İranda xalq tətbiqi sənəti ustalarının əl işlərindən ibarət sərgi başa çatmışdır

Xəbər verildiyi kimi, sentyabrın 11-dən 16-dək İranın Xorasan vilayətinin Bocnurd şəhərində İqtisadi Əməkdaşlıq Təşkilatının (İƏT) Mədəniyyət Müəssisəsinin təşkilatçılığı ilə xalq tətbiqi sənəti ustalarının əl işlərindən ibarət sərgi keçirilmişdir.

AzərTAc xəbər verir ki, sərgidə Azərbaycanı tətbiqi sənət ustaları Mehriban Əliyeva-Xəlilzadə və Adil Xəlilzadə təmsil etmişlər. Onların sərgidə nümayiş olunan bədii tikmələri, milli geyimləri və bərpa edilən qədim xovlu-relyefli tikmə texnikası əsasında yaradılmış əsərləri tamaşaçıların marağına səbəb olmuşdur. Həmyerlilərimiz sərgi müddətində İranın bir sıra KİV-inə müsahibələr vermişlər.

Sentyabrın 16-da Şimali Xorasan əyaləti və şəhər rəsmilərinin, İƏT nümayəndələrinin iştirakı ilə sərginin təntənəli bağlanış mərasimində iştirakçılara, o cümlədən azərbaycanlı sənətkarlara "ECO Handcraft Exhibition" (İƏT Əl İşləri Sərgisi) şəhadətnamələri təqdim olunmuşdur.

Azərbaycan.-2011.-18 sentyabr.-S.11.