Çexiya Milli Kitabxanasının direktoru AMEA-nın Mərkəzi Elmi Kitabxanasında olmuşdur

Ölkəmizdə səfərdə olan Çexiya Milli Kitabxanasının direktoru Tomaş Bem sentyabrın 14-də Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) olmuşdur.

AzərTAc xəbər verir ki, MEK-in direktoru, filologiya elmləri doktoru Aybəniz Əliyeva-Kəngərli kitabxananın yaranması, informasiya cəmiyyəti şəraitində fəaliyyətinin inkişafı haqqında qonağa geniş məlumat vermişdir. O, beynəlxalq kitab mübadiləsinin təşkili və inkişafı sahəsində görülən işləri qeyd etmişdir. Ölkəmizdə elmə, mədəniyyətə, kitabxana işinə diqqət və qayğı xüsusi vurğulanmışdır.

Bildirilmişdir ki, hazırda kitabxana 73 dövlətin 1000-ə yaxın qurumu, o cümlədən Çexiya Respublikasının 11 təşkilatı ilə əlaqə saxlayır. Bu əməkdaşlıq çərçivəsində AMEA-nın alim və mütəxəssisləri Çexiyanın elmi tərəqqisi, nailiyyətləri ilə müntəzəm tanış olur, alınan ədəbiyyatdan öz elmi tədqiqatlarında səmərəli istifadə edirlər.

Görüşdə AMEA MEK ilə Çexiya Milli Kitabxanası arasında qarşılıqlı əməkdaşlığın genişləndirilməsi və inkişafı məsələləri müzakirə edilmişdir.

T.Bem kitabxana tərəfindən hazırlanmış, Azərbaycan-Çexiya elmi-mədəni əməkdaşlığına həsr olunmuş ədəbiyyat sərgisini və ölkələrimizin müxtəlif sahələrdə əlaqələrini əks etdirən slaydı maraqla izləmişdir.

Çexiyalı qonaq kitabxananı gəzmiş, şöbələrin, qiraət zallarının fəaliyyəti, MEK-in 2013-cü ildə istifadəyə veriləcək yeni binasının layihəsi ilə tanış olmuşdur.

Səmimi görüş üçün kitabxananın rəhbərliyinə və kollektivinə minnətdarlığını bildirən T.Bem bu cür görüşlərin tez-tez keçirilməsinin vacibliyini vurğulamış, gələcəkdə ikitərəfli əməkdaşlığın daha da inkişaf etdirilməsinə tərəfdar olduğunu bildirmişdir.

Azərbaycan.-2011.-15 sentyabr.-S.3.