Goranboyda dünyaya "pəncərə" açılıb

Ölkəmizdə ilk dəfə olaraq Goranboy rayonunda Kitabxana İnformasiya Mərkəzi və Uşaq İntellekt Mərkəzi yaradılıb. Beləliklə, müxtəlif ölkələrin aparıcı elm ocaqlarına "pəncərə" açılıb. İndi oxucu burada istədiyi vaxt dünyanın bir sıra guşələrindən məlumat ala bilir. Goranboy kitabxanasının fondu da hər yanda "görünür".

Rayonda mədəniyyət işi "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı"na uyğun olaraq yenidən qurulur. Bu da təbiidir. Çünki müstəqillik bərpa ediləndən sonra hər yerdə ictimai-iqtisadi münasibətlər tamamilə yeni forma alıb. Müasir kəndlər hərtərəfli inkişaf edir, yollar çəkilir, küçələr salınır, səkilər düzəldilir, bir-birindən yaraşıqlı fərdi evlər, ictimai binalar, özəl obyektlər tikilir. Təbii qaz, elektrik enerjisi, işıqlandırma sistemi kəndin məişətini tamamilə dəyişib. Yeni infrastrukturların hesabına müasir kənd tanınmaz olub. İnsanların davranış tərzi, səviyyəsi, mədəniyyəti yüksəlib. Bütün bunlara baxmayaraq, həmişə olduğu kimi, yenə də klublar, kitabxanalar, mədəniyyət evləri kənddə mədəniyyətin əsas mərkəzləri sayılır. Ona görə Goranboy rayonunda bu mühüm sahənin - kənd mədəniyyət ocaqlarının inkişafına xüsusən diqqət yetirilir.

Müstəqil dövlətimizin tələbi, məqsədi də məhz elə budur. Kitabxana-informasiya sahəsi üzrə Dövlət Proqramında yeni binaların tikilməsinə, mövcud obyektlərdə maddi-texniki bazasının möhkəmləndirilməsinə, onların kompyuter və informasiya proqramları ilə təminatına, xidmətin forma və məzmununun yeniləşdirilməsinə xüsusi diqqət yetirilməsi mühüm vəzifə kimi irəli sürülüb.

Goranboy rayonunda bu gərəkli vəzifənin icrası üçün xeyli işlər görülür. Bəri başdan deyək ki, bu yerlərdə əsasən abidələrin mühafizəsi, kurqanların tədqiqi, xalqın tarixinin araşdırılması sahəsində sistemli surətdə həyata keçirilən tədbirlər, qazanılan uğurlar diqqəti cəlb edir. Bununla yanaşı, Dövlət Proqramına uyğun olaraq kitabxanalarda, klub və mədəniyyət saraylarında işlərin müasir tələblər səviyyəsində qurulmasına xüsusi diqqət yetirilir.

Bu günlərdə mədəniyyət işçilərinin toplantısında bu barədə geniş söhbət açıldı. Mədəniyyət və turizm şöbəsinin müdiri Gündüz Hacıyev Dövlət Proqramının icrası ilə əlaqədar görülən işlər barədə ətraflı məlumat verdi. Tənqid və özünütənqid şəraitində yerlərdəki vəziyyət geniş təhlil olundu. Uğurlar qeyd edilməklə yanaşı, əsas diqqət mövcud qüsurların aradan qaldırılmasının, hər sahədə xidmətin müasir tələblər səviyyəsində qurulmasının vacibliyinə yönəldildi, konkret tapşırıqlar və tövsiyələr verildi.

Tədbirdən sonra Zeynallı kəndində yeni kitabxana binasının açılışı oldu. Balaca, yöndəmsiz bir butkada yerləşən bu mədəniyyət ocağı indi müasir avadanlıqla təchiz edilmiş işıqlı, yaraşıqlı otaqlara köçüb. Qaramusalı kəndində də daxili imkanlar hesabına kitabxana üçün münasib bina tikilib. İndi isə İrəvanlı və Rəhimli kəndlərində kitabxana binalarının inşasında qızğın iş gedir. Rayonun daha bir sıra yerlərində, mədəniyyət ocaqlarının görkəmi, eləcə də işin təşkili, xidmət mədəniyyəti dəyişilib. Goranboy və Dəliməmmədli şəhər, habelə Sarov kənd mədəniyyət evlərinin binaları təmir olunub. Hazırda Nərimanlı kənd klubunda, Xanqərvənd və Borsunlu kənd musiqi məktəblərində yenidənqurma işləri davam edir.

Son vaxtlarda rayonda başqa bir dəyərli təməl qoyulub. İşlərin daha maraqlı, məzmunlu təşkili üçün qəsəbə və kəndlərdə mədəniyyət ocaqlarının fəaliyyətini əlaqələndirən mərkəzlər yaradılır. Belə mərkəzlərdən biri Qızılhacılı qəsəbəsində fəaliyyət göstərir. Adı belədir: "Modern kitabxana və mədəniyyət mərkəzi". Əvvəllər qəsəbəyə pərakəndə və yöndəmsiz səpələnən obyektlər indi burada cəmlənib. Yeni mərkəz ikimərtəbəli, hər şəraiti olan böyük bir binada yerləşir. Həmin bina ulu öndər Heydər Əliyevin yadigarıdır. 1982-ci ildə ulu öndərin xeyir-duası ilə ucaldılıb. İndi burada kütləvi kitabxana, abonent şöbəsi, uşaq kitabxanası, kompyuter-internet mərkəzi hər cür şəraiti olan mədəniyyət evi fəaliyyət göstərir. Geniş foyenin bir hissəsində etnoqrafiya muzeyi yaradılıb.

Mədəniyyət mərkəzi Milli Qəhrəman Kazımağa Kərimovun adını daşıyır. Yaraşıqlı otaqlardan birində elin döyüş şücaətini əks etdirən xatirə-muzeyi düzəldilib. Milli Qəhrəmanın həyat yoldaşı Alidə Dosiyeva bədii rəhbər işləyir. Deyir ki, burada müntəzəm surətdə qəsəbədəki məktəblərin şagirdləri üçün görüşlər, ədəbi-bədii gecələr təşkil edir, intellektual yarışlar keçiririk. Gənc oğlan və qızların istedadlarının üzə çıxarılması və onların püxtələşməsi üçün maraqlı, məzmunlu tədbirlər görülür.

Maraqlı cəhətlərdən biri də budur ki, gənclərin arzusu nəzərə alınaraq atüstü milli oyunlar komandası yaradılıb. Qızılhacılının çaparları Şəkidə keçirilən milli atüstü oyunlar festivalında "Papaq" oyunu üzrə birinci yeri tutublar.

Rayonun digər mədəniyyət ocaqlarında da rəngarəng tədbirlər keçirilir. Gürzallar kənd mədəniyyət evində yaradılmış xalçaçı qızlar dərnəyinin fəaliyyəti xüsusi qeyd olunmalıdır. Cinli-Boluslu kənd mədəniyyət evi isə musiqi təbliğatı sahəsində fərqlənir. Burada müntəzəm olaraq açıq havada konsertlər verilir. İndi bu nəcib işə Safıkürdün, Xanqərvəndin və Dəliməmmədlinin mədəniyyət ocaqları da qoşulub.

Həmsöhbətim Gündüz Hacıyev bildirdi ki, "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı"nın icrası ilə əlaqədar olaraq hələ çox işlər görməliyik. Mədəniyyət işi insanların həyat tərzi, psixologiyası, zövqləri ilə bağlı məsələdir. Ona görə də biz həmişə əhalinin arzu və istəklərini öyrənməyə çalışırıq. Oxucular arasında aparılmış sorğulardan məlum olur ki, onlar daha çox tarixi, siyasi, bədii və didektiv mövzularda yazılmış ədəbiyyata üstünlük verirlər. Gənc oğlan və qızların bir hissəsi isə səhnə sənəti ilə maraqlanır, ifaçılığa meyil göstərirlər. Biz gündəlik fəaliyyətimizdə bu cəhətləri nəzərə almağa çalışırıq.

Əhalinin arzu və istəyinə uyğun daha səmərəli, daha dəyərli üsulların işlənib hazırlanması üçün təcrübəli mütəxəssislərdən, ağsaqqallardan ibarət məsləhət qrupu yaratmışıq. Onlar kitabxana-informasiya sisteminin daha da genişlənməsi, əhalidə mütaliəyə marağın yüksəldilməsi və hər yerdə xidmətin günün tələbləri səviyyəsinə qaldırılması üçün yeni-yeni üsullar tətbiq etməyə çalışırlar. Bir sözlə, mədəniyyət müasir kəndin sürətlə inkişaf edən səviyyəsi ilə ayaqlaşmalı, daha doğrusu, öndə getməlidir. Bizim əsas məqsədimiz bax, budur.

Əhməd İSAYEV

Azərbaycan.- 2011.- 3 sentyabr.- S. 4.