Yüksək döyüş hazırlığı ordumuzun əsas prioritetidir

Ordumuzun yarandığı ilk gündən onun sıralarında zabit kimi xidmətə başlamışam. Birinci qrup müharibə əliliyəm. Torpaqlarımızın müdafiəsi uğrunda gedən döyüşlərdə ağır yaralanmışam. Vətən qarşısında xidmətlərimi nəzərə alaraq 1998-ci ildə ümummilli lider Heydər Əliyevin sərəncamı ilə "Azərbaycan Bayrağı" ordeni ilə təltif olunmuşam. O vaxtlar ordumuzun həm maddi-texniki təminat, həm silah-sursat, həm də kadr sarıdan ciddi problemlərlə üz-üzə qaldığını çox yaxşı xatırlayıram.

Silahlı Qüvvələrimizdə ruh düşkünlüyü, xaos hökm sürürdü. Ancaq 1993-cü ildə xalqın təkidli tələbi ilə yenidən hakimiyyətə qayıdan ümummilli liderimiz Heydər Əliyev siyasi müdrikliyi və uzaqgörənliyi ilə bu problemlərə birdəfəlik son qoydu. Məhz onun həyata keçirdiyi dövlət siyasətinin ana xəttini ölkənin milli maraqlarından doğan strateji əhəmiyyətli məsələlərin həlli təşkil edirdi. Bu sırada əsas yeri işğalçı Ermənistan ordusunun silahlı təcavüzünə məruz qalmış bir respublikanın düşməndən müdafiə strategiyasının və ordu quruculuğu işinin elmi-praktiki əsaslar üzərində planlaşdırılaraq həyata keçirilməsi tuturdu. Ulu öndərimizin fəaliyyətə başladığı ilk dövrlərdən xalqa müraciət etməsi, hamını birləşməyə çağırması, ayrı-ayrı hərbi hissələrə tez-tez baş çəkməsi bütövlükdə ölkə ictimaiyyətinin mənəvi-psixoloji əhval-ruhiyyəsində, xüsusilə gənclərin hərbi vətənpərvərlik tərbiyəsində önəmli rol oynadı. Orduda vahid komandanlıq prinsipi bərpa olundu. Müdafiə və təhlükəsizlik məsələlərinin daim ön planda saxlanılması, ordu quruculuğunun qanunvericilik bazasının formalaşdırılması və kadr probleminin operativ həlli ölkədə hökm sürən xaos və anarxiyaya birdəfəlik son qoydu. Bütün bunların təbii nəticəsi kimi Silahlı Qüvvələrimizin davamlı müqavimətinə rast gələn düşmən 1993-cü il 10 dekabr tarixdə qoşunlarımızın əks-hücumu nəticəsində bütün cəbhə boyu xeyli itki verərək geri oturduldu.

Müharibə veteranı kimi inamla deyə bilərəm ki, ulu öndərimizin Silahlı Qüvvələr quruculuğu ilə bağlı həyata keçirdiyi davamlı strategiyanı Azərbaycan Prezidenti İlham Əliyevin uğurla davam etdirməsi ordumuzun yüksələn xətlə inkişafını təmin etmiş, xüsusilə döyüş hazırlığı sahəsində yeni keyfiyyət göstəricilərinin əldə olunması ilə nəticələnmişdir. Ordu quruculuğu işinin dövlət rəhbəri tərəfindən prioritet elan olunması, müdafiə xərclərinin ilbəil artırılması, Silahlı Qüvvələrin maddi-texniki bazasının gücləndirilməsi, hərbi qulluqçuların sosial müdafiəsi sahəsində günün tələblərinə cavab verən davamlı tədbirlərin həyata keçirilməsi əhəmiyyətli rol oynamışdır. Bu gün ordumuzun müxtəlif hərbi şəhərciklərində aparılan və başa çatdırılan tikinti, yenidənqurma işləri də Silahlı Qüvvələrimizin hazırkı durumunu səciyyələndirən əsas amillərdəndir. Sevindirici haldır ki, şəxsi heyətin istifadəsinə verilən onlarla əsgər kazarma və yataqxanası, yeməkxana, yaşayış və qərargah binaları, o cümlədən tibb müəssisələri müasir Avropa standartlarına cavab verən avadanlıqlarla təmin olunmuşdur.

Bununla belə, peşəkar bir zabit kimi deyə bilərəm ki, Silahlı Qüvvələrimizin əsas inkişaf prioritetini müəyyənləşdirən ən ümdə cəhət döyüş hazırlığıdır. 2010-cu il aprelin 23-də Müdafiə Nazirliyində ordu quruculuğu məsələlərinə həsr olunan müşavirədə çıxışı zamanı Azərbaycan Prezidenti, Ali Baş Komandan İlham Əliyev bu mühüm və vacib məsələyə toxunaraq demişdir: "Sirr deyil ki, Azərbaycan başqa sahələri inkişaf etdirdiyi kimi, hərbi sahəyə də böyük diqqət göstərir. Bu bizim təbii yanaşmamızdır. Çünki Azərbaycan müharibə şəraitindədir. Müharibə bitməyib, müharibənin birinci mərhələsi başa çatıbdır. Biz elə etməliyik ki, istənilən anda torpaqlarımızı hərbi yolla azad edə bilək".

Həmin müşavirədə ordunun hazırkı durumu ilə bağlı Ali Baş Komandana məlumat verən müdafiə naziri, general-polkovnik Səfər Əbiyev də bir daha vurğulamışdır ki, Azərbaycanın müasir ordusunun, vahid komandanlığa tabe olan Silahlı Qüvvələrinin yaradılması və inkişaf etdirilməsi ümummilli liderimiz Heydər Əliyevin adı ilə bağlıdır. Nazir həmçinin bildirmişdir ki, Silahlı Qüvvələrin inkişafı və təkmilləşdirilməsi istiqamətində yeni keyfiyyət göstəricilərinə nail olunmuş, birinci əməliyyat eşelonu birliklərində dayanıqlı müdafiə təmin edilmiş, müdafiə sistemi təkmilləşdirilmiş, qoşunların döyüş qabiliyyəti yüksək səviyyədə saxlanılmışdır. Təsadüfi deyil ki, Azərbaycan Silahlı Qüvvələrinin 92-ci ildönümü münasibətilə Müdafiə Nazirliyinin, Dövlət Sərhəd Xidmətinin və Daxili İşlər Nazirliyi Daxili Qoşunlarının birləşmə və hissələrinin irimiqyaslı birgə əməliyyat-taktiki təlimində də hərbi qulluqçularımız qarşıya qoyulan döyüş tapşırıqlarını uğurla yerinə yetirmişlər. Bu təlimi izləyən Prezident İlham Əliyev Silahlı Qüvvələrimizin nümayiş etdirdiyi peşəkarlıqdan və əldə etdiyi yüksək nəticələrdən məmnun qaldığını bildirmişdir.

Silahlı Qüvvələrimizin yüksək döyüş hazırlığına yiyələnməsində rol oynayan əsas amillərdən biri də şəxsi heyətin mənəvi-psixoloji hazırlığıdır. Son illər müvafiq sahədə də ciddi irəliləyişlər əldə olunmuşdur. Hərbi qulluqçularımızın döyüş tapşırığını yerinə yetirərkən göstərdikləri fərdi qəhrəmanlıq nümunələri dediklərimizə əyani sübutdur. Ölkə ictimaiyyəti Azərbaycanın Milli Qəhrəmanı Mübariz İbrahimovun, Fərid Əhmədovun, Əhməd Abdullayevin simasında bir daha bunun şahidi oldu. Bu gün ordumuzun sıralarında Mübariz İbrahimov kimi yüksək döyüş hazırlığına yiyələnmiş, Vətəninə və xalqına bağlı minlərlə hərbi qulluqçu xidmət edir. Biz Qarabağ müharibəsi veteranları və əlilləri dövlət başçısının milli maraqlarımızın təmin olunması istiqamətində, xüsusilə ordu quruculuğu sahəsində həyata keçirdiyi siyasəti dəstəkləyir, yüksək qiymətləndirir və hər an Vətəni müdafiə etməyə hazır olduğumuzu bildiririk. Bu gün Cənubi Qafqazın ən mobil və inkişaf etmiş ordusu kimi tanınan Azərbaycan Silahlı Qüvvələrində xidmət etmək hər bir gənc üçün şərəfdir.

Nizami HEYDƏROV,

1-ci qrup Qarabağ müharibəsi

əlili, ehtiyatda olan zabit

Azərbaycan.-2011.-8 sentyabr.-S.7.