Azərbaycan Respublikasının Mərkəzi Seçki Komissiyasına daxil olmuş 16 sentyabr 2011-ci il tarixli 13 saylı müraciətə baxılması barədə Azərbaycan Respublikası Mərkəzi Seçki Komissiyasının Qərarı

Qərar N 8/24

Ümid Partiyasının Sumqayıt şəhər təşkilatının sədri Rzayev Elşad Salman oğlu 2011-ci il sentyabrın 16-da Azərbaycan Respublikasının Mərkəzi Seçki Komissiyasına yazılı müraciət edərək, 41 saylı Sumqayıt birinci, 42 saylı Sumqayıt ikinci, 43 saylı Sumqayıt üçüncü və 44 saylı Sumqayıt-Abşeron seçki dairələrinin məntəqə seçki komissiyalarının formalaşdırılması üçün Ümid Partiyasının yerli təşkilatı tərəfindən təqdim edilmiş siyahıların qəbul olunmasından dairə seçki komissiyasının sədrləri tərəfindən qanunsuz imtina edildiyini, məntəqə seçki komissiyası üzvlərinin seçilməsinə dair iclasa Ümid Partiyası nümayəndələrinin dəvət edilmədiyini, müraciətə baxmayaraq, dairə seçki komissiyalarının müvafiq qərarlarının onlara təqdim olunmadığını bildirmiş və bununla əlaqədar qanunla müəyyən edilmiş qaydada tədbirlər görülməsini xahiş etmişdir.

Müraciət Azərbaycan Respublikası Seçki Məcəlləsinin 112 və 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat"a uyğun olaraq Azərbaycan Respublikası Mərkəzi Seçki Komissiyasının nəzdində ekspert qrupunun üzvü tərəfindən nəzərdən keçirilərək bu barədə müvafiq rəy verilmiş və Mərkəzi Seçki Komissiyasının iclasında baxılmışdır.

Müəyyən olunmuşdur ki, yuxarıda adları çəkilən dairə seçki komissiyası səlahiyyətliləri şikayətçini müvafiq seçki komissiyasının iclasına çağırmamaqla qanun pozuntusuna yol verməmişlər. Belə ki, Azərbaycan Respublikası Seçki Məcəlləsinin 19.8-ci maddəsinə əsasən seçki komissiyası iclaslarının yeri və vaxtı barədə məlumatlandırma yalnız həmin seçki komissiyasının üzvlərinə və maraqlı şəxslərə aiddir. Şikayətçi dairə seçki komissiyaları tərəfindən məntəqə seçki komissiyalarının formalaşdırılması barədə iclas haqqında əvvəlcədən məlumatlandırılmalı deyildi. Çünki onun müvafiq məsələ ilə bağlı maraqlı şəxs kimi çıxış etməsi komissiyaya qabaqcadan məlum deyildi.

Seçki Məcəlləsinin 36.2-ci maddəsinə və "Məntəqə seçki komissiyalarının formalaşdırılması qaydaları haqqında" Azərbaycan Respublikası Mərkəzi Seçki Komissiyasının 9 avqust 2008-ci il tarixli Təlumatının 2-ci bəndinə uyğun olaraq Milli Məclisdə azlıq təşkil edən siyasi partiyaların yerli təşkilatları məntəqə seçki komissiyasının üzvlüyünə namizədlərin və onlarla birlikdə əvəzedici üzvlərin siyahılarını dairə seçki komissiyasının sədrlərinə deyil, Milli Məclisdə azlıqda olan siyasi partiyaları dairə seçki komissiyasında təmsil edən üzvlərə təqdim edirlər. Milli Məclisdə azlıqda olan siyasi partiyaları təmsil edən məntəqə seçki komissiyasının üzvlüyünə namizədləri də dairə seçki komissiyasının iclasında məzh həmin üzvlər irəli sürürlər. Buna görə də 4 may 2011-ci il tarixdə Ümid Partiyası tərəfindən təsdiq olunmuş məntəqə seçki komissiyası üzvlüyünə namizədlərin siyahısı yuxarıda göstərilən qaydada və vaxtında verilməli idi.

Bununla yanaşı, müəyyən edilmişdir ki, məntəqə seçki komissiyası üzvlüyünə namizədlərin siyahılarını qəbul etməkdən imtina ilə bağlı şikayətçinin iddiaları dairə seçki komissiyalarının həmin məsələyə həsr olunmuş 10 avqust və 17 avqust 2011-ci il tarixlərində keçirilmiş iclaslarından sonraya, yəni 18 və 24 avqust 2011-ci il tarixlərinə təsadüf edir. Mərkəzi Seçki Komissiyasına ünvanlanmış müraciətin verilmə tarixindən isə müəyyən olunur ki, şikayət seçki qanunvericiliyində nəzərdə tutulmuş müddət ötürülməklə verilmişdir. Əlavə olaraq o da müəyyən olunmuşdur ki, şikayətçi Seçki Məcəlləsinin 112.1-ci maddəsində nəzərdə tutulmuş şikayətvermə hüququ olan subyektlər sırasına aid deyil və onun bütövlükdə siyasi partiya adından şikayət vermək hüququ yoxdur. Buna görə də ekspert qrupunun üzvü haqlı olaraq şikayətin geri qaytarılması barədə rəy vermişdir.

Belə ki, yuxarıda göstərilən Təlimatın 7.1-ci bəndinə əsasən seçki komissiyaları tərəfindən şikayət qeydə alındıqdan və baxılması üçün ekspertə təqdim edildikdən sonra ekspert həmin şikayəti ilkin olaraq nəzərdən keçirir. Bu zaman ekspert şikayətin Seçki Məcəlləsi və bu Təlimatla müəyyən edilmiş qaydaların pozulması ilə daxil olduğunu aşkar etdikdə, bu barədə qrup koordinatorunu məlumatlandırmaqla, şikayətin onu təqdim edən şəxsə geri göndərilməsinə dair rəy verməlidir.

Azərbaycan Respublikası Seçki Məcəlləsinin 112.1-ci maddəsinə və "Azərbaycan Respublikası Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqından Təlimat"ın 4.1.2-ci bəndinə əsasən seçki subyektləri vətəndaşların seçki hüquqlarını pozan qərar və hərəkətlərdən (hərəkətsizlikdən) həmin qərarın dərc edildiyi və ya alındığı, hərəkətin (hərəkətsizliyin) baş verdiyi gündən və ya maraqlı şəxsin bu haqda məlumat aldığı gündən başlayaraq 3 gün müddətində şikayət edə bilərlər.

Ona görə də dairə seçki komissiyasının qeyd edilən qərarlarından qanunvericiliklə müəyyən edilmiş qaydada və müddətdə, buna hüququ olan seçki subyekti tərəfindən şikayət verilmədiyindən müraciət mahiyyəti üzrə araşdırılmadan geri göndərilməlidir.

Yuxarıda göstərilənləri əsas götürərək, Azərbaycan Respublikasının Mərkəzi Seçki Komissiyası Azərbaycan Respublikası Seçki Məcəlləsinin 19.4-cü, 28.2-ci, 112-ci, 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat"ın 1.1-ci, 2.5-ci, 4.1.2-ci və 7.1-ci bəndlərinə əsasən qərara alır:

1. Vətəndaş Rzayev Elşad Salman oğlunun Azərbaycan Respublikasının Mərkəzi Seçki Komissiyasına daxil olmuş 16 sentyabr 2011-ci il tarixli, 13 saylı müraciəti qanunvericiliklə müəyyən olunmuş şikayətvermə müddəti ötürüldüyündən və buna hüququ olan subyekt tərəfindən verilmədiyindən ərizəçiyə geri göndərilsin.

2. Qərar dərc edildiyi gündən qüvvəyə minir.

Sədr Məzahir Pənahov

Katib Arifə Muxtarova

Katib Mikayıl Rəhimov

19.09.2011

Azərbaycan.-2011.-20 sentyabr.-S.5.