Astanada TÜRKSOY Mədəniyyət Nazirləri Daimi Şurasının 29-cu iclası keçirilmişdir

Astanada TÜRKSOY Mədəniyyət Nazirləri Daimi Şurasının 29-cu iclası öz işini başa çatdırmışdır.

Şuranın iclasında TÜRKSOY-a üzv dövlətlərin və müşahidəçi statusu olan subyektlərin mədəniyyət nazirləri və ya müavinləri, həmçinin qurumun baş katibi Düsen Kaseinov iştirak etmişlər.

İclasda Düsen Kaseinov yenidən 2011-2014-cü illər üçün TÜRKSOY-un baş katibi seçilmiş, Türkiyənin mədəniyyət və turizm naziri Ertoğrul Günay qurumun müvəqqəti əlaqələndiricisi olmuşdur.

Şuranın iclasında bu ölkələr arasında mədəni-humanitar sahələrdə əlaqələrin daha da dərinləşdirilməsi, Astana şəhərinin 2012-ci ildə türk dünyasının mədəniyyət paytaxtı elan olunması çərçivəsində keçiriləcək tədbirlər, 2012-ci ilin görkəmli xakas şərqşünası və türkoloqu Nikolay Katanovun anadan olmasının 150 illik yubileyi ilə bağlı "Katanov ili" elan olunması, türkdilli ölkələrin dövlət müstəqilliklərinin 20-ci ildönümü ilə əlaqədar keçirilən tədbirlər, növbəti ildə TÜRKSOY-un fəaliyyət proqramı və Mədəniyyət Nazirləri Daimi Şurasının 30-cu iclasına hazırlıq və digər məsələlər müzakirə olunmuş, müvafiq qərarlar qəbul edilmişdir.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.-2011.-22 sentyabr.-S.3.