Sumqayıtda Şəhər Günü bayramı

Bu gün səhər ümummilli lider Heydər Əliyevin abidəsinin ucaldığı eyniadlı prospektdən Şəhər Günü bayramına start verildi. Onu da qeyd edək ki, bu bayrama bir neçə gün idi ki, şəhərdə hazırlıq gedirdi. Bütün gələn bayramları bir-birindən maraqlı qarşılamaq, onlara yeni çalarlar qatmaq Sumqayıtda artıq ənənəyə çevrilmişdir. Müstəqilliyimizin 20 illiyi ərəfəsində keçirilən Şəhər Günü bayramına isə bu dəfə xüsusi hazırlıq görülmüşdü.

Yaşı 60-ı keçən şəhərin sakinləri, dövlət və özəl müəssisələrin bayrama qatılan təmsilçiləri bu əlamətdar tədbirin maraqlı keçməsi üçün əllərindən gələni əsirgəmədilər.

Sumqayıt Şəhər İcra Hakimiyyətinin başçısı Eldar Əzizov abidə önünə toplaşanlara müraciətlə bildirdi ki, ümummilli lider Heydər Əliyev tərəfindən "Kiçik Azərbaycan" adlandırılan Sumqayıt ulu öndərin ideyalarını reallaşdıran nümunə kimi intibah dövrünü yaşamaqdadır. Şəhərimiz gənc olsa da şanlı tarixə malikdir və böyük iqtisadi uğurlar qazanmışdır. Məhz ulu öndərin Azərbaycana rəhbərlik etdiyi dövrdə Sumqayıt sosial-iqtisadi sahədə sürətlə inkişaf etmiş, qarşıda duran vəzifələrin uğurla yerinə yetirilməsində bütün imkanlarını səfərbərliyə almışdır.

Sonra sumqayıtlılar ümummilli lider Heydər Əliyevin abidəsi önünə dərin məhəbbətlərinin rəmzini ifadə edən tər çiçəklər düzdülər.

Tədbir şəhərin Corat kəndində davam etdirildi. Qeyd edək ki, son dövrdə bu qəsəbədə xeyli abadlıq işləri aparılmış, yol infrastrukturu yeniləşmiş, sosial sahədə mühüm işlər görülmüşdür. Qəsəbənin girəcəyində ucaldılan qala divarları üzərinə düzülən toplar, keçmişi xatırladan arabalar, cərgə ilə sıralanan süvarilər tədbir iştirakçılarına tariximizi geriyə vərəqləməyə imkan verdi. Milli adət-ənənələrimizi əks etdirən sərgilər, onlarla eksponat tamaşaçıları gözəlliyi və qədimliyi ilə heyran qoydu.

Süvarilərin düzülüşü və dəvələrin keçidi elə nizamlanmışdı ki, sanki bu zəmanədən qopub 2000 il geriyə atılaraq, özün də hiss etmədən böyük bir təntənəli izdihamın iştirakçısına çevrilirdin.

Məşhur Roma sərkərdəsi Pampeyin Corata səfəri aktyorlar tərəfindən elə gözəl oynanılırdı ki, tədbirə toplaşanlar heyranlıqlarını gizlədə bilmirdilər.

Müxtəlif nazirliklərin, respublikamızda akkreditə olunan ölkələrin səfirliklərinin təmsilçilərinin, Milli Məclisin deputatlarının, qonşu rayonların icra başçılarının, ictimai təşkilatların nümayəndələrinin iştirak etdiyi Şəhər Günü bayramı Kimyaçılar sarayının qarşısında davam etdirildi. Hərbçilərin keçidi ilə başlayan parad respublikamızın şəhər və rayonlarından tədbirə gələnlərin onlara qoşulması ilə davam etdi. İdmançılar, motosikletçilər, kartinqçilər, retro maşınlar, Türkiyənin məşhur "Mehtər", Rusiyanın "Barabançı qızlar", Dağıstanın "Ləzginka" qrupları, respublikamızın müxtəlif bölgələrinin musiqi kollektivləri bənzərsiz çıxışları ilə bayram iştirakçılarını valeh etdilər. İncəsənət ustaları milli adət-ənənələri əks etdirən, yaşı əsrlərlə ölçülən alətləri nümayiş etdirdilər.

Sakinlər şəhərlərində baş verən son dəyişiklikləri və bütün yenilikləri ürəkdən alqışladıqlarını, abadlıq-quruculuq işlərindən razı qaldıqlarını bildirdilər. Ölkə başçısının tövsiyə və tapşırıqlarına həmişə dəstək verən sumqayıtlılar bundan sonra da ön sırada olacaqlarını əminliklə vurğuladılar.

Şəhər Günü bayramı xüsusi proqramla hazırlanmış möhtəşəm bayram konserti və atəşfəşanlıqla başa çatdı.

Akif ƏLİYEV

Azərbaycan.- 2011.- 17 sentyabr.- S. 7.