Türkiyənin TRT televiziya kanalında Azərbaycanın dövlət müstəqilliyinin bərpasının iyirminci ildönümünə həsr olunmuş xüsusi proqram yayımlanmışdır

Türkiyənin TRT və Azərbaycanın İctimai Televiziya kanallarının birgə hazırladıqları dövlət müstəqilliyimizin bərpasının iyirminci ildönümünə həsr olunmuş proqram yayımlanmışdır.

Ankara studiyasında Azərbaycanın Türkiyədəki səfiri Faiq Bağırov, Türkiyə-Azərbaycan parlamentlərarası dostluq qrupunun sədri Necdət Ünüvar və millət vəkili Mustafa Kabakçı dövlət müstəqilliyimizdən bəhs etmiş, Türkiyənin müstəqilliyimizi tanıyan ilk dövlət olduğu vurğulanmışdır.

Verilişdə Azərbaycan xalqının ümummilli lideri Heydər Əliyevin müstəqil dövlətimizin banisi olduğu vurğulanmış, ulu öndərin 2001-ci ilin martında Türkiyəyə səfəri zamanı TRT televiziyasına verdiyi müsahibə nümayiş etdirilmişdir.

Bakı studiyasında Milli Məclis Sədrinin müavini Bahar Muradova, Türkiyənin ölkəmizdəki səfiri Hulusi Kılıç, dövlətimizin müstəqilliyini tanıyan ikinci ölkə olan Pakistanın Azərbaycandakı səfiri İnayətullah Kakar da Azərbaycanın dövlət müstəqilliyinin bərpası ilə bağlı fikirlərini paylaşmış, təbriklərini çatdırmışlar.

AzərTAc

Azərbaycan.- 2011.- 19 oktyabr.- S. 5.