Azərbaycan hökuməti ilə Rusiya Federasiyasının Həştərxan vilayəti arasında saziş imzalanmışdır

Azərbaycan Respublikasının Baş naziri Artur Rasizadə sentyabrın 8-də Bakıda səfərdə olan Rusiya Federasiyasının Həştərxan vilayətinin qubernatoru Aleksandr Jilkinin başçılıq etdiyi nümayəndə heyəti ilə görüşmüşdür. Azərbaycanın Baş naziri əvvəlcə Rusiyanın Yaroslavl şəhərində baş vermiş təyyarə qəzası zamanı həlak olanların xatirəsini yad edərək başsağlığı vermişdir.

Azərbaycan ilə Həştərxan arasında əlaqələrin dərin tarixi köklərə malik olduğunu deyən A.Rasizadə qarşılıqlı münasibətlərin uzun əsrlər boyu inkişaf etdiyini diqqətə çatdırmışdır. Baş nazir bildirmişdir ki, belə səfərlər tərəflər arasında iqtisadi, mədəni, turizm əlaqələrinin genişlənməsinə təkan verir.

Azərbaycanda siyasi və iqtisadi sabitliyin hökm sürdüyünü vurğulayan A.Rasizadə bunun əyani sübutu olaraq ölkənin 2008-2009-cu illərdə dünya maliyyə böhranından itkisiz çıxdığını göstərmişdir.

İqtisadi uğurlar barədə məlumat verən Baş nazir demişdir ki, Azərbaycan indi neft-qazdan asılı ölkə deyildir. Azərbaycan rəhbərliyi son illərdə qeyri-neft sektorunun, o cümlədən kənd təsərrüfatının inkişafına xüsusi diqqət göstərir. Azərbaycan kənd təsərrüfatı məhsullarını idxal edən ölkədən ixrac edən ölkəyə çevrilmişdir. Ölkədə, həmçinin böyük infrastruktur layihələri reallaşdırılır, yerli və beynəlxalq əhəmiyyətli yollar çəklilir, təhsil, mədəniyyət, səhiyyə, idman obyektləri tikilir. Təkcə son 5 ildə respublika ərazisində 2300-ə yaxın məktəb binası tikilmiş və təmir olunmuşdur.

Ermənistan-Azərbaycan, Dağlıq Qarabağ probleminə toxunan Baş nazir A.Rasizadə bu münaqişənin hələ də öz həllini tapmadığından narahatlığını ifadə etmişdir. Ermənistanın Azərbaycana qarşı hərbi təcavüzü nəticəsində ölkə ərazisinin 20 faizi işğal olunmuş, 1 milyon vətəndaşımız yurdundan didərgin düşmüşdür. Azərbaycanın heç vaxt torpaqlarının işğalı faktı ilə barışmayacağını deyən A.Rasizadə zəbt olunmuş ərazilərin mütləq azad ediləcəyinə əminliyini bildirmişdir.

Baş nazir Həştərxan şəhərində ümummilli lider Heydər Əliyevin xatirəsinin əbədiləşdirilməsinə və abidəsinin ucaldılmasına görə qubernator A.Jilkinə dərin təşəkkürünü bildirmişdir.

Aleksandr Jilkin Azərbaycan ilə Həştərxan vilayəti arasındakı mövcud münasibətlərin real potensialı əks etdirmədiyini demişdir. O, rəhbərlik etdiyi vilayətdə Azərbaycandan gələn iş adamları üçün hər bir şəraitin yaradıldığını vurğulamışdır. Həmçinin Azərbaycandan idxal edilən kənd təsərrüfatı məhsullarına tələbatın böyük olduğunu da bildirmişdir.

Rusiyanın Dağlıq Qarabağ münaqişəsinin sülh yolu ilə həllinin tərəfdarı olduğunu vurğulayan qubernator ədalətsizliyə tezliklə son qoyulacağını demişdir.

Rusiyanın Həştərxan vilayətində də neft-qaz hasilatının inkişaf etdiyini deyən qubernator bu sahədə kadr çatışmazlığı probleminin olduğunu söyləmişdir. Belə kadrların yetişdirilməsi üçün vilayətdə müvafiq təhsil bazasının olmadığını bildirən A.Jilkin bu sahədə Azərbaycanın köməyinə ehtiyac duyduqlarını qeyd etmişdir.

Həştərxan vilayətinin qubernatoru mədəniyyət sahəsində reallaşan tədbirlərin artdığından, habelə Həştərxandakı Azərbaycan diasporunun fəaliyyətindən məmnunluğunu bildirmişdir. Diqqətə çatdırılmışdır ki, Həştərxanda Azərbaycan diasporunun 20 minədək üzvü vardır.

Görüşün sonunda "Azərbaycan Respublikası ilə Həştərxan vilayətinin hökuməti (Rusiya Federasiyası) arasında ticari-iqtisadi, elmi-texniki və mədəni sahələrdə əməkdaşlıq barədə" saziş imzalanmışdır. Sənədi Azərbaycan hökuməti tərəfindən Baş nazirin birinci müavini Yaqub Eyyubov, qarşı tərəfdən isə Həştərxan vilayətinin qubernatoru Aleksandr Jilkin imzalamışlar.

AzərTAc

Azərbaycan.-2011.-9 sentyabr.-S.4.