının dolğun, mənalı və maraqlı olması üçün tərbiyəvi işə əsl yaradıcılıqla yanaşır, bu məqsədlə toplanmış təcrübəni daha da zənginləşdirərək müxtəlif səpkili tədbirlər həyata keçirirlər.

Paytaxtımızın muzeylərinə, Bakının görməli tarixi yerlərinə müntəzəm ekskursiyalar, görkəmli alimlərlə, tanınmış politoloqlarla, mədəniyyət xadimləri və incəsənət ustaları ilə, şair və yazıçılarla vaxtaşarı görüşlər, teatrlarımızın yeni tamaşaları ilə tanışlıq, Akademiyanın bədii özfəaliyyət ansamblının iştirakı ilə təşkil olunan konsert proqramları, ədəbi-bədii gecələr, yaradıcılıq müsabiqələri, şən və hazırcavablar klubu, intellektual rinq və müxtəlif idman yarışları kursantlarda kollektivçilik və yoldaşlıq hisslərinin gücləndirilməsi baxımından da müstəsna əhəmiyyət kəsb edir.

Kursantların siyasi hazırlıq səviyyəsinin yüksəlməsində və ümumi dünyagörüşünün genişlənməsində tərbiyəvi iş saatlarından səmərəli istifadə olunması müsbət nəticələr verir. Bu dərslərdə kursantlara Azərbaycanın görkəmli tarixi şəxsiyyətləri, məşhur hərbi xadimləri, xalqımızın şərəfli keçmişi, zaman-zaman ona üz vermiş faciələrin mahiyyəti, erməni vəhşilikləri, Azərbaycan dövlətinin yürütdüyü uğurlu daxili və xarici siyasət barəsində geniş və ətraflı mühazirələr oxunur, ölkədə və beynəlxalq aləmdə cərəyan edən siyasi və iqtisadi prosesləri əks etdirən ən son məlumatlar nəzərlərinə çatdırılır. Mütəmadi olaraq əmək və müharibə, həmçinin təhlükəsizlik orqanlarının veteranları ilə keçirilən görüşlər təhsil alanların əsl vətənpərvər ruhda tərbiyə olunmasına, seçdiyi peşəyə hörmətlə yanaşmasına təkan verir. Kursantların dövri mətbuatla müntəzəm tanış olmaları, hər hansı bir məsələ ilə bağlı müzakirələrin aparılması, televiziya verilişlərini izləmələri üçün də lazımi şərait yaradılmışdır.

Ümummilli lider Heydər Əliyevin layiqli davamçısı, Prezident İlham Əliyevin uğurla həyata keçirdiyi daxili və xarici siyasət, həyatımızın müxtəlif sahələri üzrə əldə olunan uğurlar, geniş vüsət almış quruculuq işlərinin şəxsi heyət arasında dərindən öyrənilməsi tərbiyəvi işin ali məqsədlərindəndir.

Hər il iki dəfə kursant və müəllim heyətindən ibarət qruplar Heydər Əliyev Fonduna gedir, oradakı eksponatlarla tanış olurlar. Bütün bunlar ideya-tərbiyə işinin səmərəli təşkilinə yaxından kömək edir, ulu öndərin bizlərə yadigar qoyduğu irsin öyrənilməsində misilsiz rol oynayır. Ümummilli liderimizin doğum və hüzn günlərinə həsr olunmuş tədbirlər çox hörmətli nazirimiz, general-leytenant cənab Eldar Mahmudovun bilavasitə iştirakı ilə Akademiyada keçirilir və bu, şəxsi heyət arasında tərbiyə işinin təşkilinə öz müsbət təsirini göstərir.

Bir sözlə, Akademiyada ideoloji-siyasi tərbiyə işi bizə müstəqil Azərbaycanı bəxş etmiş Heydər Əliyev irsi üzərində qurulur və bu, Azərbaycan yaşadıqca davam edəcəkdir.

Bəxtiyar SADIQOV:

- MTN-nin bugünkü səviyyəyə çatmasında, dövlətin milli maraqlarının keşiyində ayıq-sayıq dayanmış əsas dövlət orqanı kimi formalaşmasında ulu öndər Heydər Əliyevin xidmətləri misilsizdir. Heydər Əliyev bu işlərin bünövrəsini hələ ötən əsrin 60-cı illərində Azərbaycan Dövlət Təhlükəsizlik Komitəsində rəhbər vəzifələrdə çalışdığı zaman, sonradan isə Azərbaycana rəhbərlik etdiyi illərdə qoymuş, təhlükəsizlik orqanlarında milliləşdirmə aparmışdı. Ulu öndərin təşəbbüsü ilə yaradılan C.Naxçıvanski adına Hərbi Lisey isə azərbaycanlı hərbçi kadrların sayının artmasına yol açmışdı. Bu mövzuda danışmaq üçün söz Akademiyanın "İctimai-siyasi fənlər" kafedrasının rəisi, polkovnik, filologiya elmləri doktoru, professor Cəlal QASIMOVa verilir.

Cəlal QASIMOV:

- Tədqiqatlar göstərir ki, ulu öndər Heydər Əliyevin milliləşmə siyasəti ötəri, keçici və ya epizodik hal olmamış, bütöv bir sistem təşkil etmişdir. Belə ki, onun 1950-ci illərin ortalarından başlayan və sonralar da davam edən milliləşdirmə siyasəti ictimai-siyasi həyatın mühüm sahələrində, o cümlədən təhlükəsizlik orqanlarında milli kadrların yerləşdirilməsi, eləcə də keçmiş SSRİ-nin müxtəlif bölgələrində təhsil almağa göndərməsi ilə reallaşdırılırdı.

Bu həyati vacib prosesdə ən ümdə cəhət ondan ibarətdir ki, Heydər Əliyev milliləşdirmə siyasətini həyata keçirərkən prioritetliyi azərbaycanlıların sayca çoxluğuna, statistikasına deyil, onların milli xarakterə, milli təfəkkürə, milli əxlaqa malik olmalarına verirdi. Milli kadrların təhsili və müxtəlif vəzifələrdə yerləşdirilməsi Heydər Əliyevin milliləşdirmə siyasətinin birinci mərhələsini təşkil edirdi.

Ulu öndər Heydər Əliyev həyata keçirdiyi milliləşdirmə siyasətində başlıca yeri Azərbaycan dilinin inkişafına verirdi. Təsadüfi deyildir ki, 1969-cu ilin iyulunda Azərbaycan KP MK-nın birinci katibi seçilən ulu öndər həmin ilin noyabrında Bakı Dövlət Universitetinin 50 illik yubileyində özünəqədərki katiblərin ziddinə olaraq (nə qədər təhlükəli olsa da) ilk dəfə doğma ana dilində çıxış etdi. Heydər Əliyevin ana dilində çıxış üçün mənəvi və coğrafi məkan kimi BDU-nu seçməsi də təsadüfi deyil, düşünülmüş surətdə həyata keçirilən milliləşdirmə siyasətinin tərkib hissəsi idi. Ümummilli lider bununla Azərbaycan ziyalısına, Azərbaycan gənclərinə bildirirdi ki, milli dilimizin inkişafında mən sizə həmişə dəstək olacağam. Yeridilən bu siyasətin davamı kimi Heydər Əliyev 1970-ci illərdə dilimizin mükəmməl tədqiq və təbliğindəki xidmətlərinə görə "Müasir Azərbaycan dili" dərsliklərinin müəlliflərinə dövlət mükafatı verdi. Heydər Əliyev bununla da məsələni bitmiş hesab etmədi və sovetlər dönəmində ilk dəfə olaraq 1978-ci ildə Azərbaycan dili dövlət dili kimi konstitusiyamızda öz təsdiq və təsbitini tapdı. Müstəqillik illərində isə dilimizin inkişafı üçün böyük imkanlar yarandı və Heydər Əliyevin sayəsində dövlət dili haqqında qanun qəbul olundu.

Akademiyanın kursant və dinləyicilərinə o da çatdırılır ki, milli ziyalı, daha doğrusu, milli ziyalı düşüncəsinin azadlığı problemi də Heydər Əliyevin milliləşmə siyasətinin tərkib hissəsinə çevrildi. Xalq şairi Bəxtiyar Vahabzadənin "Gülüstan" poemasında ikiyə bölünmüş Azərbaycan ideyası dövrün ən böyük dissident hadisəsi kimi Moskvanın diqqətini cəlb etsə də, ulu öndərin müdrikliyi sayəsində o, bu kritik situasiyadan fəsadsız çıxdı. Millətçilikdə ittiham edilən akademik Ziya Bünyadov "Atabəylər dövləti" əsərinə görə dövlət mükafatı aldı, Rəsul Rza, Xəlil Rza Ulutürk, Əkrəm Əylisli, İbrahimbəyov qardaşları, Anar və başqaları əsərlərində qaldırdıqları milli ideyalarına görə təqib və təzyiqlərdən yaxa qurtardı. Məsələnin mahiyyətinə diqqət versək görərik ki, o, yalnız fərdləri deyil, Azərbaycanın dövlətçilik tarixi və dövlətçilik ənənələri ilə bağlı fundamental məsələləri həll edirdi. Dövlətçilik tarixinə və dövlətçilik ənənəsinə sədaqət ümummilli lider Heydər Əliyevin milliləşdirmə siyasətində növbəti mərhələ kimi özünü qabarıq şəkildə göstərməyə başladı.

Biz böyük mütəfəkkir şair, dramaturq Cavid əfəndinin 1982-ci ildə vətənə dönüşünü də ulu öndərin milliləşdirmə siyasətinin tərkib hissəsi hesab edirik.

Fikrimizcə, Cavid əfəndinin dönüşünə bir şairin və ya bir dramaturqun dönüşü kimi baxmaq olduqca səhv olardı. Çünki, Heydər Əliyev yalnız Cavidin cənazəsini və cəsədini deyil, Cavidin Şərq fəlsəfəsindən qaynaqlanan, Qərb fəlsəfəsi ilə çulğalaşan ideyalarını Vətənə qaytarırdı.

Təbii ki, dövlətçiliyin salnaməsini yazan ümummilli lider əməli fəaliyyəti ilə xalqın qəlbində elə bir möhtəşəm abidə ucaltmışdır ki, bu abidənin zirvəsi yalnız Azərbaycandan azərbaycanlılara deyil, həm də Asiya və Avropanın qovşağından dünyaya və dünya ictimaiyyətinə bütün üfüqləri və perspektivləri ilə görünür.

Elə ona görə də əsrin dörddə birini bu orqanlarda xalqına sədaqətlə xidmətə həsr edən, təhlükəsizlik orqanlarının hərtərəfli biliyə, dövlətə və dövlətçiliyə sadiq olan milli kadrlarla təmin edilməsində müstəsna rol oynayan, xüsusi xidmət orqanlarında maarifçilik təsisatlarının əsasını qoyan, gənc nəsli milli maraqlar ruhunda tərbiyə edən ümummilli liderimiz Heydər Əliyevin adının bu Akademiyada Prezident İlham Əliyevin 2005-ci ildə imzaladığı fərmanla əbədiləşdirilməsi hamıda fərəh hissi doğurur və ümummilli liderin öz halal haqqı kimi dəyərləndirilir.

İstər təhsil prosesində, istər Akademiyada ideya-tərbiyəvi işin təşkilində, istərsə də məktəbdənkənar dərslərdə şəxsi heyətə çatdırılır ki, Azərbaycanda Heydər Əliyevin səyi nəticəsində hərbi məktəblər Cəmşid Naxçıvanskidən MTN Akademiyasına qədər yol gəldi. Əsası sovetlər dönəmində qoyulan və tədricən inkişaf etdirilən bu maarif ocaqları ilə müstəqil Azərbaycanda milli hərbi məktəblərin, hərbi akademiyaların əsası qoyuldu ki, bunun da banisi Heydər Əliyevdir.

Biz hərbçilər üçün Heydər Əliyev yalnız siyasətçi deyil, həm də Ali Baş Komandan idi. Ali Baş Komandanın adını daşıyan bir Akademiyada elə işləməli və fəaliyyət istiqamətlərimizi elə qurmalıyıq ki, yetişdirdiyimiz kadrlar ulu öndərdən bizə miras qalan dövlətin, dövlətçiliyin, iqtisadiyyatın, milli-mənəvi dəyərlərin, adət-ənənələrin, yaddaş və təfəkkür suverenliyinin təhlükəsizliyinin keşiyində sədaqətlə dayansınlar.

Bəxtiyar SADIQOV:

- Xüsusi xidmət orqanı əməkdaşının yüksək peşəkarlığı üçün vacib tələblərdən biri də onun hüquqi sahədə mükəmməl biliyə və müasir dünyagörüşünə malik olmasıdır. Demokratik və hüquqi dövlətdə yaşadığımızdan bu məqamın əhəmiyyəti daha da artır. Fərəhli haldır ki, Heydər Əliyev adına MTN-nin Akademiyasında kursantlara hüquq fənləri ən yüksək səviyyədə tədris olunur. Bu mövzuda danışmaq üçün söz Akademiyanın "Konstitusiya hüququ" kafedrasının rəisi, polkovnik-leytenant Roza NƏBİYEVAya verilir.

Roza NƏBİYEVA:

- Milli Təhlükəsizlik Nazirliyinin ölkənin aparıcı qurumlarından birinə çevrilməsi, təhlükəsizlik siyasətinin hüquqi əsaslarının yaradılması da əmək fəaliyyətinin 25 ilini təhlükəsizlik orqanlarına həsr etmiş ulu öndər Heydər Əliyevin adı ilə bağlıdır. Onun yeritdiyi uzaqgörən və müdrik siyasət nəticəsində ölkədə milli təhlükəsizliyin təminatı prosesi artıq sistemli, uzunmüddətli və fasiləsiz xarakter almağa başladı.

1995-ci ilin 12 noyabrında Heydər Əliyevin rəhbərliyi ilə hazırlanmış və ümumxalq səsverməsi ilə qəbul edilmiş Azərbaycan Respublikasının Konstitusiyasında prioritetlərin və milli dəyərlərin müəyyən edilməsi, insan və vətəndaş hüquq və azadlıqlarının təminatının təsbiti MTN-in fəaliyyətində əsaslı dönüş nöqtəsi olmuşdur. Bütün bunlar orqanların fəaliyyətini tənzimləyən normativ-hüquqi bazanın inkişafına və təhlükəsizlik orqanlarında işin forma və metodlarının təkmilləşdirilməsinə təkan verməklə yanaşı, gənc müstəqil respublikamızın dövlətçilik ənənələrinin və dövlət strukturlarının təhlükəsizliyinə təminat verdi.

Ümummilli lider Heydər Əliyevin həyata keçirdiyi hüquq siyasəti onun layiqli davamçısı, möhtərəm Prezidentimiz İlham Əliyev tərəfindən ardıcıl və uğurla davam etdirilir. 2004-cü ildən başlayaraq nazirliyin hüquqi bazasının yaradılması istiqamətində yeni tədbirlər həyata keçirildi. Buna misal olaraq "Milli Təhlükəsizlik Nazirliyi haqqında", "Kəşfiyyat və əks-kəşfiyyat fəaliyyəti haqqında", "İxrac nəzarəti haqqında", "Korrupsiyaya qarşı mübarizə haqqında", "İnsan alverinə qarşı mübarizə haqqında" və digər qanunları, "Azərbaycan Respublikası Milli Təhlükəsizlik Nazirliyi haqqında Əsasnamə"ni təsdiq edən Azərbaycan Respublikası Prezidentinin fərmanı, "Azərbaycan Respublikasının Milli Təhlükəsizlik Konsepsiyası"nı, "Milli təhlükəsizlik orqanlarının fəaliyyətinin təkmilləşdirilməsi üzrə Dövlət Proqramı"nı təsdiq edən sərəncamları göstərmək olar.

Göstərilən qanunvericilikdə milli maraqların və təhdidlərin anlayışı verilmiş, təsnifatı aparılmış, milli təhlükəsizliyin təminatı sahələri və sistemin əsas elementləri, MTN-in fəaliyyətinin hüquqi çərçivəsi, ölkənin milli təhlükəsizliyinin hərtərəfli təmin olunması işində vəzifə və səlahiyyətləri dəqiq müəyyənləşdirilmişdir.

Milli təhlükəsizliyin təmin edilməsində milli maraqlara xidmət edən gənc kadrların yetişdirilməsi, onların hazırlıq səviyyəsinin artırılması Milli Təhlükəsizlik Nazirliyinin qarşısında duran ən önəmli məsələlərdən biridir. Ümummilli lider Heydər Əliyev 1998-ci ilin martın 28-də MTN-in əməkdaşları ilə görüşündə bildirmişdir: "MTN üzərinə düşən vəzifələri yerinə yetirmək üçün öz peşəkarlıq fəaliyyətini, təcrübəsini daha da artırmalıdır. Bilikli, gənc, müasir tələblərə cavab verən kadrlar hazırlanmalıdır... Güman edirəm ki, MTN-in Akademiyası bu vəzifələrin yerinə yetirilməsi üçün öz xidmətlərini göstərəcəkdir...Ancaq sədaqətli, bilikli, peşəkar kadrlar hazırlanmalıdır... Nazirliyin əməkdaşları ...Azərbaycanın Konstitusiyasına, qanunlarını yaxşı bilməlidirlər. Konstitusiyanın və qanunların həyata keçirilməsi MTN əməkdaşlarının əsas vəzifəsidir".

Akademiyada yeni standartlara və tələblərə uyğun olaraq hüquq nəzəriyyəsi, konstitusiya hüququ, inzibati hüquq, beynəlxalq hüquq, cinayət hüququ, cinayət prosesi, kriminalistika, insan hüquqları və s. tədris olunur. Tədris olunan hüquq fənləri milli təhlükəsizlik orqanlarının fəaliyyət istiqamətlərinə uyğun aparılır.

Hüquq fənlərinin tədrisində məqsəd kursantlara, dinləyicilərə zəruri hüquqi biliklər verməklə yanaşı, dövlətin milli təhlükəsizliyinin təmin edilməsi sahəsində qüvvədə olan qanunvericiliyi, onun vəzifələri və prinsipləri, normaların məzmunu haqqında dərin nəzəri bilikləri mənimsətməkdən, eyni zamanda onlarda cinayətkarlıqla, o cümlədən xarici dövlətlərin xüsusi xidmət orqanlarının kəşfiyyat-pozuculuq fəaliyyəti ilə mübarizə təcrübəsində hüquqi normaların praktiki fəaliyyətdə düzgün tətbiq edilməsi vərdişləri yaratmaqdan ibarətdir. Bununla yanaşı, hüquq normalarının mükəmməl öyrənilməsi milli təhlükəsizlik orqanlarının əməkdaşlarının xidməti borcunun yerinə yetirilməsi zamanı qanunçuluğa və hüquq qaydalarına riayət edilməsinə, vətəndaşın hüquq və azadlıqlarının təmin olunmasına xidmət edir.

Akademiyanın professor-müəllim heyətinin qarşısında duran önəmli vəzifələrdən biri də milli təhlükəsizliyin təminatı ilə bağlı tədris-metodiki və elmi-tədqiqatların aparılmasıdır. Bu vəzifəni yerinə yetirərkən Akademiyada bütün ixtisaslar üzrə tədris materialları, mühazirələr toplusu, proqramlar, metodiki göstərişlər, elmi məqalələr, monoqrafiyalar, dərsliklər, dərs vəsaitləri hazırlanır və kursantların, dinləyicilərin tədris prosesində geniş istifadə edilir.

Hüquq fənlərinin tədrisinin yüksək səviyyədə təmin edilməsi üçün ən müasir texniki avadanlıqla təchiz edilmiş siniflər və kabinetlər, kompyuter otaqları, ümumi və xüsusi kitabxana, kriminalistika sinfi, kriminalistik laboratoriya, kriminalistik sınaq meydanı və s. kursantların, dinləyicilərin sərəncamına verilib.

Akademiyanın professor-müəllim heyəti milli öndərmizin milli təhlükəsizlik orqanlarını peşəkar kadr potensialı ilə təmin etmək tələblərini ləyaqətlə, böyük məsuliyyət hissi ilə yerinə yetirir və ölkəmizin inkişafı və qüdrətlənməsi naminə bütün qüvvəsini, imkanını və gücünü bundan sonra da səfərbər edəcəkdir.

Bəxtiyar SADIQOV:

- Xüsusi xidmət orqanı əməkdaşlarının peşə fəaliyyətlərini uğurla həyata keçirmələrində xarici dilləri bilmələri mühüm rol oynayır. Tədris prosesində bu məsələyə xüsusi qayğı göstərilir. Akademiyada kursantlara xarici dillərin öyrədilməsi sahəsində görülən işlərlə bağlı danışmaq üçün söz "Xarici dillər və ölkəşünaslıq" kafedrasının rəisi, dosent, polkovnik Əşrəf DADAŞOVa verilir.

Əşrəf DADAŞOV:

- Müstəqil respublikamızda Milli Təhlükəsizlik Nazirliyinin Akademiyasının yaradılması bütün ölkənin ictimai həyatında, o cümlədən hərbi vətənpərvərlik tərbiyəsi işində çox əlamətdar hadisə oldu. Azərbaycan Respublikasının beynəlxalq əlaqələri günbəgün genişlənir və möhkəmlənir. Deməli, əməkdaşlıq etdiyimiz xarici dövlətlərlə vaxtaşırı olaraq fikir mübadiləsi keçirmək, onların təcrübəsini öyrənmək, həm də müstəqillik illərində ölkəmizin qazandığı uğurlarla onları tanış etmək və digər zərurətlər meydana çıxır. Xalqımızın ümummilli lideri Heydər Əliyev demişdir: "Xarici dil bilmək əlbəttə ki, lazımdır, vacibdir. Mən bir daha arzu edirəm ki, vətəndaşlarımız ingilis dilini də, rus dilini də, fransız dilini də, alman dilini də, türk dilini də, ərəb dilini də, fars dilini də, hətta çin dilini də bilsinlər". Bu baxımdan MTN Akademiyası kursantlarının xarici dilləri yüksək səviyyədə bilməsi onların hərb elminə yiyələnmələri qədər zəruri olduğunu desək, yəqin ki, yanılmarıq. Belə ki, xarici dillərin tədrisi Vətənimiz üçün həm də strateji əhəmiyyət kəsb edən dövlət məsələsidir. Beynəlxalq səviyyədə siyasət aparmaq, hər an ideoloji mübarizəyə hazır olmaq, dövlətçiliyimizə ziyan vura biləcək hər cür təxribatın və pozuculuq niyyətlərinin qarşısını vaxtında ala bilmək üçün xarici dilləri mükəmməl bilən peşəkar kadrların hazırlanması çox vacibdir.

MTN-in Heydər Əliyev adına Akademiyasının "Xarici dillər və ölkəşünaslıq" kafedrasının fəaliyyətə başladığı ilk gündən qarşıda duran əsas məsələ kafedranın tədris bazasını yaratmaq, Akademiyada "İngilis dili" fənninin tədrisinin məqsəd və məzmununu müəyyən etmək, eyni zamanda, bu fənnin tədrisi metodikasını həmin məqsəd və məzmuna müvafiq olaraq işləyib hazırlamaqdan ibarət olmuşdur. Aydın məsələdir ki, yüksək ixtisaslı peşəkar kadrlar hazırlamaq üçün ixtisaslaşdırılmış dərslik və dərs vəsaitlərinin yazılması, müvafiq proqramların tərtib edilməsi mühüm əhəmiyyət kəsb edir. Bu boşluğu aradan qaldırmaq üçün təcili surətdə dərslik və ya dərs vəsaiti hazırlamaq zərurəti meydana çıxdı. Odur ki, çox qısa bir zamanda yalnız MTN-nin Heydər Əliyev adına Akademiyası üçün "İngilis dili" dərs vəsaitinin əvvəlcə I hissəsi, az sonra isə bu vəsaitin II hissəsi də yazıldı, Akademiyanın redaksiya-nəşriyyat şöbəsində nəşr edilərək kursantların istifadəsinə verildi. Bu gün artıq məmnuniyyət hissi ilə qeyd edə bilərik ki, "İngilis dili" və "Ölkəşünaslıq" fənlərinin tədrisi hal-hazırda qüvvədə olan müvafiq tədris proqramların tələbləri əsasında həyata keçirilir.

Xarici dillərin tədrisi zamanı əyani vəsaitlərin, texniki tədris vasitələrinin və onlardan metodik baxımdan düzgün istifadə etməyin rolu şübhəsiz ki, çox böyükdür. Mütəmadi olaraq, kafedranın fonotekasının yaradılmasına və bu fondun yeni materiallarla daha da zənginləşdirilməsinə çalışmışıq. Artıq fonotekamıza ingilis və Amerikan diktorları və dil mütəxəssisləri tərəfindən audio, video lentlərə və disklərə yazılmış xeyli yeni tədris materialı toplaya bilmişik Bu sahədə işimiz davam etməkdədir. İndi kursantlar müasir texniki avadanlıqlarla təchiz olunmuş linqafon kabinetlərində həmin tədris materiallarından istifadə edir, ingilis tələffüz və intonasiyanın, eyni zamanda, şifahi nitqinin xüsusiyyətlərini müəllimin köməyi ilə öyrənir, təhlil edir və əldə etdikləri bilik və bacarıqları praktikaya tətbiq etməyə çalışırlar. Bu işi metodik baxımdan daha düzgün və səmərəli şəkildə qurmaq məqsədilə kursantlar üçün oxu və tələffüz qaydalarına aid məşq çalışmaları və metodik göstərişlərdən ibarət əlavə dərs vəsaiti yazılaraq kitabça şəklində çap etdirilmişdir. Yeri gəlmişkən qeyd edək ki, tədris zamanı əyanilik prinsipinə geniş yer ayrılmasına xüsusi diqqət yetirilir. Bunun üçün Akademiyada mükəmməl maddi-texniki baza və hər cür şərait yaradılmışdır.

2007-ci ildə respublikamızda ilk dəfə olaraq hərbi qulluqçular üçün ixtisaslaşdırılmış ingilis dili dərsliyi üzərində iş tamamlandı. Dərslik MTN-in Heydər Əliyev adına Akademiyasının "Əməliyyat işçilərinin hazırlanması" və "İnformasiya təhlükəsizliyi" fakültələrində "İngilis dili" fənninin tədrisi üçün yazılmış ilk dərslik oldu.

Xarici dillər və ölkəşünaslıq kafedrası ilk illərdə ingilis dilli kafedra kimi öz işinə başlamış, lakin dünyada inteqrasiyanın geniş vüsət aldığı dövrdə günün tələblərindən çıxış edərək, bəzi digər xarici dillərin də tədrisinə ehtiyac yaranmışdı. Hazırda Akademiyada ingilis dili ilə yanaşı, Avropa dillərindən rus, fransız və ispan dilləri, Şərq dillərindən isə fars dili də tədris olunur. Bu o deməkdir ki, Akademiyanı bitirən kursantlar minimum iki xarici dildə sərbəst danışa biləcəklər. Bizcə bu, hər bir əməliyyat işçisinin peşə hazırlığı səviyyəsini müəyyən edən əsas göstəricilərdən biri olmalıdır. Lakin təkçə xarici dilləri bilmək kifayət etməz. Dövlətimizin maraq dairəsində olan hər bir yaxın-uzaq ölkənin dilini bilməklə yanaşı, onun yerləşdiyi coğrafi məkanı, tarixi, iqtisadiyyatı, daxili və xarici siyasəti, dini, incəsənəti, adət-ənənələri, mənəvi-əxlaqi dəyərləri, beynəlxalq əlaqələri və s. haqqında zəruri biliklərə malik olmaq, həmin ölkələrin doğma respublikamızla olan əlaqələrinin istiqamətlərini və inkişaf perspektivlərini də bilmək vacibdir. Bu işdə "Ölkəşünaslıq" fənninin əhəmiyyəti danılmazdır.

"Ölkəşünaslıq" kursunun əsas məqsədi vətənimizin milli mənafeyi və təhlükəsizliyi baxımından bizim üçün maraqlı olan ölkələrin, həmçinin Azərbaycanla həmsərhəd olan dövlətlərin bugünkü vəziyyəti haqqında biliklərin verilməsindən, əldə edilmiş biliklərin gələcəkdə ünsiyyətə tətbiq edilməsindən, ehtiyac olsa, gələcəkdə həmin biliklərdən peşə fəaliyyəti zamanı istifadə edilməsindən ibarətdir.

Yuxarıda göstərilənləri özündə əks etdirən "Ölkəşünaslıq" fənni üzrə dərs vəsaiti də tərəfimizdən hazırlanaraq kursantların istifadəsinə verildi. Qeyd etmək istərdik ki, Akademiyada tədris olunan ikinci xarici dillərdən fars, fransız və ispan dillərindən də ixtisaslaşdırılmış dərsliklər üzərində işin cari tədris ilinin sonunadək tamamlanması planlaşdırılmışdır.

Bəxtiyar SADIQOV:

- Hüquq-mühafizə orqanlarının əməkdaşları üçün vacib tələblərdən biri onların fiziki hazırlığının yüksək səviyyədə olmasıdır. Çünki bəzən ekstremal şəraitdə, gecə-gündüz bilmədən vəzifə borclarını yerinə yetirməli olurlar. Kursantların fiziki hazırlığı ilə bağlı danışmaq üçün söz Akademiyanın III fakültəsinin dinləyicisi, leytenant İbrahim İBRAHİMOVa verilir.

İbrahim İBRAHİMOV:

- Müstəqillik əldə etdikdən sonra bir çox sahələrdə olduğu kimi, idman sahəsində də yeni nailiyyətlər əldə olundu. Belə uğurların əldə olunmasına səbəb ümummilli lider Heydər Əliyevin Azərbaycanın hər bir şəhər, qəsəbə və rayonunda möhtəşəm idman qurğularının tikilib istifadəyə verilməsinə, onların maddi-texniki bazasının gücləndirilməsinə, olimpiya idman növləri ilə yanaşı, qeyri-olimpiya, o cümlədən zehni bacarıq, istedad tələb edən idman növlərinin də inkişafına xüsusi diqqət yetirməsi idi. Bütün bunlar ölkəmizdə bədən tərbiyəsi və idmanın inkişafına və kütləviliyinə geniş imkanlar yaratdı.

Yeri gəlmişkən qeyd etməliyəm ki, Azərbaycanda Olimpiya Komitəsinin yaradılması və İlham Əliyevin bu komitənin prezidenti seçilməsi respublikanın idman həyatında yeni mərhələnin əsasını qoydu. Məhz cənab İlham Əliyevin birbaşa rəhbərliyi ilə ölkəmizdə olimpizmin inkişafına, öyrənilməsinə, tətbiqinə xüsusi diqqət yetirildi. Bunun nəticəsində Azərbaycan idmançılarının qələbə sorağı dünyanın müxtəlif yerlərində keçirilən ən möhtəşəm idman yarışlarından gəldi.

Maraqlıdır ki, keçirilən idman yarışlarında MTN-in əməkdaşları, o cümlədən kursant və dinləyicilər də yaxından iştirak edir. Ümummilli lider Heydər Əliyev 1998-ci ildə MTN-in əməkdaşları ilə görüşündə deyirdi: "Ölkəmizin vətəndaşlarının hamısı sağlam, hamısı yaxşı fiziki hazırlıqlı olsun. Xüsusilə dövlət işində, hərbi işdə, təhlükəsizlik orqanlarında işləyənlər. Siz fiziki cəhətdən nə qədər sağlam olsanız, o qədər də yaxşı işləyəcəksiniz. Təbii ki, həm fiziki hazırlığınız, həm də ki, ümumi hazırlığınız olmalıdır. Amma fiziki hazırlıq əsas şərtlərdən biridir". Bu fikirləri əldə rəhbər tutan MTN-in Heydər Əliyev adına Akademiyasının rəhbərliyi hər il müxtəlif tədbirlər və konfranslarla yanaşı, idman yarışları da keçirir. Akademiya rəhbərliyi gənc nəslin vətənə, xalqa, dövlətə sədaqət ruhunda formalaşmasında ulu öndərin, onun siyasi kursunun layiqli davamçısı, möhtərəm Prezident İlham Əliyevin siyasi fəaliyyətinin bu istiqamətlərinə xüsusi önəm verir.

Məhz, bu diqqət sayəsində ulu öndərin xatirəsinə həsr edilmiş istər Akademiyanın daxilində keçirilən yarışlarda, istərsə də respublika miqyaslı yarışlarda kursant və dinləyicilərimiz daim mükafatçılar sırasında olmuşlar. 2011-ci ilin iyulunda ilk dəfə olaraq Bolqarıstanın Sofiya şəhərində keçirilən Avropa ölkələrinin ordu, polis, təhlükəsizlik orqanlarının cui-cidsu və xüsusi özünü müdafiə üzrə beynəlxalq yarışın qızıl medalın sahibi və həmin ilin sentyabrında İtaliyada keçirilən veteranlar arasında Avropa oyunlarının yüngül atletika üzrə gümüş mükafatçısı da məhz MTN-in Heydər Əliyev adına Akademiyasının əməkdaşları olmuşdur. İdman təsnifat dərəcələrinin ödənilməsi işi Akademiya rəhbərliyinin nəzarətindədir. Belə ki, Akademiyanın əməkdaşlarından və kursantlarından bir nəfər beynəlxalq dərəcəli, 2 nəfəri respublika dərəcəli hakim, 4 nəfər idman ustası, 3 nəfər idman ustalığına namizəd, 4 nəfəri birinci dərəcə, 20 nəfəri ikinci dərəcə, 35 nəfəri üçüncü dərəcəli təsnifat normalarını ödəmişlər.

MTN-in Heydər Əliyev adına Akademiyasının ərazisində müasir standartlara cavab verən idman sağlamlıq mərkəzi də fəaliyyət göstərir. MTN-in Heydər Əliyev adına Akademiyasında fiziki işlər üzrə görülən bütün bu təqdirəlayiq işlər bizi gələcəkdə əməliyyat-xidməti fəaliyyətində uzunmüddətli fiziki və psixoloji gərginliyə tab gətirməyə, eləcə də döyüş və xüsusi tapşırıqların yerinə yetirilməsi zamanı qətiyyətlə hərəkət etməyə sövq edir.

Bəxtiyar SADIQOV:

- Çıxışlardan da aydın oldu ki, MTN-in Heydər Əliyev adına Akademiyasında kursantların peşəkar kadr kimi yetişmələri üçün zəruri şərait yaradılmışdır. Belə bir spesifik tədris mərkəzinin təşkili ulu öndər Heydər Əliyevin ölkəmizin təhlükəsizlik xidməti orqanlarının formalaşdırılması istiqamətində ən böyük xidmətlərindən biridir. Çıxış üçün söz I fakültənin 5-ci kursunun kursantı, Heydər Əliyev təqaüdçüsü Vüsal MƏMMƏDOVa verilir.

Vüsal MƏMMƏDOV:

- MTN-in Heydər Əliyev adına Akademiyasında kursant və dinləyicilər üçün yaradılmış nümunəvi şərait dərin və hərtərəfli biliklər qazanmaq, geniş dünyagörüşlü milli kadrlar kimi yetişməyə imkan verir. Geniş və işıqlı, hər cür texniki və əyani vəsaitlərlə təmin olunmuş auditoriyalar, fənn kabinetləri, xüsusi və ümumi kitabxanalar, İdman və Sağlamlıq Mərkəzi, müasir tələblərə cavab verən yataqxanalar, istirahət otaqları, yeməkxanalar, klub bizim istifadəmizdədir. Akademiyada keçən günlər çox mənalı, maraqlıdır. Günün rejim qaydaları elə qurulmuşdur ki, dərs və praktiki məşğələlərdən sonra idman tədbirləri, zabit və müəllim heyəti ilə müxtəlif mövzularda aparılan elmi-polemik söhbətlər və fikir mübadilələri, mətbuat səhifələri ilə tanışlıq, filmlərin nümayişi, muzey və teatr tamaşalarına mütəmadi baxışlar asudə vaxtımızın səmərəli təşkil olunmasına xidmət edir.

Tədris müəssisəsinin pedaqoji kollektivi - professor-müəllim heyəti öz bilik və bacarıqlarını bizdən əsirgəmirlər. Müəllimlərimizin bizə aşıladıqları biliklər sayəsində hüquq, ictimai-siyasi elmlərin və xüsusi fənlərin sirlərinə dərindən yiyələnmişik. MTN rəhbərliyi də çıxışlarında Akademiyanı bitirmiş məzunların intellekt səviyyələrinin yüksək olmalarından razı qaldığını bildirmişdir.

Bütün bunlara, yəni bizə yaradılmış ideal şəraitə görə diqqət və qayğısını heç vaxt Akademiyadan əsirgəməyən Milli Təhlükəsizlik Nazirliyinin rəhbərliyinə dərin minnətdarlığımızı bildirir və Akademiynın pedaqoji heyətinə çox sağ olun deyirik.

Akademiyada yadarılmış sağlam mühitə görə biz daha çox ümummilli lider Heydər Əliyevə borcluyuq. Ona görə ki, əgər o, bu Akademiyanı təsis etməsəydi, indi uğurlardan da danışa bilməzdik. Sadalanan müsbət hallar məhz ulu öndərimizin sayəsində mümkün olmuşdur. Biz gənclər inanırıq ki, ümummilli lider Heydər Əliyev irsindən faydalanan, bu irsə sədaqət nümayiş etdirən Azərbaycan Respublikasının Prezidenti, Ali Baş Komandan İlham Əliyev tərəfindən müstəqilliyimiz daim möhkəmləndiriləcək və dönməz olacaqdır. Nailiyyətlərimiz isə günü-gündən artır və bu, müstəqilliyimizin möhkəmləndirilməsi və dönməzliyinə zəmin yaradır.

Bəxtiyar SADIQOV:

- Hörmətli "dəyirmi masa" iştirakçıları!

Bu gün Azərbaycan dinamik inkişaf edir. Son illərdə reallaşan iri enerji layihələri dövlətimizin və xalqımızın milli maraqlarına xidmət edir. Bununla belə ölkəmizin inkişafı, neft-qaz kəmərlərinin işə düşməsi, Xəzərdə yeni qaz yataqlarının kəşfi təhlükəsizlik məsələlərini müasir dövrdə ölkəmiz üçün daha da aktual edir. Elə buna görə təsadüfi deyil ki, Prezident İlham Əliyevin fəaliyyətində dövlətimizin milli maraqlarına cavab verən təhlükəsizlik siyasətinin həyata keçirilməsi xüsusi yer tutur.

Qeyd edilənlərlə yanaşı, Ermənistanın Azərbaycana qarşı işğalçılıq siyasətini dayandırmaması, etnik separatizmi dəstəkləməsi, işğal olunmuş Azərbaycan torpaqlarında terrorçuların hazırlanması və digər çirkin işlərin həyata keçirilməsi nəinki ölkəmizin, bütövlüklə bölgənin təhlükəsizliyinə birbaşa təhdiddir. Bu baxımdan dövlətimizin və xalqımızın firavanlığının, təhlükəsizliyinin təmin edilməsi üçün milli təhlükəsizlik orqanlarının üzərinə daha böyük vəzifələr düşür. İnanırıq ki, ölkəmizdə həyata keçirilən milli təhlükəsizlik siyasətinin əsas daşıyıcılarından və aparıcı qüvvəsi olan MTN bundan sonra da özünün başlıca vəzifələri olan milli maraqlarımızın etibarlı qorunması və təhlükəsizliyimizin hərtərəfli təmin edilməsi sahəsində əzmkar fəaliyyətini uğurla davam etdirəcəkdir.

Mən bir daha sizi Azərbaycanın dövlət müstəqilliyinin bərpasının 20-ci ildönümü münasibətilə təbrik edir və fəaliyyətinizdə uğurlar arzulayıram.

Azərbaycan.- 2011.-16 oktyabr.- S. 6, 7.