Məqsəd dünyada yaxşı nə varsa Azərbaycana gətirməkdir

Prezident İlham Əliyevin dünyada yaxşı nə varsa Azərbaycana gətirmək, doğma yurdu sözün həqiqi mənasında cənnətə döndərmək məqsədi daşıyan təsəbbüsü ilə şəhər və rayonların icra hakimiyyəti başçılarının dünyanın inkişaf etmiş ölkələrinə səfərlərinin təşkili artıq ənənə xarakteri almışdır. Bu yaxınlarda bir qrup icra hakimiyyəti başçısı Koreya Respublikasına səfərdən qayıtmışdır. Əməkdaşımız səfər iştirakçısı, Ağcabədi Rayon İcra Hakimiyyətinin başçısı Şahin Məmmədovla görüşüb onun səfər təəssüratlarını öyrənmişdir.

- Dövlət başçısı belə bir faydalı təşəbbüs irəli sürərkən həm də qarşıya ciddi tələb qoyur ki, dünyada yaxşı nə varsa çalışıb onu Azərbaycana gətirməliyik. Elə etməliyik ki, gördüyümüz abadlıq, quruculuq işləri tarixi ənənələri yaşatmaqla yanaşı, mənəvi dəyərlərimizi, milli memarlığımızı özündə əks etdirsin, göz oxşasın. Bunun üçün dünyanın inkişaf etmiş ölkələrinin qabaqcıl təcrübəsi vardır. Gedib görmək, yaxşı, gözəl nümunələri götürüb şəhərlərimizi, kəndlərimizi yenidən qurarkən onları yaradıcılıqla tətbiq etmək lazımdır.

Prezidentin təşəbbüsü ilə şəhər və rayonların icra hakimiyyəti başçıları dünyanın inkişaf etmiş ölkələrinə səfərlər edirlər. Belə səfərlər çərçivəsində bundan əvvəl İtaliyada və Fransada olmuşam. Hər iki dövlət Avropanın aparıcı ölkələrindəndir. Bu ölkələrdə maraqlı bir müşahidə apardım. Belə ki, diqqət çəkən möhtəşəm abadlıq-quruculuq işlərinin tarixi əsasən XX əsrə təsadüf edir. Son 20 ildə bu ölkələrdə aparılan tikinti, quruculuq işlərinin həcmini Azərbaycanda görülən işlərlə müqayisə etsək, xeyrimizə böyuk fərq yaranar.

Builki səfər isə Koreya Respublikasına idi. Culfa, Tərtər, Bərdə, Binəqədi, Nəsimi, Xəzər və Yasamal rayonları icra hakimiyyəti başçılarının qatıldığı bu səfər zamanı maraqlı görüşlərin iştirakçısı olduq. Qrupa rəhbərlik edən Prezident Administrasiyasi Regional idarəetmə və yerli özünu idarəetmə orqanları ilə iş şöbəsinin baş məsləhətçisi Tağı Tağıyevin yüksək təşkilatçılıq bacarığı səfərin uğurlu keçməsində az rol oynamadı. Bizim üçün diqqət çəkən, qürur doğuran əsas cəhət o idi ki, Azərbaycandan gəldiyimiz üçün bizi hər yerdə xüsusi hörmət və ehtiramla qarşılayırdılar. Belə bir isti münasibətin mayasında Azərbaycan və Koreya dostluğu dayanır. 2006-cı ilin mayında Koreya Respublikasının Prezidenti Roh Mu-Hyun Azərbaycana səfər etmişdir. Bir il sonra isə Azərbaycan Respublikasının Prezidenti İlham Əliyev Koreya Respublikasına rəsmi səfər etmiş, hər iki ölkə arasında qarşılıqlı dostluq və anlaşmanın etibarlı təməli qoyulmuşdur.

Koreyaya səfərimizin məqsədi məlum idi. Biz Asiya qitəsinin inkişaf etmiş bu ölkəsində diqqət çəkən yaxşı nümunələri öyrənməli, öz rayonumuzda onun tətbiqi imkanlarını müəyyənləşdirməliydik. Burada gördüklərimizə, müşahidələrimizə keçməzdən əvvəl qeyd edək ki, yüksək həyat səviyyəsi ilə tanınan bu ölkə Asiyada dördüncü ən güclü iqtisadiyyata malikdir və "Böyük 20-lər" qrupunun üzvüdür. Koreya Respublikası hazırda 188-dən çox ölkə ilə diplomatik əlaqə saxlayır. Bu ölkə yüksək inkişaf etmiş sənaye və iqtisadiyyata malikdir. Dünyada gəmiqayırma, polad emalı, avtomobil və elektrotexnika istehsalına görə əsas yerlərdən birini tutur. Paytaxt Seulda 10 milyon nəfərə yaxın əhalı yaşayır. Pusan, Tequ, İncxon, Tecon, Kvancu və Ulsan da ölkənin iri şəhərləri sırasındadır. Koreya Çin ilə Yaponiya arasında bir körpü olsa da, özünə xas milli mədəniyyətini inamla inkişaf etdirir. Əhalinin 85 faizi şəhərlərdə yaşayır. Ümumi əhalinin 62 faizi xidmət sahələrində çalışır.

Bu maraqlı ölkədə ən çox diqqət çəkən isə yaşıllıq sahələrinin kifayət qədər çox olmasıdır. Koreyada adambaşına 96-98 kvadratmetr yaşıllıq düşür. Bunun çoxu süni yolla salınmış meşələrdir. Ümumiyyətlə, orada boş torpaq sahəsi görmək qeyri-mümkündür. Ən kiçik sahədə belə nəsə əkib-becərirlər. Əhalinin ən çox istifadə etdiyi ərzaq isə tərəvəzdir. Ölkənin başdan-başa yaşıllaşdırılmasına bir hərəkat kimi ötən əsrin 60-cı illərindən başlanmışdır. Bu istiqamətdə həyata keçirilən genişmiqyaslı tədbirlərin ürəkaçan, gözoxşayan nəticəsi ölkə vətəndaşlarında qürur, qonaqlarda isə xoş duyğular oyadır. Burada yaşıllığa, gülə, çiçəyə o dərəcədə böyük maraq var ki, hətta elektrik dirəklərindən də dibçəklər asılıb. Yeri gəlmişkən qeyd edim ki, son illər Ağcabədidə yaşıllığa artan maraq yaxşıya doğru ciddi dəyişikliklərə səbəb olub. Park və xiyabanların, küçə və meydanların həmişəyaşıl ağacları, solmayan gülü-çiçəyi payızda, qışda da baharı xatırladır. İndi Ağcabədidə də elektrik dirəklərindən al-əlvan gül-çiçək dibçəkləri asılıb. Bu, küçə və meydanların, park və xiyabanların yaşıl fonunda çox gözəl görünür.

Səfər müddətində Asan, Boryeonq, Suvon, Seonqnam, Kvaçeon şəhərlərində və paytaxt Seulda olduq. Keçirilən çoxsaylı işgüzar görüşlər bizə çox şey verdi. Belə görüşlərdə biz qarşı tərəfə respublikamızın bütün bölgələrini əhatə edən sürətli, davamlı və genişmiqyaslı sosial-iqtisadi inkişafı, eyni zamanda Qarabağ problemi barədə məlumatlar verir, milli mədəniyyətimizi özündə əks etdirən suvenirlər hədiyyə edirdik. Dünyanın 70-dən artıq ölkəsinin tanınmış heykəltəraşlarının əsərləri toplanmış Qaehua parkı ilə tanışlıq zamanı burada Azərbaycanın istedadlı heykəltərası Ömər Eldarovun yaratdığı abidəni qürur hissi ilə seyr etdik.

Ölkəmizin Koreya Respublikasındakı səfirliyinin yüksək təşkilatçılıq bacarığının nəticəsi idi ki, müxtəlif şəhərlərdə keçirilən görüşlər bir-birini təkrarlamayan ayrı-ayrı maraqlı və aktual mövzulara həsr olunmuşdu. Seonqnam şəhərində keçirilən görüşdə "Səhərin yaşıllaşdırılması prinsipləri", Boryeonq şəhərindəki görüşdə "Şəhər xidmətlərinin məzmunu və təşkili, şəhərin inkişaf strategiyası", "Tarixi abidələrin qorunub saxlanması və onlardan istifadə qaydaları", Kvaçeon şəhərindəki görüşdə "Şəhərin su təminatı", "Gənclər mərkəzinin fəaliyyəti" mövzusunda müzakirələr öz aktuallığı ilə daha çox maraq doğurur və yadda qalırdı.

Koreya Respublikası dünyada sürətli iqtisadi inkişafı ilə seçilən ölkələrdəndir. Məşhur "Hyundai Motors" və "Samsung Elektronics" şirkətləri dövlət büdcəsinə çox böyük həcmdə vəsaitlər ödəyir. Ölkə turizmdən də yaxşı qazanc götürür.

Koreya Respublikası öz dövlət müstəqilliyini 1948-ci ildə elan etmişdir. Ötən əsrin 60-cı illərinin əvvəllərindən etibarən Koreya Respublikası yüksək texnologiyalı müasir dünya iqtisadiyyatına inteqrasiyada mükəmməl nəticələrə nail olmuşdur. Əgər 40 il bundan əvvəl Koreya adambaşına düşən ümumdaxili məhsulun həcminə görə Afrika və Asiyanın kasıb ölkələri ilə müqayisə edilirdisə, indi ölkədə adambaşına düşən ümumdaxili məhsul 26.600 ABŞ dolları təşkil edir.

Davamlı və sürətli sosial-iqtisadi inkişafına görə Koreya Respublikası ilə Azərbaycan arasında bir paralel də aparmaq mümkündür. Onların dövlət müstəqilliyinin 63 yaşı var. Biz isə müstəqilliyimizin 20 ilini qeyd edəcəyik. Qürur doğuran bir faktdır ki, Azərbaycan sürətli iqtisadi inkişafı ilə dünyanı heyran qoyur. İnkişaf edən, yenidən qurulub gözəlləşən isə təkcə Bakı deyil. Bu gün Bakı ilə bərabər bölgələr də sürətlə inkişaf edir, dəyişir, gözəlləşir. Respublika Prezidenti İlham Əliyevin təşəbbüsü ilə hazırlanıb qəbul edilən və müvəffəqiyyətlə həyata keçirilən regionların sosial-iqtisadi inkişafı dövlət proqramları həyatı gündən-günə gözəlləşən bölgə sakinlərinin hədsiz razılıq və minnətdarlığına səbəb olur.

Seçilən yol aydın, müəyyən edilən istiqamət doğrudur. Hər kəs birmənalı şəkildə inanır ki, etimad göstərib seçdiyi, dövlətin də, millətin də taleyini etibar etdiyi Prezident bizi daha işıqlı sabahlara qovuşduracaqdır. Bu yolla, bu sürətlə həyata davam etsək, dünyanın inkişaf etmiş ölkələri sırasına çıxmağımız tarixən ən qısa zamanda reallaşacaqdır. Bunu dövlət qayğısından güc alıb yeniləşən, gözəlləşən regionların müasir görkəmi və çox böyük sürətlə davam edən abadlıq, quruculuq işlərinin geniş miqyası da təsdiq edir. Dövlət başçısının qayğısından bəhrələnənlər sırasında Ağcabədi də var. Burada müasir tələblər səviyyəsində inşa olunan xəstəxanalar, məktəblər, mədəniyyət evləri, sosialyönümlü müxtəlif obyektlər, böyük istehsal gücünə malik zavodlar, uğurla həyata keçirilən infrastruktur layihələri xalqa ləyaqətlə xidmətin konkret nümunələridir. Cənab Prezident dəfələrlə bəyan edib ki, bizim siyasət sosialyönümlüdür. Ağcabədililər bu siyasətdən yetərincə bəhrələnirlər. Dövlət başçısının imzaladığı xüsusi sərəncamlarla Avropa standartlarına cavab verən xəstəxana tikilir, kənd yolları yenidən qurulur, əhalinin içməli su təminatı yaxşılaşır, yaşayış məntəqələrinə təbii qaz çəkilişi sürətlə davam etdirilir. Elektrik enerjisinin verilməsindəki fasilələr artıq çoxdan aradan qaldırılıb. İndi ilin bütün fəsillərində Ağcabədi yaşıl libasdadır. Ulu öndər Heydər Əliyevin adını daşıyan park ağcabədililərin ən sevimli istirahət guşəsinə çevrilmişdir. Hər həftənin şənbə və bazar günləri rayon mədəniyyət evinin musiqi kollektivləri burada maraqlı proqramlarla çıxış edirlər. Təvazökarlıqdan uzaq olsa da, deməliyəm ki, ulu öndərə ağcabədililərin sonsuz hörmət və ehtiramının ifadəsi kimi yenidən qurulmuş bu park öz gözəlliyi ilə Avropa şəhərlərindəki parklardan heç də geri qalmır. Açılışında Prezident İlham Əliyevin də iştirak etdiyi şahmat məktəbində sabahın çempionları yetişməkdədir. Məktəbin qarşısında həmişəyaşıl ağaclardan düzəldilmiş şahmat fiqurları öz orijinallığı ilə göz oxşayır. Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsü ilə araya-ərsəyə gələn Muğam Mərkəzi bütün bölgənin muğamsevərlərinə əvəzsiz töhfədir. Fərəhlə söhbət açılası, minnətdarlıqla dilə gətiriləsi uğurların siyahısı çox böyükdür. Bu siyahıda "Atena" Süd Zavodunun xüsusi yeri vardır. İndi bu zavodda 25 adda məhsul istehsal olunur. Ağcabədi markası ilə buraxılan bu məhsullara paytaxt sakinləri də böyük maraq göstərirlər.

Biz hər il dünyanın inkişaf etmiş ayrı-ayrı ölkələrinə ezam olunuruq. Əlbəttə, bu, turist səfərləri deyil. Hansı şəhərin, hansı bölgənin qonağı oluruqsa, gözümüz axtarır. Diqqət çəkən yaxşı nümunələri öyrənir, onların haqqında ətraflı məlumat toplayırıq. Məqsəd dövlət başçısının tapşırıqlarına uyğun olaraq dünyada yaxşı nə varsa Azərbaycana gətirməkdir. Hamımızın vətəni olan Azərbaycanı gözəlliklər diyarına çevirmək istəyi isə hər kəsə örnək olası əsl vətəndaş mövqeyidir.

Söhbəti yazdı: Lazım QULİYEV,

Azərbaycan.- 2011.- 6 sentyabr.- S. 5.