Azərbaycan ilə Çexiya arasında kitabxanaçılıq və muzey işi sahəsində əməkdaşlıq daha da genişləndiriləcəkdir

Sentyabrın 14-də mədəniyyət və turizm naziri Əbülfəs Qarayev ölkəmizdə səfərdə olan Çexiya Milli Kitabxanasının direktoru Tomaş Bem və bu ölkənin milli muzeyinin direktoru Mixal Lukeşlə görüşmüşdür.

Belə görüşlərin Azərbaycan-Çexiya ikitərəfli əməkdaşlığının genişlənməsinə xidmət etdiyini vurğulayan Ə.Qarayev bildirmişdir ki, qarşılıqlı səfərlər ölkələrimiz arasında dostluq münasibətlərinin inkişafında mühüm əhəmiyyət daşıyır.

Əbülfəs Qarayev Ümumdünya Mədəniyyətlərarası Dialoq Forumu çərçivəsində Çexiyanın mədəniyyət naziri ilə Bakıda keçirdiyi görüşü xatırlatmışdır. Bildirmişdir ki, məhz həmin görüşdə kitabxana və muzey sahəsində əməkdaşlığa başlamaq qərarı verilmişdir. Kitabxana sahəsindəki problemlərdən, gənc nəslin bu sahəyə cəlb edilməsinin vacibliyindən söz açan nazir kitabxana işçiləri üçün Azərbaycanda təşkil edilmiş xüsusi kurs və treninqlərin əhəmiyyətindən danışmışdır.

Son illərdə Azərbaycanda turizmin inkişafına xüsusi diqqət yetirildiyini diqqətə çatdıran Ə.Qarayev bildirmişdir ki, teatr binaları, mədəniyyət ocaqları, tarixi abidələr yenidən bərpa edilir və ölkəmizin turizm potensialı daha da möhkəmləndirilir. Görülən işlərin nəticəsində cari ildə Azərbaycan bir çox mühüm beynəlxalq tədbirlərə ev sahibliyi etmişdir.

Dostluq münasibətlərinin möhkəmləndirilməsinə xidmət edən bütün təşəbbüsləri dəstəklədiklərini bildirən qonaqlar vurğulamışlar ki, ölkələrimiz arasında qarşılıqlı əlaqələr bundan sonra daha da genişlənəcəkdir.

Görüş zamanı mütəxəssislərin təcrübə mübadiləsi keçməsi üçün bu sahədə qarşılıqlı əməkdaşlığın davam etdirilməsi, hər iki ölkədə sərgilərin təşkili və növbəti mərhələdə Azərbaycan nümayəndə heyətinin Çexiyaya səfəri müzakirə olunmuşdur.

Sonda tərəflər bir-birilərinə xatirə hədiyyələri təqdim etmişlər.

AzərTAc

Azərbaycan.-2011.-15 sentyabr.-S.3.