Azərbaycan ilə Bolqarıstan arasında mədəniyyət və turizm sahələrində əməkdaşlığı genişləndirmək üçün potensial imkanlar mövcuddur

 

Ölkəmizdə səfərdə olan Bolqarıstanın iqtisadiyyat, energetika və turizm naziri Trayço Traykov sentyabrın 21-də mədəniyyət və turizm naziri Əbülfəs Qarayev ilə görüşmüşdür.

AzərTAc xəbər verir ki, görüşdə Azərbaycan ilə Bolqarıstan arasında müxtəlif sahələrdə, o cümlədən turizm sektorunda əməkdaşlığın genişləndirilməsi məsələləri müzakirə olunmuşdur.

Nazir Ə.Qarayev son illər ölkəmizdə keçirilən genişmiqyaslı beynəlxalq festivallar, forumlar haqqında qonağa məlumat vermişdir. Bu il aprelin 7-dən 9-dək Bakıda keçirilmiş Ümumdünya Mədəniyyətlərarası Dialoq Forumunda Bolqarıstan nümayəndə heyətinin fəal iştirakını vurğulayan Ə.Qarayev, yaxın vaxtlarda ölkəmizdə Bolqarıstan Mədəniyyət günlərinin keçiriləcəyini diqqətə çatdırmışdır. O, turizm sahəsində əməkdaşlığı daha da genişləndirmək məqsədilə Bolqarıstanda fəaliyyət göstərən turizm şirkətlərini hər ilin aprel ayında Bakıda keçirilən Azərbaycan Beynəlxalq Turizm və Səyahətlər Sərgisinə dəvət etmişdir.

Tədbirdə Bolqarıstanın zəngin turizm potensialına malik olduğu, burada qış turizminin yaxşı inkişaf etdiyi, həmçinin iki ölkə arasında müxtəlif sahələr, o cümlədən turizm sahəsi üzrə təcrübə mübadiləsinin əhəmiyyəti vurğulanmışdır.

T.Traykov ölkəsinin turizm potensialı barədə ətraflı məlumat vermiş, Bolqarıstanın Azərbaycan ilə əməkdaşlığa hazır olduğunu, qarşılıqlı əlaqələri genişləndirməyin hər iki tərəfə fayda gətirə biləcəyini söyləmişdir. Bakıda keçirdiyi yüksək səviyyəli görüşlərdən danışan qonaq bu görüşlərin ölkələrimiz üçün səmərəli olacağına, ikitərəfli münasibətlərin möhkəmləndirilməsinə böyük töhfə verəcəyinə əminliyini ifadə etmişdir.

Bolqarıstan nümayəndə heyətinin sentyabrın 22-də Bakıda keçiriləcək Azərbaycan-Bolqarıstan biznes forumunda iştirak etmək üçün ölkəmizə gəldiyini deyən T.Traykov həmin tədbirə qatılmaqdan məmnunluq duyduğunu bildirmiş, səmimi görüş üçün minnətdarlığını çatdırmışdır.

 

 

Azərbaycan.-2011.-22 sentyabr.-S.3.