Dövlət müstəqilliyimizin bərpasının iyirminci ildönümünə həsr olunmuş konsert keçirilmişdir

Bakı şəhərindəki 6 nömrəli musiqi məktəbində Azərbaycanın dövlət müstəqilliyinin bərpasının 20-ci ildönümünə həsr olunmuş bayram konserti keçirilmişdir.

Səbail Rayon İcra Hakimiyyətindən AzərTAc-a bildirmişlər ki, məktəbin akt zalına toplaşmış qonaqlar qarşısında istedadlı flamenko ifaçısı, 2010-2011-ci illlərdə "Festival de la Jordoba" müsabiqələrinin iştirakçısı və diplomantı Cavid Ələkbərli çıxış etmişdir.

İspaniyanın məşhur musiqiçiləri Manolo Sanlukar, Manolo Franko, Pako Serrano, Xose Antonio Rodriqezdən sənət dərsləri almış gənc ifaçı Cavid Ələkbərli ifası zamanı "Bayatı-Şiraz" muğamını improvizə etmiş, flamenko üslubunda müxtəlif ispan ritmlərini səsləndirmişdir.

Gənc ifaçının çıxışı dəfələrlə tamaşaçıların sürəkli alqışları ilə müşayiət olunmuşdur.

Əlamətdar bayram ərəfəsində keçirilən bu konsertdə gənc ifaçı Cavid Ələkbərlinin uğurlu çıxışı Azərbaycan-İspaniya mədəni əlaqələrinin möhkəmlənməsi və inkişafında yeni səhifələrdən biri olmuşdur.

Azərbaycan.- 2011.-18 oktyabr.- S. 21.