Bakı modern quruculuğun, tərəqqi və yüksəlişin simvoludur

Müasir Azərbaycan-20

«Azərbaycan» qəzetinin Nəsimi Rayon İcra Hakimiyyəti ilə birgə təşkil etdiyi «dəyirmi masa»

Bu il Azərbaycanın dövlət müstəqilliyinin bərpasının 20-ci ildönümü tamam olur. Azərbaycan Respublikasının Prezidenti İlham Əliyevin "Azərbaycan Respublikasının dövlət müstəqilliyinin bərpasının iyirminci ildönümü haqqında" 21 yanvar 2011-ci il tarixli sərəncamına əsasən dövlət müstəqilliyimizin bərpası təntənəli şəkildə qeyd olunacaq. Artıq bununla bağlı Tədbirlər Planı təsdiq edilib. Ölkə daxilində və xaricində bir sıra tədbirlərin keçirilməsinə başlanılıb.

XX əsrin sonlarına doğru ikinci dəfə öz istiqlalına qovuşmuş Azərbaycan xalqı üçün dövlət müstəqilliyinin bərpası tarixi nailiyyətdir. Elə buna görə də ulu öndər Heydər Əliyev Azərbaycanın istiqlalını xalqımızın iftixarı və qürur mənbəyi adlandırmışdı. Müstəqillik həm də bizim üçün ona görə qiymətlidir ki, Azərbaycan digər dövlətlər kimi azadlığını asanlıqla əldə etməyib. 1991-ci ildə sovet imperiyasının süquta uğraması nəticəsində digər müttəfiq respublikalar kimi Azərbaycan da özünün dövlət müstəqilliyinə nail oldu. Amma digər ölkələrdən fərqli olaraq respublikamızı bu müstəqilliyə, azadlığa aparan yollar hamar olmadı, qanlar töküldü, şəhidlər verildi.

Müstəqilliyin ilk illəri də xalqımız üçün narahat keçdi. Yalnız xalqımızın dahi oğlu Heydər Əliyevin hakimiyyətə qayıdışı ilə başımızın üstünü alan təhlükələr dəf edildi. Sərəncamda bu barədə deyilir: "Müstəqilliyimizin ilk illərindəki hərc-mərclik və xalqımızın maraqlarına zidd siyasət, iqtisadiyyatın zəiflədilməsi və milli sərvətlərin talan edilməsi dərin siyasi və iqtisadi-sosial böhranla nəticələndi. 1993-cü ilin iyun ayından ölkədə formalaşmağa başlayan yeni siyasi kurs vətəndaş müharibəsi təhlükəsini aradan qaldırdı, separatçılıq meyillərinə son qoydu və Heydər Əliyevin dövlət quruculuğu siyasətinin gerçəkləşməsinə gətirib çıxardı".

Heydər Əliyevin sayəsində Azərbaycanın dövlət müstəqilliyinin əbədiliyi təmin olundu. Bu gün isə Prezident İlham Əliyevin həyata keçirdiyi uğurlu siyasət nəticəsində müstəqilliyimiz daha da möhkəmlənir və güclənir. Azərbaycan bir çox dövlətlərdən fərqli olaraq sözün əsl mənasında tam müstəqildir.

"Azərbaycan" qəzetinin Nəsimi Rayon İcra Hakimiyyəti ilə birgə keçirdiyi "dəyirmi masa" da Azərbaycanın dövlət müstəqilliyinin 20-ci ildönümünə və Nəsimi rayonunun keçdiyi inkişaf yoluna həsr olunub.

"Dəyirmi masa"nı "Azərbaycan" qəzetinin baş redaktoru, Milli Məclisin deputatı Bəxtiyar SADIQOV açdı:

- Hörmətli "dəyirmi masa" iştirakçıları!

Tale elə gətirib ki, Azərbaycan bir əsrdə iki dəfə müstəqillik əldə etmək, özünün suveren dövlətini yaratmaq imkanı qazanıb. Təəssüf ki, ilk imkan xarici müdaxilə, daxili çəkişmələr və beynəlxalq təminatın olmaması səbəblərindən itirildi. 1918-ci ildə qurulmuş Azərbaycan Xalq Cümhuriyyəti cəmi 23 ay yaşadı.

İkinci tarixi imkan bir də 70 il sonra yarandı. Sovet imperiyasının dağılması Azərbaycan xalqına milli müstəqilliyini bərpa etmək imkanı verdi. 1991-ci il oktyabrın 18-də Azərbaycan Respublikası Ali Sovetinin sessiyasında "Azərbaycan Respublikasının dövlət müstəqilliyi haqqında Konstitusiya Aktı" qəbul olundu. Bu mühüm tarixi sənədlə xalqımız uzun illərdən bəri həsrətində olduğu azadlığına qovuşdu. Bununla da Azərbaycanın tarixində yeni dövrün başlanğıcı qoyuldu.

Lakin dövlət müstəqilliyini sözün əsl mənasında əldə etmək üçün sadəcə olaraq Konstitusiya Aktının qəbulu yetərli sayıla bilməzdi. Bu mənada 1991-ci ilin oktyabrından sonrakı proseslər göstərirdi ki, müstəqilliyi qoruyub saxlamaq, möhkəmləndirmək onu qazanmaqdan qat-qat çətindir. Belə ki, sənədin qəbul olunmasına baxmayaraq A.Mütəllibov iqtidarı yenə də Moskvanın idarəçiliyinə üstünlük verir, Kremlin diktəsi ilə fəaliyyət göstərirdi. Bu ondan irəli gəlirdi ki, o dövrdə Azərbaycana rəhbərliyi həyata keçirən şəxslər müstəqillik aktına xalqın təzyiqi nəticəsində, məcburiyyət qarşısında tərəfdar olmuşdular. Və sənəddən irəli gələn vəzifələri yerinə yetirmək qabiliyyətində və həvəsində olmadıqlarına görə Konstitusiya Aktı yalnız quru kağız parçası sayılır, sırf formal səciyyə daşıyırdı. Vaxt ötsə də, bu statusun möhkəmlənməsi üçün növbəti vacib siyasi addımlar atılmırdı. A.Mütəllibov hakimiyyəti 1991-ci ilin avqust hadisələrinə özünün münasibəti ilə də əslində müstəqillik ideyalarına sadiq olmadığını nümayiş etdirmişdi.

1992-ci ildə hakimiyyəti zor gücü ilə ələ alan AXC-Müsavat cütlüyü də səriştəsiz siyasəti sayəsində dövlət müstəqilliyinin möhkəmləndirilməsi üçün heç bir iş görmədi. Bu iqtidar da özündən əvvəlki rəhbərlik kimi Azərbaycanın öz istiqlalına çox mürəkkəb siyasi-tarixi şəraitdə nail olduğunu və hər an bu müstəqilliyin itirilə biləcəyini dərk edə bilmirdi. Yarıtmaz siyasət, ölkə rəhbərliyində təmsil olunan şəxslərin dövlət idarəsindəki kobud səhvləri, ordu quruculuğunun düzgün aparılmaması və Ermənistan silahlı qüvvələrinin hərbi təcavüzünün genişlənməsi, daxildə hökm sürən siyasi çəkişmələr, separatçılığın alovlanması hələ kövrək günlərini yaşayan dövlət müstəqilliyinin itirilməsi təhlükəsini reallaşdırırdı.

Belə bir ağır və mürəkkəb dövrdə xalqın təkidli tələbi ilə böyük siyasi təcrübəyə malik Heydər Əliyevin ölkə rəhbərliyinə qayıdışı Azərbaycanın dövlət müstəqilliyinin qorunub saxlanmasına və möhkəmləndirilməsinə xidmət edən başlıca amil oldu. Xalqımızın dahi oğlunun ölkədə hakimiyyətə dönüşü ilə respublikamızın 1920-ci ildəki aqibətinin təkrarlanması təhlükəsi sovuşduruldu.

1993-cü ilin iyununda parlamentin sədri, oktyabrda isə Prezident seçilən Heydər Əliyev tezliklə ölkədə yaranmış siyasi böhranın və hakimiyyət boşluğunun aradan qaldırılmasına nail oldu. Hərc-mərclik, özbaşınalıq hallarına, zorakılıq, silah işlətmək yolu ilə hakimiyyətə gəlmək praktikasına birdəfəlik son qoyuldu, ictimai-siyasi sabitlik bərqərar edildi.

Heydər Əliyev ölkəmizi təhlükə və çətinliklərdən qurtararaq ardıcıl inkişaf yoluna çıxardı. Ulu öndərin respublikaya rəhbərlik etdiyi dövr ərzində dövlət idarəçiliyi mexanizmi yaradıldı, nizami ordu quruldu, genişmiqyaslı siyasi, hüquqi, iqtisadi, sosial və mədəni islahatlar həyata keçirildi. İqtisadiyyatın dinamik inkişafı təmin edildi, ölkəmiz üçün böyük əhəmiyyət kəsb edən yeni neft strategiyası hazırlanaraq uğurla gerçəkləşdirilməyə başlanıldı. Nəticə etibarilə Azərbaycanda hüquqi, demokratik və dünyəvi dövlət quruldu, vətəndaş cəmiyyətinin bərqərar edilməsi istiqamətində ciddi addımlar atıldı. Dövlətimiz dünya birliyində layiqli yerini tutdu, bölgədə geosiyasi mövqelərini möhkəmləndirərək böyük beynəlxalq nüfuz qazandı. Xalqımızın milli birliyi və həmrəyliyi təmin edildi.

Beləliklə, Azərbaycan Respublikasının dövlət müstəqilliyi haqqında Konstitusiya Aktında nəzərdə tutulan bütün müddəalar məhz Heydər Əliyevin müdrik və uzaqgörən siyasəti sayəsində real həyata vəsiqə aldı, xalqımız çoxdan arzusunda olduğu əsl müstəqilliyinə qovuşdu.

Bir məsələni də xüsusi qeyd etməyə ehtiyac var. Azərbaycan Respublikasının dövlət müstəqilliyi haqqında Konstitusiya Aktının 32-ci maddəsində göstərilir ki, bu Konstitusiya Aktı ölkəmizin yeni Konstitusiyasının hazırlanması üçün əsasdır. Məlum olduğu kimi, 1991-1993-cü illərdə hakimiyyətdə olanlar bu barədə düşünmək belə istəməmişdilər. Ölkəmizin yeni Konstitusiyası da məhz ulu öndər Heydər Əliyevin hakimiyyətə qayıdışından sonra hazırlandı. Ulu öndərin rəhbərliyi ilə hazırlanaraq qəbul olunmuş müstəqil Azərbaycan Respublikasının ilk Konstitusiyası ölkəmizdə müasir dövlətçilik sisteminin bərqərar edilməsi üçün möhkəm hüquqi baza yaratdı.

Heydər Əliyev ölkəmizin müstəqilliyi barədə deyirdi: "Azərbaycanın dövlət müstəqilliyi əbədi olacaqdır, sarsılmaz olacaqdır, dönməz olacaqdır və Azərbaycanın bugünkü gənc nəsli gələcək Azərbaycanı daha da yüksəklərə qaldıracaqdır". Zaman, ötən illər ümummilli liderin bu sözlərinin real həyatda öz təsdiqini tapdığını sübut edir. Ulu öndərin layiqli siyasi varisi, ölkə Prezidenti cənab İlham Əliyevin uğurlu siyasəti nəticəsində müstəqilliyimizin siyasi və iqtisadi sütunları daha da möhkəmlənib.

Azərbaycan bu gün həm siyasi, həm də iqtisadi cəhətdən dünyanın qüdrətli dövlətlərindən birinə çevrilib. İqtisadi artım tempinə görə ölkəmiz nəinki regionda, həm də dünyada lider mövqeyə çatıb. Regionda heç bir irimiqyaslı layihə Azərbaycanın iştirakı və razılığı olmadan həyata keçirilə bilməz. Bütün bunlar təbii ki, Heydər Əliyevin ideyalarının yaşamasının, Prezident İlham Əliyev tərəfindən müstəqilliyimizin, dövlətçiliyimizin qüdrətlənməsinə hesablanmış əməli siyasi fəaliyyətin nəticəsidir.

Azərbaycanın dövlət müstəqilliyinin bərpasının 20-ci ili tamam olur. Prezident İlham Əliyevin 21 yanvar 2011-ci il tarixli "Azərbaycan Respublikasının dövlət müstəqilliyinin bərpasının iyirminci ildönümü haqqında" sərəncamına əsasən müstəqilliyimizin bərpasının iyirminci ildönümü ölkəmizdə dövlət səviyyəsində təntənəli surətdə qeyd olunacaq. Artıq bununla bağlı Tədbirlər Planı da təsdiq edilib, ölkəmizdə və eləcə də xarici dövlətlərdə tədbirlərin keçirilməsinə start verilib.

Prezident İlham Əliyevin sərəncamı ilə müstəqilliyimizin bərpasının 20-ci ildönümünün bu cür yüksək səviyyədə qeyd olunması ölkə rəhbərliyinin müstəqilliyimizə, şanlı tariximizə, milli-mənəvi dəyərlərimizə olan yüksək ehtiramının, həssas münasibətinin göstəricisidir. Sərəncamda yer alan "İyirmi illik inkişaf yolumuzun ən parlaq nəticəsi ondan ibarətdir ki, bu gün Azərbaycan, sözün əsl mənasında, artıq tam müstəqil ölkədir. Ölkəmizdə gerçəkləşdirilən siyasət daim Azərbaycan xalqının maraqlarına xidmət göstərir" fikri qəlbi vətən eşqi ilə döyünən hər bir azərbaycanlının ürəyindən xəbər verir.

"Azərbaycan" qəzetinin dövlət müstəqilliyimizin bərpasının 20-ci ildönümünə həsr olunmuş növbəti səyyar "dəyirmi masa"sı Bakının Nəsimi rayonunda keçirilir. Nəsimi rayonu paytaxtın iri rayonlarından biridir. Son illərdə Bakıda həyata keçirilən böyük miqyaslı tikinti, abadlıq və quruculuq işləri Nəsimi rayonunda da geniş vüsət alıb. Ölkəmizin və Bakının dinamik inkişafı bu rayonun da həyatında yaxından hiss edilməkdədir. Bu "dəyirmi masa"da Nəsimi rayonunun keçdiyi sosial-iqtisadi inkişaf yoluna nəzər salınacaqdır.

İndi isə çıxış etmək üçün söz Nəsimi Rayon İcra Hakimiyyətinin başçısı Nəsib MƏHƏMƏLİYEVə verilir:

Nəsib MƏHƏMƏLİYEV:

- Hamımıza məlum olduğu kimi, yaxın günlərdə xalqımızın həyatında əlamətdar tarixi hadisənin - Azərbaycanın dövlət müstəqilliyinin bərpa edilməsinin 20 ili tamam olur. Bununla əlaqədar respublikamızın hər yerində, eləcə də ölkəmizin hüdudlarından kənarda müxtəlif tədbirlər keçirilir, dünyanın harasında yaşamasından asılı olmayaraq bütün azərbaycanlılar bu hadisəni böyük qürur hissi ilə qeyd edirlər. Belə mötəbər tədbirlərdən biri də bu gün "Azərbaycan" qəzetinin təşəbbüsü ilə Nəsimi rayonunda keçirilir. Bu tədbirin Nəsimi rayonunda keçirilməsinin təşəbbüskarı olduğuna görə mən "Azərbaycan" qəzetinin kollektivinə dərin minnətdarlığımı bildirirəm.

Tarixi həqiqətdir ki, hər bir millət üçün dövlət müstəqilliyini əldə etmək onun həyatında ən önəmli bir hadisədir. Azərbaycan xalqı da öz müstəqilliyini əldə etmək üçün zaman-zaman mübarizə aparmış, bu yolda böyük qurbanlar vermişdir. Xalqımız hələ 1918-ci ildə müsəlman Şərqinin ilk demokratik respublikasını - Azərbaycan Xalq Cümhuriyyətini yaratmışdır. Lakin təəssüf ki, bir sıra obyektiv səbəblər üzündən cümhuriyyət cəmi 23 ay müddətində mövcud olmuşdur. Qısa müddət yaşamasına baxmayaraq, həmin respublika bir çox önəmli işlər görmüş, dövlət quruculuğu sahəsində mühüm tədbirlər həyata keçirə bilmişdir.

Sonrakı 70 ili Azərbaycan keçmiş Sovetlər İttifaqının tərkibində olmuş, bu dövrdə də dövlət müstəqilliyimizin itirilməsinə baxmayaraq, bir sıra nailiyyətlər əldə etmişdir. Xüsusən, xalqımızın böyük oğlu Heydər Əliyevin sovet dönəmində ölkəmizə rəhbərlik etdiyi illər tariximizə dinamik sosial-iqtisadi inkişaf dövrü kimi yazılmışdır.

Ötən əsrin 80-ci illərinin ortalarından başlayaraq SSRİ-də gedən ictimai-siyasi proseslərin labüd nəticəsi olaraq tarixi gerçəklik Sovet İttifaqının dağılmasına, kommunist partiyasının tarix səhnəsindən çəkilməsinə və nəticə etibarilə müttəfiq respublikaların hər birinin müstəqil dövlətə çevrilməsinə gətirib çıxartdı. 1991-ci ilin oktyabrın 18-də "Azərbaycanın dövlət müstəqilliyi haqqında" Konstitusiya Aktı qəbul olundu və respublikamızın tarixində yeni dövr başladı. Təəssüf ki, 1991-1993-cü illərdə ölkənin iqtisadi, siyasi maraqları, təhlükəsizliyi, ərazi bütövlüyünün təmin olunması ilə bir araya sığmayan daxili və xarici siyasət, dövlət idarəçiliyində buraxılmış kobud səhvlər müstəqil dövlətçiliyə, onun sonrakı taleyinə ağır zərbələr vurdu. Bu baxımdan 1991-1993-cü illər Azərbaycanın müstəqillik tarixində nəinki itirilmiş illər, hətta müstəqilliyimiz üçün təhlükə törədən bir çox təzahürlərin əmələ gəldiyi bir dövr kimi səciyyələndirilir.

Yalnız 1993-cü ilin iyununda xalqın təkidli tələbi ilə ulu öndər Heydər Əliyevin siyasi hakimiyyətə qayıdışından sonra hakimiyyət vakuumu aradan götürüldü, baş qaldırmış separatçı qüvvələr, Azərbaycan dövlətçiliyinə, müstəqilliyə, ərazi bütövlüyünə qəsdlər törədən cinayətkar ünsürlər zərərsizləşdirildi, dövlətlə xalqın birliyi, yekdilliyi təmin edildi. Bir tarixi həqiqət də vardır ki, xalqın əvəzsiz sərvəti olan müstəqilliyin qorunması onun əldə edilməsindən daha ağır və mürəkkəb vəzifədir. Bu tarixi missiyanı isə ümummilli liderimiz Heydər Əliyev layiqincə yerinə yetirdi və Azərbaycanı sürətli və hərtərəfli inkişaf yoluna çıxardı.

Ulu öndərin hakimiyyətdə olduğu illərdə ölkəmiz üçün həyati əhəmiyyətə malik bir çox məsələlər həll edildi, ölkənin gələcək strateji inkişafının əsası qoyuldu. Ümummilli liderin təşəbbüsü və bilavasitə rəhbərliyi altında müstəqil dövlətimizin ilk Konstitusiyası ümumxalq səsverməsi yolu ilə qəbul edildi, dünyanın aparıcı neft şirkətlərinin iştirakı ilə əsrin müqaviləsi imzalandı, Bakı-Tbilisi-Ceyhan neft, Bakı-Tbilisi-Ərzurum qaz kəmərlərinin inşasına başlanıldı, ordu quruculuğunun əsası qoyuldu. Ölkədə bir sıra mühüm siyasi-hüquqi, iqtisadi-aqrar islahatlar həyata keçirildi, ölkəmiz tam hüquqlu üzv kimi Avropa Şurasına qəbul edildi.

Azərbaycanın son 8 illik inkişaf tarixi isə möhtərəm Prezidentimiz İlham Əliyevin adı ilə bağlıdır. Məhz cənab İlham Əliyevin rəhbərliyi altında respublikamız dünyada analoqu olmayan inkişaf tempinə nail olmuş, ölkədə mühüm siyasi, hüquqi və iqtisadi islahatlar həyata keçirilmiş, möhkəm siyasi sabitlik və iqtisadi tərəqqi əldə edilmişdir. Bu gün Azərbaycan özünün spesifik inkişaf modelinə malik olan, dinamik iqtisadi inkişafın sürətinə görə dünyada qabaqcıl mövqelərdən birini tutan bir ölkə kimi beynəlxalq aləmdə özünü təsdiq etmişdir. Regionda hər hansı bir iqtisadi və ya infrastruktur layihəsinin Azərbaycanın iştirakı olmadan həyata keçirilməsi mümkün deyildir. Əsası ümummilli lider Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən sürətli inkişaf strategiyasının məntiqi nəticəsidir ki, son 8 ildə ölkə iqtisadiyyatının 3 dəfə, dövlət büdcəsinin 10 dəfə artımına nail olunmuşdur.

Fəxrlə qeyd edə bilərik ki, bu gün Azərbaycanda geniş vüsət alan sosial-iqtisadi inkişaf, aparılan quruculuq və abadlıq işləri Nəsimi rayonunda da yüksələn templə davam edir, bu inkişaf prosesinə rayonumuz da öz layiqli töhfələrini verməkdədir. Nəsimi rayonunun inkişafından danışarkən etiraf etməliyik ki, bu tərəqqinin əsl müəllifi Prezident İlham Əliyevdir. Qazanılan hər bir nailiyyətə dövlət başçısının rayonumuza göstərdiyi böyük diqqət və qayğı sayəsində nail olunmuşdur. Uğurlar o qədər genişmiqyaslı, çoxşaxəli və çoxvektorludur ki, yalnız ən mühüm hadisələrə nəzər salmaq istərdim.

Prezident İlham Əliyevin birbaşa təşəbbüsü və himayəsi sayəsində son illər Nəsimi rayonunda mühüm obyektlərin tikintisinin təməli qoyulmuş və inşası uğurla başa çatdırılmışdır. Ümumiyyətlə, son 5 ildə cənab Prezident 30 dəfə Nəsimi rayonunda olmuş, 19 obyektin açılış, 11 obyektin isə təməlqoyma mərasimində iştirak etmişdir. Son illər rayonumuzda çoxsaylı səhiyyə və təhsil müəssisələri, yollar, yol ötürücüləri və yol qovşaqları, piyada keçidləri, parklar, infrastruktur obyektləri, yeni inzibati binalar istifadəyə verilmiş, tarixi memarlıq abidələri, dini-mənəvi dəyərləri yaşadan obyektlərin bərpası ilə bağlı önəmli işlər görülmüşdür. Görülmüş bu işlər Nəsimi rayon sakinlərində dövlətə inamı, cənab Prezidentə etimadı daha da möhkəmləndirmiş, ümummilli lider Heydər Əliyevin siyasi kursunun alternativsizliyini bir daha təsdiq etmişdir.

Rayonda ümumi məhsul buraxılışı 2010-cu ildə 2003-cü illə müqayisədə 2,7 dəfə artmışdır. Sənaye məhsulları istehsalı 47,4 faiz, tikinti-quraşdırma işləri 2,1 dəfə, nəqliyyat xidməti 2,5 dəfə, rabitə xidməti isə 5,4 dəfə artmışdır. Hazırda rayonda işləyən vətəndaşların nominal aylıq əməkhaqqı 2003-cü illə müqayisədə 4,7 dəfə artaraq 365,8 manata çatmışdır. Göstərilən dövrdə əsas kapitala yönəldilən investisiyalar 4,8 dəfə artaraq 121 milyon manat olmuşdur. 2003-2011-ci illərdə rayonda 19030 yeni iş yeri yaradılmışdır ki, bunlardan 16826-sı daimi iş yerləridir. Son 5 ildə güzəştli kateqoriyadan olan sakinlərin mənzil şəraitinin yaxşılaşdırılması üçün yaşayış yeri üzrə 41, iş yeri üzrə isə 17 ailə mənzillə təmin edilmişdir.

2003-2010-cu illərdə 11 məktəbdə 4820 şagird yerlik əlavə korpuslar tikilərək istifadəyə verilmiş, 6 tam orta məktəb, 1 idman məktəbi əsaslı təmir edilmişdir. Hazırda isə "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın icrası ilə əlaqədar rayonun 7 orta məktəbində əsaslı təmir işləri aparılır. Bu məktəblərdən 2-də əlavə korpuslar da tikilir. 5 körpələr evi-uşaq bağçasında əsaslı təmir işləri aparılır. Göstərilən obyektlərdə aparılan işlər 15 sentyabr Bilik Gününə qədər tam başa çatdırılaraq istifadəyə veriləcəkdir. Yeri gəlmişkən qeyd etmək istəyirəm ki, dövlət proqramına müvafiq olaraq 2011-2013-cü illərdə rayonda 41 ayrı-ayrı sahələr üzrə abadlıq və yenidənqurma işlərinin aparılması nəzərdə tutulmuşdur.

Aparılan abadlıq, quruculuq və yaşıllaşdırma işlərinin, sosial tədbirlərin həyata keçirilməsində Heydər Əliyev Fondunun və onun prezidenti, Milli Məclisin deputatı Mehriban xanım Əliyevanın olduqca böyük rolu var. Rayonda bir sıra sosial təyinatlı obyektlər, o cümlədən, əqli cəhətdən zəif olan uşaqlar üçün 268 saylı xüsusi məktəb və atılmış uşaqlar üçün nəzərdə tutulmuş 1 saylı körpələr evi Heydər Əliyev Fondunun təşəbbüsü və maliyyə dəstəyi ilə əsaslı təmir edilmişdir. Hər yeni tədris ilində ibtidai sinif şagirdlərinə Fond tərəfindən məktəb ləvazimatları hədiyyə edilir.

Son illər əhalinin asudə vaxtının səmərəli təşkili, rayonda ekoloji vəziyyətin yaxşılaşdırılması məqsədilə bir sıra önəmli işlər görülmüşdür. Belə ki, 2003-2010-cu illərdə rayon ərazisində müasir tələblərə cavab verən 4 yeni park salınmış, 8 park isə əsaslı təmir edilərək əhalinin istifadəsinə verilmişdir. Hazırda 2 parkda əsaslı təmir və yenidənqurma işləri davam etdirilməkdədir. Rayonda mütəmadi olaraq yaşıllaşdırma işləri aparılmışdır. Xüsusən Heydər Əliyev Fondunun prezidenti Mehriban xanım Əliyevanın "Hərəmiz bir ağac əkək" təşəbbüsü və ötən ilin "Ekologiya ili" elan olunması ilə əlaqədar 200 mindən artıq ağac və dekorativ kollar əkilmişdir.

Rayon ərazisində yaşayan şəhid ailələri, müharibə veteranları, aztəminatlı ailələr, rayonda məskunlaşmış məcburi köçkünlər rayon icra hakimiyyətinin diqqət və qayğısı ilə əhatə olunmuş, onlara mütəmadi olaraq maddi və mənəvi yardımlar göstərilmişdir.

Qazanılmış uğurlar onu deməyə əsas verir ki, bu gün istər regional, istərsə də dünya miqyasında müasir Azərbaycanı xarakterizə edən əsas göstərici yüksək dinamizmə əsaslanan modern inkişafdır. Kompleks xarakterə malik bu inkişaf qısa zaman kəsiyində Azərbaycanın kifayət qədər böyük nailiyyətlərə imza atmasına, beynəlxalq geosiyasi və geoiqtisadi məkanda güclü müstəqil subyektlərdən birinə çevrilməsinə gətirib çıxarmışdır. Şübhəsiz ki, belə bir inkişaf tendensiyası düşünülmüş və dəqiq elmi-nəzəri konsepsiyaya əsaslanan strateji proqrama söykənir. Onun müəllifi isə ulu öndər Heydər Əliyev kursunun layiqli davamçısı, hörmətli Prezidentimiz cənab İlham Əliyevdir. Qətiyyətlə deyə bilərik ki, cənab Prezidentin rəhbərliyi altında müstəqil Azərbaycan dövləti qarşıdakı illərdə daha böyük, daha möhtəşəm qələbələrə imza atacaq, qısa bir zamanda dünyanın inkişaf etmiş qabaqcıl dövlətləri arasında öz layiqli yerini tutacaqdır.

Nəsimi rayon ictimaiyyəti adından hamını əmin etmək istəyirəm ki, cənab Prezidentin qarşımıza qoyduğu hədəflərə nail olunması üçün üzərimizə düşən bütün vəzifələri layiqincə yerinə yetirəcək, Nəsimi rayonunun Azərbaycanın tərəqqisini özündə aydın əks etdirən əsas ünvanlardan birinə çevrilməsinə, qarşıdakı dövr ərzində rayonun inkişaf dinamikasının daha böyük vüsət almasına çalışacağıq.

Bəxtiyar SADIQOV:

- Nəsimi rayonu paytaxtımızın mərkəzi rayonlarından biri olduğundan buradakı inkişaf demək olar ki, gözümüzün önündə baş verir. Təbii ki, bu inkişafda, sakinlərin yaşayış səviyyəsinin yüksəlməsində, rayon üzrə ümumi daxili məhsulun yüksək templə artımında ərazidə fəaliyyət göstərən istehsal və xidmət müəssisələrinin böyük rolu var. Ölkəmizdə formalaşdırılan azad biznes mühiti Nəsimi rayonunda da vaxtilə fəaliyyətini dayandırmış müəssisələrin bərpası, yeni istehsal və xidmət sahələrinin yaradılması, eləcə də mövcud müəssisələrdə istehsalın çoxalması ilə müşayiət olunur. Bu barədə danışmaq üçün söz A.Bakıxanov adına "Bakı Tikiş Evi" ASC-nin sədri Fidail RƏHİMOVa verilir.

Fidail RƏHİMOV:

- Bu günlər ölkəmizin hər yerində Azərbaycanın dövlət müstəqillyinin bərpasının 20 illiyi böyük təntənə ilə qeyd edilməkdədir. Tarixi baxımdan 20 il çox qısa müddət olsa da, bu zaman kəsiyində ölkəmizin iqtisadi, siyasi, sosial, mənəvi və digər sahələrdə qazandığı möhtəşəm uğurlar çoxdur və hər bir Azərbaycan vətəndaşı bu uğurlardan böyük qürur hissi keçirir. Bütün bunlar isə əsası ulu öndər Heydər Əliyev tərəfindən qoyulan və möhtərəm Prezidentimiz İlham Əliyev tərəfindən davam etdirilən Azərbaycanın hərtərəfli inkişaf strategiyasının məntiqi nəticəsidir. Bu tarixi günlərdə ictimai mövqeyindən asılı olmayaraq hər bir Azərbaycan vətəndaşı keçilmiş yola nəzər salmalı, görülmüş işlər və qarşıdakı hədəflər barədə düşünməlidir.

İnamla deyə bilərik ki, bu illər ərzində Nəsimi rayonunda genişmiqyaslı işlər görülmüş, iqtisadi sahədə əhəmiyyətli nailiyyətlər qazanlımışdır. Yalnız onu demək kifayətdir ki, 1991-ci ildə rayonda 11 milyon 970 min manatlıq sənaye məhsulu istehsal olunduğu halda, 2010-cu ildə bu rəqəm 106 milyon 412 min manat, yəni 9 dəfə çox olmuşdur. 1991-ci ildə rayonda əsas kapitala 166,6 min manat, 2010-cu ildə isə 120 milyon 956 min manat investisiya yönəldilmişdir ki, bu da 726 dəfə artım deməkdir. Bu dövr ərzində rayonda aparılan tikinti-quraşdırma işlərinin həcmi 569 dəfə artaraq 504 min manatdan 286 milyon 753 min manata çatmışdır. "Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)" rayonda müvəffəqiyyətlə başa çatdırılmış, 2003-2010-cu illərdə 19030 yeni iş yeri yaradılmışdır. Hazırda 2009-2013-cü illər üçün nəzərdə tutulmuş Dövlət Proqramının icrası uğurla davam etdirilməkdədir.

Azərbaycan Respublikasının Prezidenti cənab İlham Əliyevin sahibkarlığın inkişafına göstərdiyi diqqət və qayğı bütün respublikada olduğu kimi, Nəsimi rayonunda da bu sahənin inkişafına geniş imkanlar yaradır. Cənab Prezidentin imzaladığı fərman və sərəncamlar sahibkarlığın inkişafı üçün mövcud olmuş maneələri tamamilə aradan qaldırır, bu mühüm sahənin tam və sərbəst inkişaf etməsi üçün mükəmməl sistem yaradır. Sahibkarlığın inkişafına olan diqqətin və ölkəmizdə həyata keçirilən dəqiq, düşünülmüş, elmi əsaslara söykənən, uzaqgörən iqtisadi siyasətin nəticəsidir ki, Nəsimi rayon ərazisindəki müəssisələrdə keçmiş ənənələr bərpa olunur, əlaqələr yenidən qurulur, bunlarla yanaşı, istehsalata müasir texnologiyalar cəlb olunur, qabaqcıl idarəetmə təcrübəsi öyrənilir və tətbiq edilir. Bazar iqtisadiyyatının qanunlarına uyğun, rəqabətə davamlı məhsulların istehsalına xüsusi önəm verilir və yeni tipli iqtisadiyyat Nəsimi rayonunun yüksəlişində əsas amillərdən birinə çevrilir.

Təmsil etdiyim "Bakı Tikiş Evi" ASC-də də son illərdə əhəmiyyətli uğurlara imza atılmışdır. Müəssisəmiz sovet hakimiyyətinin ilk illərindən fəaliyyət göstərsə də, öz inkişafının yüksək səviyyəsinə ötən əsrin 70-ci illərində, ulu öndər Heydər Əliyevin respublikaya birinci rəhbərliyi dövründə çatmışdır. Həmin illərdə müəssisə dinamik inkişaf yoluna qədəm qoymuş, keçmiş Sovetlər İttifaqının digər respublikaları, dünyanın bir çox ölkələri ilə iqtisadi-ticarət əlaqələri yaradılmış, böyük iqtisadi nailiyyətlər əldə edilmişdir.

Təəssüf ki, müstəqilliyimizin ilk illərində ölkəmizdə yaranmış qeyri-sabit siyasi şərait, baş alıb gedən xaos və anarxiya, iqtisadi və siyasi böhran "Bakı Tikiş Evi"ndən də yan keçməmiş, müəssisə öz fəaliyyətini demək olar ki, dayandırmışdır. Yalnız xalqın təkidli tələbi ilə ulu öndər Heydər Əliyevin siyasi hakimiyyətə qayıdışından sonra respublikada siyasi vəziyyət sabitləşməyə başlamış, ölkə iqtisadi inkişaf yoluna qədəm qoymuşdur. Odur ki, "Bakı Tikiş Evi"nin yenidən fəaliyyətə başlaması da məhz ulu öndərin adı ilə bağlıdır. 1993-cü ilin sonlarından fəaliyyətini bərpa edən müəssisə ilbəil iqtisadi göstəricilərini yaxşılaşdırmağa nail olmuşdur.

1998-ci ildən səhmdar cəmiyyəti kimi fəaliyyət göstərən müəssisədə bu gün 700-dən artıq işçi çalışır, 100-dən artıq adda məhsul istehsal edilir. 2010-cu ildə sənaye istehsalının həcmi 8 milyon manat olmuşdur ki, bu da 1991-ci illə müqayisədə 4 dəfə çoxdur. Hazırda "Bakı Tikiş Evi" respublikanın əksər güc strukturlarını, eləcə də təhsil müəssisələrini yüksək keyfiyyətli, müasir tələblərə cavab verən uniformalarla, digər geyim dəstləri ilə təmin edir, xarici bazarlara çıxmaq məqsədi ilə bir çox ölkələrlə əlaqələr yaradır.

Şübhəsiz ki, biz görülmüş işlərlə qətiyyən kifayətlənməli deyilik. Cənab Prezidentin ölkə iqtisadiyyatı qarşısında qoyduğu möhtəşəm hədəflər - Azərbaycanı dünyanın ən inkişaf etmiş ölkələrindən birinə çevirmək vəzifəsi bizi bundan sonra daha əzmlə, daha gərgin işləməyə ruhlandırır. Rayonumuzun digər müəssisə və təşkilatları kimi "Bakı Tikiş Evi" ASC də bu vəzifənin layiqincə yerinə yetirilməsi üçün fəaliyyətini daim təkmilləşdirir. Biz yeni, müasir texnologiyaların daha geniş miqyasda tətbiq edilməsi, istehsalı şaxələndirmək, yeni istehsal sahələri yaratmaq, daha yüksək keyfiyyətli, beynəlxalq standartlara tam cavab verən məhsullar istehsal etmək üçün çalışırıq.

Ümummilli lider Heydər Əliyevin dediyi kimi, müstəqillik hər bir xalqın ən böyük milli sərvətidir. Ulu öndərin ifadə etdiyi bu tarixi həqiqət bu gün doğma Azərbaycanımızın timsalında bir daha öz təsdiqini tapmışdır. Qazandığımız bütün qələbələr günbəgün möhkəmlənməkdə olan dövlət müstəqilliyimizin, Azərbaycan dövlətinin qurucusu, dahi öndər Heydər Əliyevin müəyyən etdiyi hərtərəfli inkişaf strategiyasının, möhtərəm Prezidentimiz cənab İlham Əliyevin həyata keçirdiyi müdrik və uzaqgörən siyasətin gündəlik həyatımızda təsdiqini tapmış sübutudur. Müstəqil dövlətimizi qorumaq və daha da inkişaf etdirmək, gələcək nəsillərə qüdrətli, firavan Azərbaycanı ərmağan etməksə bizim hamımızın müqəddəs vəzifəsidir.

Bəxtiyar SADIQOV:

- Müasir Azərbaycanın əsas reallıqlarından biri iqtisadi inkişafın vətəndaşların etibarlı sosial təminatı üçün yaratdığı geniş imkanlardır. Bu, ölkəmizdə həyata keçirilən inkişaf strategiyasının sosial mahiyyətindən xəbər verir. Demək olar ki, hər il ölkəmizdə əməkhaqlarında artımlar baş verir. Dövlət xüsusən aztəminatlı vətəndaşların, o cümlədən qocaların, mühariə əlillərinin, qaçqın və məcburi köçkünlərin etibarlı sosial müdafiəsinin təşkili məsələlərinə həssaslıqla yanaşır. Bu yaxınlarda 2006-cı ilə qədər pensiyaya çıxmış şəxslərin pensiyalarının yenidən hesablanması və orta hesabla təxminən 40 faiz artması bunun təsdiqidir. Əhalinin sosial müdafiəsi sahəsində görülən işlər barədə danışmaq üçün söz Nəsimi Rayon Ağsaqqallar Şurasının sədri, fəlsəfə elmləri doktoru, professor İmran CƏFƏRZADƏyə verilir.

İmran CƏFƏRZADƏ:

- Azərbaycan Respublikasının sosial - iqtisadi inkişaf strategiyasına uyğun olaraq Nəsimi rayonu böyük sürətlə tərəqqi edir, intibah dövrünü yaşayır. Rayonumuzda irimiqyaslı tikinti - quruculuq işləri aparılır, müasir tipli yeni yaşayış binaları tikilir, parklar salınır, yeni təhsil, səhiyyə müəssisələri inşa edilir. Köhnə binalar əsaslı bərpa edilir, əlavə tədris korpusları, idman salonları tikilir, müxtəlif istiqamətli istehsal müəssisələri istifadəyə verilir. Həmçinin sahibkarlıq fəaliyyətinə dəstək göstərilir, sərbəst iqtisadi münasibətlər sektoru rayon iqtisadiyyatının əsas bazasına çevrilir. Bunun nəticəsidir ki, ötən il rayonun ümumi məhsul buraxılışı 907,3 milyon manata, nominal əməkhaqqı 365,8 manata çatmışdır. 2011-ci ilin birinci yarısının yekunları da göstərir ki, rayonumuzun stabil və dinamik strateji inkişaf ənənəsi davam edir və dayanıqlı xarakter daşıyır.

Dövlət qayğısının və yerli imkanların genişlənməsi nəticəsində Nəsimi rayonunda sosial sferaya diqqət daha da artırılmış, yoxsulluğun səviyyəsi sürətlə aşağı düşmüş, ehtiyacı olan insanlara müxtəlif xarakterli yardım göstərilmişdir. Rayon rəhbərliyi vaxtı ilə özünün fiziki və əqli imkanlarını vətənimizin inkişafına həsr etmiş, indi isə ahıl yaşına çatmış sakinlərin qayğılarına xüsusi diqqət yetirir və onlara həssaslıqla yanaşır. Rayon ərazisində yaşayan 373 nəfər tənha, əlil və ahıllar rayon Əhalinin Sosial Müdafiəsi Mərkəzində sosial məişət xidmətinə götürülmüş və onlara mütəmadi qaydada evlərində xidmət göstərilir. Bayram günlərində rayonun şəhid, əlil, aztəminatlı və sosial qayğıya ehtiyacı olan ailələrinə rayon icra hakimiyyəti tərəfindən maddi kömək olunur.

Rayonumuzda aztəminatlı vətəndaşların mənzil şəraitinin yaxşılaşdırılması da diqqət mərkəzindədir. Son 5 ildə güzəştli kateqoriyadan olan sakinlərin mənzil şəraitinin yaxşılaşdırılması üçün yaşayış yeri üzrə 41 ailə mənzillə təmin edilmişdir.

Nəsimi rayonu ərazisində 14776 nəfər qaçqın, 10682 nəfər isə məcburi köçkün məskunlaşmışdır. Onların məişət-kommunal xidmətləri, məskunlaşdığı yerlərdə rastlaşdıqları çətinliklərlə əlaqədar yazılı və şifahi müraciətləri daim rayon icra hakimiyyətinin diqqət mərkəzindədir. Azərbaycan Prezidentinin 2004-cü il 1 iyul tarixli 298 nömrəli sərəncamı ilə təsdiq olunmuş "Qaçqınların və məcburi köçkünlərin yaşayış şəraitinin yaxşılaşdırılması və məşğulluğun artırılması üzrə Dövlət Proqramı"nın bütün bəndlərini rəhbər tutaraq ərazidə məskunlaşmış məcburi köçkün ailələrinin sosial, məişət, mənzil şəraitinin yaxşılaşdırılması, işlə təminat və s. məsələlər müntəzəm olaraq rayon icra hakimiyyətinin nəzarətində saxlanılır.

Məlum olduğu kimi, ölkə üzrə 2006-cı ildən ünvanlı dövlət sosial yardımı verilməsinə başlanmışdır. Həmin tarixdən indiyədək Nəsimi rayonu üzrə 2078 ailə olmaqla 8375 nəfərə ünvanlı dövlət sosial yardımı verilmişdir. Eyni zamanda, Nəsimi Rayon Əhalinin Sosial Müdafiəsi Mərkəzindən 2673 nəfər sosial müavinət alır. Dövlət Sosial Müdafiə Fondunun Nəsimi rayon şöbəsində indiyədək qeydiyyatda olan əmək pensiyaçılarının sayı 25953 nəfərdir. Bunlardan yaşa görə əmək pensiyaçıları 18425 nəfər, əlilliyə görə əmək pensiyaçıları 5576 nəfər, ailə başçısını itirməyə görə əmək pensiyaçıları 1952 nəfər təşkil edir. "Əmək pensiyaları haqqında" Azərbaycan Respublikasının Qanununa dəyişiklik edilməsi barədə" Azərbaycan Respublikasının 2011-ci il 17 may tarixli Qanununun qüvvəyə minməsi ilə əlaqədar Nəsimi rayonu üzrə pensiya alan 20399 nəfər pensiyaçının əmək pensiyasının məbləği iş stajları nəzərə alınmaqla yenidən hesablanaraq artırılmışdır. Yenidən hesablamaya qədər Nəsimi rayonu üzrə qeydiyyatda olan pensiyaçıların bir nəfərə düşən orta aylıq pensiya məbləği 138,17 manat olduğu halda, 01.07.2011-ci il tarixdən sonra bu məbləğ artaraq 169,63 manata çatdırılmışdır.

Nəsimi rayonunda makroiqtisadi göstəricilərin dinamikasında müşahidə olunan artım tempi iqtisadiyyatın sosialyönümlü inkişafının təmin edilməsi, əhalinin həyat səviyyəsinin yüksəldilməsi ilə yanaşı, yeni iş yerlərinin yaradılması və məşğulluğun inkişaf etdirilməsi üçün də əlverişli şərait yaratmışdır. Rayonda işsizlik probleminin aradan qaldırılması istiqamətində çox ciddi və uğurlu nəticələr əldə edilmiş, 2003-2011-ci illərdə rayon ərazisində yaradılan müəssisələrdə 19030 yeni iş yeri açılmışdır. Bu proses indi də davam etməkdədir.

Bütövlükdə, Nəsimi rayonunda sosial müdafiəyə ehtiyacı olan vətəndaşların, o cümlədən qaçqın, məcburi köçkün və əlillərin sosial müdafiəsinin gücləndirilməsi daim diqqət mərkəzində saxlanılır. Respublikamızın inkişafı və maliyyə imkanlarının ildən-ilə artması isə rayonumuzda da xüsusi qayğıya ehtiyacı olan vətəndaşların sosial müdafiəsinin daha keyfiyyətlə həyata keçirilməsinə yol açır.

Bəxtiyar SADIQOV:

-Paytaxt Bakı bu gün sözün əsl mənasında dünyanın ən gözəl və sürətlə inkişaf edən şəhərinə çevrilib. Şəhərimizin gözəlləşməsində abadlıq və quruculuq işlərinin böyük rolu var. Təqdirəlayiq haldır ki, abadlıq və quruculuq işləri ən yüksək zövqlə, hər bir incəliyi nəzərə almaqla həyata keçirilir. Elə buna görədir ki, Bakının dəyişən siması, gözəlliyi şəhərimizin qonaqlarını da valeh edir. Nəsimi rayonu paytaxtın mərkəzi rayonlarından olduğu üçün aparılan abadlıq və quruculuq işləri burada daha çox diqqəti cəlb edir. Yenidən qurulan küçə və prospektlər, binaların fasadlarının yüksək zövqlü üzlük daşlarla örtülməsi, yeni salınan parklar rayonun simasını kökündən dəyişib. Bu barədə danışmaq üçün söz Azərbaycan Dövlət Neft Akademiyasının müəllimi, texniki elmlər namizədi, dosent Zəfər QURBANOVa verilir.

Zəfər QURBANOV:

- Respublikamzın tarixi bir hadisəni - dövlət müstəqilliyimizin bərpasının 20 illiyini qeyd etdiyi bu günlərdə bütün ölkə ictimaiyyəti kimi, Nəsimi rayonu da ötən dövr ərzində qazanılmış böyük uğurlarla haqlı olaraq fəxr edir. Həqiqətən də son illərdə rayonumuz öz tarixində görünməmiş bir inkişaf yolu keçmiş, xüsusən, abadlıq və quruculuq sahəsində müstəsna işlər görülmüşdür. Bütün bu işlər barədə danışmaq uzun vaxt tələb etdiyinə görə mən yalnız bunlardan bir neçəsi barədə məlumat vermək istərdim.

Son illər aparılmış genişmiqyaslı abadlıq və yenidənqurma işləri nəticəsində Nəsimi rayonunun siması tamamilə dəyişmişdir. Yalnız onu demək kifayətdir ki, 2007-2010-cu illərdə rayon ərazisində 4 yeni park salınmışdır: S.Vurğun və Bakıxanov küçələrinin kəsişməsində, Azadlıq prospekti ilə Bakıxanov küçələrinin kəsişməsində, Neftçilər prospekti 14 ünvanda və R.Behbudov küçəsində uzun illərdən bəri baxımsız qalmış ərazidə geniş abadlıq işləri aparılaraq ən müasir tələblərə cavab verən parklar yaradılmışdır.

Daha 8 parkda - Heydər Əliyev Sarayının qarşısındakı, 1-ci mikrorayon ərazisindəki, S.Vurğun küçəsi ilə Vaqif prospektinin kəsişməsində, C.Hacıbəyli küçəsi ilə Vaqif prospektinin kəsişməsində yerləşən parkda, Sevil Qazıyeva, S.Vurğun adına, "Muğam" və "Zabitlər" parklarında əsaslı təmir və yenidənqurma işləri aparılmış, əhalinin istirahəti və asudə vaxtının səmərəli keçirilməsi üçün hər cür şərait yaradılmışdır. Hazırda 2 parkda - Ə.Əzimzadə adına və 2-ci mikrorayon ərazisində yerləşən "Heydər parkı"nda əsaslı təmir, bərpa və yenidənqurma işləri aparılmaqdadır.

Ekoloji vəziyyətin yaxşılaşdırılması rayon rəhbərliyinin daim diqqət mərkəzində olmuşdur. Azərbaycan Respublikasının Prezidenti cənab İlham Əliyevin bu sahəyə xüsusi əhəmiyyət verdiyini nəzərə alaraq rayonda yeni yaşıllıq zolaqları salınmış, yol kənarlarında, həyətlərdə ağac və gül kolları əkilmiş, bu işlər mütəmadi olaraq davam etdirilməkdədir.

2006-cı ildən başlayaraq rayon icra hakimiyyətinin təşəbbüsü ilə abadlaşdırılmağa ehtiyacı olan həyətlər müəyyənləşdirilmiş, həmin həyətlərdə genişmiqyaslı abadlıq, yenidənqurma işləri aparılmışdır. Ötən dövr ərzində görülmüş bu işlərin nəticəsi olaraq yüzlərlə həyət öz simasını dəyişmiş, təmiz, abad, bütün istirahət avadanlıqları ilə təchiz edilmiş yaşayış sahələrinə çevrilmişdir.

Son illər yolların abadlaşdırılması diqqət mərkəzində olmuş, rayon ərazisindən keçən magistral yolların, eləcə də məhəllədaxili yolların vəziyyətinin daha da yaxşılaşdırılması üçün əhəmiyyətli işlər görülmüşdür. Yüz min kvadratmetrlərlə məhəllədaxili yollara asfalt çəkilmiş, magistral yolların asfalt örtüyü yenilənmiş, yol kənarları, səkilər abadlaşdırılaraq tamet plitələr döşənmiş, ağac və dekorativ kollar əkilmişdir. Rayon ərazisində yeni yeraltı keçidlər və körpülər istifadəyə verilmiş, Nəsibbəy Yusifbəyli küçəsində, 3-cü və 4-cü mikrorayon dairələrində avtomobil yolu genişləndirilmiş, ərazidə böyük abadlıq işləri aparılmış, yeni yaşıllıq zolağı salınmışdır.

Rayonda aparılan quruculuq və abadlıq işləri təhsil, səhiyyə və mədəniyyət müəssisələrini də əhatə etmişdir. Hazırda 7 orta məktəbdə və 5 uşaq bağçasında əsaslı təmir və yenidənqurma işləri başa çatdırılmaq üzrədir.

Ötən dövr ərzində rayon ərazisində fəaliyyət göstərən səhiyyə müəssisələrində çox böyük işlər görülmüşdür: Müdafiə Nazirliyi Mərkəzi Hərbi Hospitalının cərrahiyyə korpusu, Azərbaycan Tibb Universitetinin 14 mərtəbəli Tədris Terapiya Korpusunun inşası başa çatdırılaraq istifadəyə verilmiş, hər iki obyektin açılış mərasimində Azərbaycan Respublikasının Prezidenti cənab İlham Əliyev iştirak etmişdir.

Elmi-Tədqiqat Travmatologiya və Ortopediya İnstitutunda, Kliniki Tibbi Mərkəzdə, Respublika Dəri-Zöhrəvi Dispanserində, Ə.Qarayev adına 2 saylı Klinik Uşaq Xəstəxanasında, Təsərrüfat Hesablı Respublika Uroloji Xəstəxanasında, 4 saylı Şəhər Klinik Xəstəxanasında, Təsərrüfat Hesablı Respublika poliklinikasında, 6 saylı Qadın Məsləhətxanasında, 1 və 12 saylı uşaq poliklinikalarında və bir sıra digər səhiyyə müəssisələrində əsaslı və cari təmir işləri aparılmış, yeni şöbələr, əməliyyat otaqları yaradılmış, yeni korpuslar tikilmiş, ən müasir tibbi avadanlıqlarla təchiz edilmiş, ətraf ərazilərdə abadlıq işləri aparılmışdır.

Rayonun H.Sarabski adına Mədəniyyət Evində, İ.Əbilov, A.Puşkin və M.Əzizbəyov adına kitabxanalarında təmir işləri aparılmışdır. Rayon ərazisində yerləşən ölkə və yerli əhəmiyyətli tarixi və memarlıq abidələrinin bərpası və qorunması diqqət mərkəzində olmuşdur.

Rayon icra hakimiyyətinin tövsiyəsi ilə idarə, müəssisə və təşkilatlar, kommersiya obyektləri fəaliyyət göstərdikləri ərazinin ətrafında abadlıq və yaşıllaşdırma işləri aparmışlar və bu işlər mütəmadi olaraq davam etdirilir.

Görülmüş bu işlər, eləcə də vaxt azlığına görə qeyd etmədiyimiz digər uğurlar Nəsimi rayonunun hər bir sakinində haqlı qürur hissi doğurur. Biz başa düşürük ki, əldə edilmiş bu nailiyyətlərin, qazanılmış qələbələrin əsas səbəbi bu günlər 20 illiyini qeyd etməyə hazırlaşdığımız müstəqil dövlətimiz və bu dövlətin rəhbəri, dahi Heydər Əliyev siyasi kursunun layiqli davamçısı Prezident İlham Əliyevin həyata keçirdiyi uğurlu siyasətdir. Məhz ulu öndər Heydər Əliyev tərəfindən əsası qoyulan, cənab İlham Əliyev tərəfindən uğurla davam etdirilən hüquqi, siyasi və iqtisadi islahatlar, dəqiq elmi əsaslara söykənən sürətli və hərtərəfli inkişaf strategiyası belə möhtəşəm qələbələr qazanmağa, Azərbaycanı dünya ölkələri arasında qabaqcıl mövqelərdən birinə çıxarmağa imkan vermişdir.

Bildiyimiz kimi, cənab Prezident qazanılan iqtisadi uğurlarla yanaşı ölkənin abadlaşmasına, quruculuq və yenidənqurma işlərinə böyük əhəmiyyət verir, bu işlərin yüksək zövqlə, ən müasir tələblərə cavab verən bir səviyyədə həyata keçirilməsini dövlət orqanlarının ən mühüm vəzifələrindən biri hesab edir. Dövlətimizin başçısı Bakını dünyanın ən gözəl şəhərlərindən birinə çevirməyi bir vəzifə kimi qarşıya qoymuşdur. Bakının mərkəzi rayonlarından biri olan Nəsimi rayonunun rəhbərliyi Prezident İlham Əliyevin göstərişlərini gündəlik fəaliyyətində rəhbər tutur, rayonun daha da abadlaşması, bu sahədə daha böyük uğurlar əldə edilməsi üçün önəmli işlər görür.

Heydər Əliyev siyasi kursunu ləyaqətlə və uğurla davam etdirən Prezident İlham Əliyevin müdrik rəhbərliyi altında ölkəmiz və onun bir parçası olan Nəsimi rayonu qarşıdakı illərdə daha böyük nailiyyətlər əldə edəcək.

Bəxtiyar SADIQOV:

- Nəsimi rayonunda aparılan abadlıq və quruculuq işlərində Heydər Əliyev Fondunun böyük xidmətləri var. Ümummilli lider Heydər Əliyevin yaradıcılıq irsinin təbliği və öyrənilməsi ilə yanaşı Fond xeyriyyəçiliyi, uşaqlara kömək etməyi, müxtəlif humanitar aksiyalar keçirməyi, sosial quruculuq işlərinə dəstək verməyi öz fəaliyyətinin prioritet istiqamətləri elan etmişdir. Bu baxımdan ölkə Prezidentinin həyata keçirdiyi inkişaf siyasətinə öz layihələri ilə yaxından dəstək göstərən Heydər Əliyev Fondu Nəsimi rayonunun da tərəqqisinə böyük töhfələr verir. Heydər Əliyev Fondunun Nəsimi rayonunda həyata keçirdiyi layihələrlə bağlı danışmaq üçün söz 46 nömrəli orta məktəbin direktoru, tarix elmləri üzrə fəlsəfə doktoru Sevinc BUDAQOVAya verilir.

Sevinc BUDAQOVA:

- Azərbaycan xalqının ümummilli lideri Heydər Əliyevin zəngin dövlətçilik irsinin öyrənilməsi və təbliği məqsədilə yaradılmış Heydər Əliyev Fondu milli düşüncə sistemimizdə xüsusi yer tutan mərhəmət, insanpərvərlik, xeyirxahlıq kimi ali dəyərlərə söykənərək cəmiyyətin mənəvi saflaşmasına çalışır, həyata keçirdiyi xoşməramlı missiya ilə cəmiyyətə yüksək mənəvi dəyərlər təlqin edir. Həm də bu dəyərlər ənənəvi təbliğat qəliblərində təqdim olunmur, görülən işlərin hər bir cəmiyyət üzvünün öz evində, ailəsində, gündəlik həyatında duyub hiss edə biləcəyi xoş nəticələri ilə əxz etdirilir.

Azərbaycan cəmiyyəti Mehriban xanım Əliyevanın vətəndaşlara diqqət və qayğı nümunələri ilə zəngin olan çoxşaxəli fəaliyyətinə nəzərən mənəvi dəyərlərin nisbətən aşındığı indiki "sürət əsri"ndə savab və xeyirxah əməllərin nə qədər müstəcəb olduğunu dərk edir, özlərinin yaşam fəlsəfəsini bu ideyalara uyğunlaşdırmağa çalışırlar. Mehriban xanım Əliyevanın rəhbərlik etdiyi Heydər Əliyev Fondu Azərbaycanın inkişafına, milli-mənəvi dəyərlərimizin qorunması və təbliğinə, bir sıra sosial problemlərin həllinə xidmət edən genişmiqyaslı layihələri uğurla həyata keçirir. Azərbaycan həqiqətlərinin dünyaya çatdırılması, elm, təhsil, mədəniyyət, səhiyyə, idman, ekologiya sahələrinə dair dövlət siyasətinə ictimai dəstəyin təmin edilməsi, köməyə ehtiyac duyan insanların diqqət və qayğı ilə əhatə olunmasında səylərini əsirgəmir.

Milli maraq və mənafelərə daim yüksək sadiqlik nümayiş etdirən Heydər Əliyev Fondu qloballaşmanın qarşısıalınmaz prosesə çevrildiyi bir dönəmdə xalqın milli varlığının, özünəməxsusluğunun ifadəsi olan zəngin mənəvi irsi, dəyərlər sistemini, mədəni-intellektual mülkiyyəti yad təsirlərdən qorunmaq kimi çətin missiyanın öhdəsindən inamla gəlir. Dövlətimizin uşaqlara göstərdiyi diqqət və qayğıya real dəstək verən Heydər Əliyev Fondunun bu istiqamətdə fəaliyyəti genişmiqyaslı olub, böyüməkdə olan nəslin hərtərəfli inkişafını nəzərdə tutan proqram və layihələrdə öz təcəssümünü tapır.

Fondun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın bilavasitə təşəbbüs, rəhbərliyi ilə bu istiqamətdə bir sıra proqram və əhəmiyyətli layihələr reallaşmış, həmin tədbirlər cəmiyyətdə böyük rəğbət hissi ilə qarşılanmışdır.

Heydər Əliyev Fondunun başlıca məqsədinin həyata keçirilməsinə xidmət edən uğurlu addımlardan biri də "Təhsil, səhiyyə, uşaq evlərinin və internat məktəblərinin inkişafı" proqramıdır. Bu proqramın həyata keçirilməsinin zəruriliyi əsaslandırılmış, müxtəlif istiqamətlərdə araşdırmalar və təhlillər aparılmışdır. Belə müəssisələrin əksəriyyətinin ilkin mərhələdə əsaslı təmirə və texniki təchizata daha çox ehtiyacı olduğu aşkar olunmuşdur. Mövcud problemlərin həll edilməsi məqsədilə 4 əsas istiqamət müəyyən edilmişdir; texniki dəstək; təhsil; səhiyyə; ictimai fəallıq.

Bu istiqamətlər uşaq müəssisələrinin təhsil və sosial sahədə problemlərinin həllinə yönələn prioritet kimi müəyyən edilmişdir. İlk növbədə belə müəssisələrin məhz təmirə, yenidənqurmaya və texniki təchizata daha çox ehtiyacı olduğu üçün öncə bu istiqamətdə işlər görülməyə başladı.

Fond tərəfindən bütün bu istiqamətlər üzrə Nəsimi rayonunda da ötən dövr ərzində önəmli işlər görülmüşdür. 2005-ci ildə atılmış uşaqlar üçün nəzərdə tutulmuş 1 saylı Körpələr evində əsaslı təmir işləri aparılmışdır. Körpələr evi müasir yeni avadanlıqlarla təchiz edilmiş, həyətyanı sahədə müasir tələblərə cavab verən yenidənqurma işləri görülmüş, minik maşını hədiyyə edilmişdir. Bütün bayram və əlamətdar günlərdə Körpələr evinin sakinləri əsl ana qayğısını YUNESKO və İSESKO-nun xoşməramlı səfiri, Heydər Əliyev Fondunun prezidenti Mehriban xanım Əliyevanın simasında görürlər.

Nəsimi rayonu 268 nömrəli xüsusi məktəb 1928-ci ildən fəaliyyətdədir. 2003-cü ilə qədər bir dəfə də əsaslı təmir edilməmişdir. İlk dəfə Mehriban xanım Əliyevanın təşəbbüsü ilə 2003-2004-cü illərdə bu məktəbdə Avropa standartlarına uyğun təmir işləri həyata keçirilib. Məktəb maddi-texniki vasitələrlə yenidən təmin edilmişdir. 2003-cü ildən mütəmadi olaraq "Novruz" bayramı və "Yeni il" şənliklərində Mehriban xanım uşaqlara baş çəkir. "Gülüstan", "Buta Palace" saraylarında keçirilən tədbirlərə məktəbin şagirdləri də dəvət olunurlar. Məktəbin 20 şagirdi Heydər Əliyev Fondu tərəfindən 2006-cı il 19-24 aprel tarixində İstanbul şəhərində keçirilən "Gülen Çocuk" şənliyində iştirak etməyə göndərilib. Bundan başqa, məktəbdən 15 şagird və müəllim heyəti 2008-ci ildə Polşanın Tveç şəhərində keçirilən beynəlxaq festivalda Heydər Əliyev Fondunun dəstəyi ilə iştirak etmişlər.

Heydər Əliyev Fondunun fəaliyyətə başladığı ilk dövrlərdən etibarən hər yeni dərs ilinin əvvəlində birinci siniflərə və xüsusi qayğıya ehtiyacı olan uşaqlara çantalar və dərs ləvazimatları hədiyyə edilir. Fondun dəstəyi ilə məktəbdənkənar yaradıcılıq evlərində yeni nəsillər üçün şahmat, rəqs, toxuma, tikmə və s. dərnəkləri təşkil olunur.

Bütün bunlarla yanaşı, rayonumuzda Ə.Qarayev adına Uşaq Xəstəxanasının əsaslı təmiri, Azərbaycan Tibb Universitetinin yeni tədris terapevtik korpusunun inşası Heydər Əliyev Fondunun prezidenti Mehriban xanım Əliyeva tərəfindən dəstəklənən layihələrdəndir.

Hər kəs, hər şəxsiyyət tarixi öz əməlləri ilə yazır. Mehriban xanım Əliyeva da xalqına, vətəninə göstərdiyi layiqli xidməti öz həyat fəaliyyətinin əsas prinsiplərinə çevirərək Azərbaycan mədəniyyətinin təbliğinə, mədəni irsimizin qorunub saxlanılmasına daha çox önəm verir. Mehriban xanım Əliyevanın YUNESKO-dakı təqdimat mərasimində dediyi "Muğam da, aşıq yaradıcılığı da, milli musiqi alətlərimizin bənzərsiz melodiyaları da Azərbaycan xalqının bu günə qədər qoruyub saxladığı və gələcək gün naminə qorumağa borclu olduğumuz irsin yalnız bir hissəsidir" sözləri onun öz xalqının gələcəyinə nə qədər diqqətlə yanaşmasının göstəricisi deyilmi?! Mehriban xanım Əliyevanın istər Heydər Əliyev Fondunun, istər Azərbaycan Mədəniyyətinin Dostları Fondunun, istərsə də Azərbaycan Bədii Gimnastika Federasiyasının rəhbəri kimi atdığı bütün addımlar da məhz yeniləşən Azərbaycana yönəlib.

YUNESKO və İSESKO kimi nüfuzlu beynəlxalq təşkilatların xoşməramlı səfiri, Azərbaycan Respublikasının Milli Məclisinin deputatı Mehriban xanım Əliyevanın rəhbərliyi altında fəaliyyət göstərən Heydər Əliyev Fondunun irəli sürdüyü və cəmiyyət tərəfindən böyük dəstək qazanan ictimai təşəbbüslər təkcə konkret sahələrdə mövcud olan problemlərin həllinə yönəlmir. Bu təşəbbüslər çərçivəsində görülən işlər həm də dövlət və vətəndaş birliyini təmin edir.

Bir sözlə, görülən işlər deməyə əsas verir ki, Heydər Əliyev Fondu respublikamızın hər yerində olduğu kimi, Nəsimi rayonunda da sözün həqiqi mənasında xeyirxahlığın, mərhəmətin və quruculuğun əsas ünvanına çevrilmişdir.

Bəxtiyar SADIQOV:

- Hörmətli "dəyirmi masa" iştirakçıları!

Çıxışlara, səslənən dəyərli fikirlərə görə hər birinizə təşəkkür edirəm. Müstəqillik haqqında Konstitusiya Aktı 1991-ci ildə qəbul olunsa da, Azərbaycanın əsl müstəqilliyinin təməlinin ulu öndər Heydər Əliyevin 1993-cü ildə xalqın təkidli tələbi ilə ölkə rəhbərliyinə qayıdışından sonra qoyulması tarixi həqiqətdir. Bununla da ölkəni həm iqtisadi, həm mədəni, həm də mənəvi tənəzzülə aparan xaos aradan qalxdı. Heydər Əliyev özünün zəngin dövlətçilik təcrübəsindən yararlanaraq uçuruma yuvarlanan, böhranlar içində çabalayan, gələcəyini heç kimin aydın təsəvvür etmədiyi Azərbaycanı xilas etdi, dünya birliyinin müstəqil subyekti olmaq hüququnu özünə qaytardı. Əgər ümummilli lider Heydər Əliyev o dövrdə ölkə rəhbərliyinə qayıtmasaydı, müstəqilliyimiz başının üstünü almış qara buludlardan xilas ola bilməyəcəkdi.

1993-cü ildən sonra Heydər Əliyevin uzaqgörən siyasəti və gərgin fəaliyyəti nəticəsində ölkəmizin sosial-iqtisadi inkişafı və dünya iqtisadi sisteminə inteqrasiyası sahəsində çox böyük uğurlar əldə olundu. Ən böyük nailiyyət isə ondan ibarətdir ki, ölkəmizdə aparılan müstəqil dövlət quruculuğu prosesində iqtisadi islahatların və inkişafın Azərbaycan modeli yarandı.

Fərəhli haldır ki, inkişafın Azərbaycan modeli əsasında Prezident İlham Əliyev tərəfindən uğurla həyata keçirilən və yeni çalarlarla zənginləşdirilmiş sosial-iqtisadi siyasətin nəticəsi olaraq ölkəmiz əsas məqsədlərinə çatıb: Azərbaycan iqtisadi sahədə keçid dövrünü başa vurub, sərbəst bazar münasibətlərinə və inkişaf qabiliyyətinə malik sosialyönümlü, diversifikasiya olunmuş milli iqtisadiyyatımız formalaşıb, dünya təsərrüfat sisteminə inteqrasiyamız tam təmin olunub. Davamlı və dinamik inkişaf məntiqinə əsaslanan bu siyasətin həyata keçirilməsi nəticəsində əvvəllər qazanılmış uğurlar daha da möhkəmləndirilib, qeyri-neft sahələrinin, regionların inkişafı sürətlənib, strateji valyuta ehtiyatları artıb, sahibkarlığa dövlət dəstəyi gücləndirilib, əhalinin sosial rifahı davamlı olaraq yaxşılaşıb. Bütün bunlar isə təbii ki, Azərbaycanın müstəqilliyinin daha da möhkəmlənməsinə xidmət edən amillərdir.

Azərbaycan.-2011.-15 sentyabr.-S.4-5.