Ərzaq Təhlükəsizliyinin Monitorinq Sisteminin Azərbaycanda tətbiqinə dair müzakirələr aparılır

Sentyabrın 21-də Bakıda BMT-nin Dünya Ərzaq Proqramının (DƏP) təşkilatçılığı ilə "Ərzaq Təhlükəsizliyinin Monitorinq Sisteminin (ƏTMS) təqdimatı və tətbiqi" mövzusunda ikigünlük seminar öz işinə başlamışdır.

AzərTAc xəbər verir ki, seminarın açılışında Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov, BMT-nin Azərbaycandakı rezident əlaqələndiricisi Fikrət Akçura, DƏP-in ölkəmizdəki nümayəndəliyinin rəhbəri Fuad Hüseynov mövzunun əhəmiyyətindən və vacibliyindən danışmışlar.

Əli Həsənov diqqətə çatdırmışdır ki, Azərbaycanda məcburi köçkünlər də daxil olmaqla əhalinin aztəminatlı təbəqələrinin ərzaq təhlükəsizliyi və sosial təminat sistemlərinin vəziyyətinin qiymətləndirilməsi, DƏP-in ölkədəki gələcək rolu və fəaliyyəti ilə bağlı iki missiya cari ilin əvvəllərində Azərbaycanda səfərdə olmuş, məsləhətləşmələr aparmışlar. Missiyaların rəyinə görə, artıq dünyanın 30-dan çox ölkəsində təcrübədən keçmiş və öz yüksək səmərəliliyini nümayiş etdirmiş ƏTMS-in Azərbaycanda da tərtib və tətbiq olunması, DƏP-in qlobal şəbəkəsinə qoşulması tövsiyə edilmişdir. Bu mexanizm vasitəsilə müxtəlif kontekstdə ərzaq təhlükəsizliyinin vəziyyətini müntəzəm surətdə təhlil edərək bu sahədə ehtimal oluna biləcək problemlərin əvvəlcədən, vaxtında qarşısını almaq mümkündür.

Baş nazirin müavini Dağlıq Qarabağ probleminə də toxunmuş, bir milyondan çox soydaşımızın qaçqın və məcburi köçkün vəziyyətinə düşdüyünü xatırlatmış, Ermənistanın hələ də öz işğalçılıq siyasətindən əl çəkmədiyini və mötəbər beynəlxalq təşkilatların qəbul etdiyi sənədlərə məhəl qoymadığını təəssüf hissi ilə qeyd etmişdir.

Seminarda Ərzaq Təhlükəsizliyi Monitorinq Sisteminin ətraflı təqdimatı, digər ölkələrdə bu sahədə qazanılmış təcrübənin öyrənilməsi və nəzərdən keçirilməsi, sistemin Azərbaycanda da mümkün tətbiqinə dair müxtəlif hökumət qurumlarını təmsil edən nümayəndələrlə fikir mübadiləsi aparılır.

Seminarda mövzu ilə bağlı təqdimatlar olmuş, müzakirələr aparılmış, təklif və tövsiyələr səsləndirilmişdir.

Tədbirdə DƏP-in ekspertləri, aidiyyəti nazirliklər və dövlət komitələrinin nümayəndələri iştirak edirlər.

Azərbaycan.-2011.-22 sentyabr.-S.2.