Üzeyir Musiqi Gününün təntənəsi

 

Azərbaycanın dahi bəstəkarı, Azərbaycan klassik musiqisinin banisi, musiqişünas alim, ictimai xadim Üzeyir Hacıbəylinin anadan olmasının 126-cı ildönümüÜzeyir Musiqi Günü münasibətilə Naxçıvan Dövlət Universitetində yubiley tədbiri keçirilib.

Mərasimi açan ali məktəbin rektoru akademik İsa Həbibbəyli Üzeyir Hacıbəylinin Azərbaycan klassik musiqisinin inkişafındakı əvəzsiz xidmətlərindən danışaraq, onun pedaqoq, bəstəkar, musiqişünas publisist kimi yaradıcılığına qısa nəzər salıb. Qeyd olunub ki, bu gün sadəcə musiqisevərlərin yox, həm də xalqımızın bayramıdır. Böyük bəstəkarın ad gününün bayram kimi qeyd olunması ənənəsinin əsası görkəmli bəstəkar və dirijor maestro Niyazi tərəfindən qoyulub və hər il ölkəmizdə geniş qeyd olunur. 1995-ci ildə isə ümummilli lider Heydər Əliyevin fərmanı ilə 18 sentyabrın Üzeyir Musiqi Günü kimi qeyd olunması qərara alınıb. Rektor həmçinin tələbə və müəllimləri yeni tədris ilinin başlanması münasibətilə təbrik edərək onlara müvəffəqiyyətlər arzulayıb.

Fortepiano kafedrasının dosenti, sənətşünaslıq üzrə fəlsəfə doktoru Natəvan Qədimova "Üzeyir Hacıbəyli və Azərbaycan musiqi mədəniyyəti" adlı məruzəsində Azərbaycanın peşəkar musiqisinin banisi Üzeyir Hacıbəylinin həyat və yaradıcılığından, milli musiqimizin inkişafında göstərdiyi əvəzsiz xidmətlərdən söhbət açıb. Məruzədə vurğulanıb ki, milli musiqi xəzinəsini yeni janrformalarla zənginləşdirən dahi korifey musiqi təhsilinin əsasını qoyubömrünün sonunadək musiqi mədəniyyətimizin inkişafına rəhbərlik edib. Onun yaratdığı musiqi inciləri dünya şöhrəti qazanıb və dünya musiqi mədəniyyətinin qızıl fonduna daxil olub.

Tədbirin gedişində dahi bəstəkar haqqında videokadrlar da nümayiş olunub.

Yubiley tədbiri dahi bəstəkarın əsərləri əsasında hazırlanan, ali məktəbin incəsənət fakültəsinin müəllim və tələbələrinin ifasında maraqlı konsert proqramı ilə davam etdirilib. Bədii hissədə universitetin Kamera orkestrinin müşayiətilə "Leyli və Məcnun" operasından müqəddimə, "Arşın mal alan" operettasından "Əsgərin ariyası",

"Koroğlu" operasından "Nigarın ariyası" və digər əsərlər ifa olunub.

 

 

Nərmin CƏFƏROVA

 

Azərbaycan.-2011.-20 sentyabr.-S.7.