Dairə seçki komissiyalarının sədrlərinə seçki hüquqlarının konstitusion əsasları ə qanunvericilik mexanizmləri barədə ətraflı məlumat verilmişdir

Mərkəzi Seçki Komissiyasının (MSK) dairə seçki komissiyalarının (DSK) sədrləri üçün təsdiq etdiyi seçki hüququ üzrə ixtisaslaşdırılmış kursların dinləyiciləri sentyabrın 6-da Konstitusiya Məhkəməsində olmuşlar.

Konstitusiya Məhkəməsinin sədri Fərhad Abdullayev "Seçki hüququnun konstitusion əsasları və onun həyata keçirilməsinin qanunvericilik mexanizmləri" mövzusunda məruzə ilə çıxış etmişdir.

Dövlət müstəqilliyini bərpa etdikdən sonra Azərbaycanın keçdiyi inkişaf yolundan danışan F.Abdullayev ümummilli liderimiz Heydər Əliyevin təşəbbüsü və gərgin əməyi nəticəsində ölkəmizin hüquqi, siyasi və iqtisadi tərəqqisinin əsasını təşkil edən yeni Konstitusiyanın qəbul olunduğunu bildirmişdir. O demişdir ki, ana qanunun qəbulu ölkəmizdə insan hüquq və azadlıqlarının müdafiəsi, azad, ədalətli və şəffaf seçkilərin keçirilməsi üçün geniş imkanlar yaratmışdır.

Konstitusiya Məhkəməsinin sədri sonra insan hüquqları sahəsini tənzimləyən bir sıra beynəlxalq hüquqi aktların - İnsan Hüquqları haqqında Ümumi Bəyannamənin, Vətəndaş və siyasi hüquqlar haqqında Beynəlxalq Paktın, eləcə də İnsan hüquqlarının və əsas azadlıqlarının müdafiəsi haqqında Avropa Konvensiyasının 1 saylı protokolunun tələbləri barədə ətraflı məlumat vermişdir. Bildirilmişdir ki, bu sənədlərdə demokratiya və azad seçki anlayışlarının bir-birinə bağlılığı, hər bir vətəndaşın heç bir ayrı-seçkilik və əsassız məhdudiyyətlər olmadan ümumi və bərabər seçki hüququ əsasında gizli səsvermə yolu ilə keçirilən və seçicilərin iradəsinin sərbəst ifadəsini təmin edən seçkilərdə səs vermək, seçilmək hüququ və digər məsələlər əksini tapmışdır.

F.Abdullayev demişdir ki, insan hüquq və azadlıqlarının müdafiəsi müasir dünyanın aktual məsələlərindən biridir. Seçki prosesində məhkəmələrin iştirakı çox vacibdir. Məhkəmənin mövqeyi sonuncu mərhələdir. Təcrübə göstərir ki, seçki prosesində müəyyən problemlər ortaya çıxır. Bu problemlərin hamısı qanuni müstəvidə öz həllini tapır.

Konkret olaraq Konstitusiya Məhkəməsinin fəaliyyətindən söz açan natiq bildirmişdir ki, Konstitusiya Məhkəməsi seçkilərin nəticələrini yoxlayıb təsdiq edən orqandır. Konstitusiya Məhkəməsi indiyədək seçkilərlə bağlı 19 qərar qəbul etmişdir. Qərarlar qəbul edərkən müvafiq qurumlardan bütün sənədlər tələb olunur və onlar diqqətlə öyrənilir. DSK-nın protokollarında qanunsuzluqlar aşkar edilmirsə, həmin dairələr üzrə nəticələri təsdiq edirik.

Konstitusiya Məhkəməsinin sədri seçki hüququ ilə bağlı Avropa Məhkəməsində müxtəlif dövlətlərdən olan şikayətlər barədə də danışmışdır. Bildirmişdir ki, insanlar öz seçki hüquqlarının müdafiəsində israrlıdırlar. Ona görə də biz hamımız bu işlərdə daha ciddi, daha dəqiq olmalıyıq, qanunlara əməl etməliyik.

MSK sədrinin müavini Natiq Məmmədov, Konstitusiya Məhkəməsinin hakimi Ceyhun Qaracayev seçki sistemində həyata keçirilən islahatlarla bağlı iştirakçılara məlumat vermişlər.

Sonda Fərhad Abdullayev DSK sədrlərinin suallarını cavablandırmışdır.

AzərTAc

Azərbaycan.- 2011.- 7 sentyabr.- S. 2.