ABŞ-ın Monterey şəhəri oktyabrın 18-ni «Azərbaycan İrsi Günü» elan etmişdir

Azərbaycan Respublikasının Los-Anceles şəhərindəki Baş Konsulluğundan AzərTAc-a daxil olan məlumata görə, ABŞ-ın Kaliforniya ştatının Monterey şəhərində Azərbaycanın müstəqilliyinin bərpasının 20 illiyi bir sıra tədbirlərlə qeyd edilmişdir. Kaliforniyanın tarixi paytaxtı Montereyin tanınmış "Colton Hall" muzeyində təşkil edilən ziyafətdə şəhərin meri Çak Della Salla Milli Məclisin deputatı Asim Mollazadənin başçılıq etdiyi Azərbaycan nümayəndə heyətinə Şəhər Şurasının oktyabrın 18-ni "Azərbaycan İrsi Günü" elan edilməsi barədə bəyannaməsini təqdim etmişdir. Çak Della Salla bayram münasibətilə Azərbaycan nümayəndə heyətinə təbriklərini çatdırmış və xatırlatmışdır ki, Azərbaycanın Lənkəran şəhəri ilə Monterey qardaşlaşmış şəhərlərdir. İki şəhər arasında qurulmuş fəal əlaqələr ölkələrimiz arasındakı münasibətlərin inkişafına töhfəsini verməkdədir.

Milli Məclisin deputatı Asim Mollazadə və Nəsimi Rayon İcra Hakimiyyətinin başçısı Nəsib Məhəməliyev ölkəmiz müstəqilliyini bərpa etdikdən sonra keçdiyi uğurlu yoldan danışmış, ABŞ və Azərbaycanın strateji tərəfdaşlıq münasibətlərinə toxunmuş, Azərbaycanın bu münasibətləri həm hökumətlər, həm ştat, həm də şəhərlər səviyyəsində inkişaf etdirilməsində, xalqlarımız arasında bütün sahələrdə qarşılıqlı əməkdaşlığın gücləndirilməsində maraqlı olduğunu vurğulamışlar.

Mərasimdə, həmçinin Kaliforniyanın ABŞ Konqresindəki təmsilçisi Sem Farın Azərbaycanın 20 illik müstəqillik bayramı münasibətilə göndərdiyi təbrik məktubu oxunmuşdur. Daha sonra Azərbaycan mənşəli amerikalı rəssam Yavər Rzayevin rəsm əsərlərindən ibarət "Könlüm keçir Qarabağdan" adlı sərginin açılışı olmuşdur. Üçgünlük sərgidə Azərbaycanın Qarabağ bölgəsinin əsrarəngiz təbiətini yağlı boyalarla təsvir edən tablolar nümayiş etdirilirdi.

Azərbaycan nümayəndə heyəti, həmçinin Montereyin mərkəzi parklarından birində Lənkəran və Monterey şəhərlərinin qardaşlıq münasibətləri şərəfinə əkilən ağac və lövhə ilə tanış olmuşdur. Şəhər Şurasının üzvü xanım Nənsi Selfric qeyd etmişdir ki, ağac böyüdükcə iki şəhərin insanları arasında münasibətlər də inkişaf edəcək və möhkəmlənəcəkdir.

Azərbaycan nümayəndə heyətinin Monterey şəhərinə səfəri və Yavər Rzayevin rəsm əsərlərindən ibarət sərgi Monterey yarımadasının ən böyük tirajlı "Monterey Herald" qəzeti tərəfindən işıqlandırılmışdır.

Şəfəq AKİFQIZI,

AzərTAc-ın xüsusi müxbiri

Vaşinqton

Azərbaycan.- 2011.-27 oktyabr.- S. 6.