Astanada TÜRKSOY Mədəniyyət Nazirləri Daimi Şurasının 29-cu iclası işə başlamışdır

Sentyabrın 20-də Astanada TÜRKSOY Mədəniyyət Nazirləri Daimi Şurasının 29-cu iclası öz işinə başlamışdır.

Şuranın iclasında TÜRKSOY-un baş katibi Düsen Kaseinov, Azərbaycan və Türkiyənin mədəniyyət və turizm nazirləri Əbülfəs Qarayev və Ertoğrul Günay, Türkmənistanın mədəniyyət və teleradioyayım naziri Qulmırat Mıradov, Qazaxıstanın mədəniyyət naziri Muxtar Kul-Muxammed, qurumda müşahidəçi statusu olan subyektlərin mədəniyyət nazirləri iştirak edirlər.

Qazaxıstanın mədəniyyət naziri Muxtar Kul-Muxammed iclas iştirakçılarını salamlamış, türkdilli ölkələr arasında əməkdaşlığın genişləndirilməsi istiqamətində müxtəlif festivalların keçirilməsini yüksək qiymətləndirmişdir. Onun sözlərinə görə, "Operaliya" və Mərkəzi Asiya ölkələrinin teatrı, həmçinin "Avrasiya" kinofestivallları kimi layihələr bizi daha da yaxınlaşdırır.

Sentyabrın 20-də keçirilən iclasda Ertoğrul Günay TÜRKSOY-un müvəqqəti əlaqələndiricisi seçilmişdir.

Şuranın iclasında türkdilli ölkələr arasında mədəni-humanitar sahələrdə əlaqələrin daha da dərinləşdirilməsi məsələləri müzakirə olunacaq, həmçinin 2011-2014-cü illər üçün TÜRKSOY-un baş katibi yenidən seçiləcəkdir.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.-2011.-21 sentyabr.-S.6.