«Qaz İnfrastruktur Dünyası: Xəzər-2011» beynəlxalq konfransı işə başlamışdır

Sentyabrın 21-də Bakıda "Hyatt Regency-Naxçıvan" hotelində "Qaz İnfrastruktur Dünyası: Xəzər-2011" mövzusunda beynəlxalq konfrans işə başlamışdır.

AzərTAc xəbər verir ki, ARDNŞ-in prezidenti Rövnəq Abdullayev konfransda "Cənub qaz dəhlizi" strategiyasının həyata keçirilməsində Azərbaycanın rolu" mövzusunda çıxış edərək, ölkəmizin neft-qaz sənayesinin inkişafından bəhs etmişdir. Qeyd etmişdir ki, bu il 15-ci ildönümü tamam olan "Şahdəniz" layihəsi üzrə Hasilatın Pay Bölgüsü haqqında Saziş 1996-cı ildə imzalanmışdır. 1999-cu ildə kəşf olunan və xarici tərəfdaşlarla birlikdə işlənilən "Şahdəniz" yatağı dəniz akvatoriyalarında ən iri qaz-kondensat yataqlarından hesab edilir. Yatağın ehtiyatları 1,2 trilyon kubmetr qaz və 240 milyon tondan artıq kondensat həcmində qiymətləndirilir. "Şahdəniz" layihəsinin 1-ci fazası çərçivəsində hasilat 2006-cı ildən davam edir. Hazırda burada orta gündəlik hasilat təxminən 23 milyon kubmetr qaz və 5 min ton kondensat həcmindədir. Bu layihənin müvəffəqiyyətlə həyata keçirilməsi respublikanın daxili tələbatını ödəməyə və xaricdən qaz idxalına son qoymağa imkan yaratmış, Azərbaycan 2007-ci ildən qaz idxal edən ölkədən qaz ixrac edən ölkəyə çevrilmişdir. "Şahdəniz-1" layihəsi üzrə hasil olunan qaz Səngəçal terminalında ilkin emal edilərək, Cənubi Qafqaz boru kəməri vasitəsilə Bakı-Tbilisi-Ərzurum marşrutu üzrə Gürcüstana və Türkiyəyə ixrac olunur. Yeni yataqların kəşf olunması ilə Azərbaycanın qaz potensialının artdığını deyən R.Abdullayev ötən il "Ümid", bu yaxınlarda isə "Abşeron" yatağının kəşf edildiyini diqqətə çatdırmışdır. Həmçinin, "Naxçıvan" və "Babək" perspektivli strukturlarının işlənməsi ilə də bağlı planlar mövcuddur.

ARDNŞ-in xarici əlaqələrindən və beynəlxalq layihələri barədə məlumat verən R.Abdullayev demişdir ki, Azərbaycan hasil etdiyi təbii qazı Avropanın artan qaz tələbatını ödəməyə və bu məqsədlə də nəqlin şaxələndirilməsinə tərəfdardır. Bir neçə boru kəmərinə, qaz alıcısına, tranzit marşrutlarına və çatdırılma nöqtələrinə çıxışın əldə olunması, istehsalçı ilə son istehlakçılar arasında birbaşa əlaqənin yaradılması, alternativlər arasında ən dəyərli kommersiya təklifinin seçilməsi, tranzit azadlığı, habelə təbii qazın nəqli zamanı şəffaf xərclərə əsaslanan sabit tranzit rejimlərindən istifadə olunması, diskriminasiyaya yol verilməməsi bu baxımdan beynəlxalq hüquqa əsaslanan başlıca prinsiplərdir. Biz istər istehsalçı, istərsə də tranzit ölkə kimi bu prinsiplərə sadiqik və qarşı tərəflərdən də bunu gözləyirik.

Sonra konfransda Avropa İttifaqının Azərbaycandakı nümayəndəliyinin rəhbəri, səfir Roland Kobianın "Enerji təhlükəsizliyində Xəzər qazının rolu və Avropanın tələbatı", Türkiyənin Enerji və Təbii Ehtiyatlar Nazirliyinin tranzit neft kəmərləri şöbəsinin müdiri Reha Aygül Muradoğlunun "Türkiyə infrastrukturu ilə qazın nəqli və mövcud imkanlar", "OMV Gas & Power" şirkətinin nümayəndəsi Luca Della Gattanın "Xəzər qazının Avropaya nəqli - region üçün çağırışlar və imkanlar", "RWE Supply & Trading" şirkətinin nümayəndəsi Volfgang Peterin "Xəzər regionu üçün beynəlxalq qaz qiymətləndirməsi və potensial təsirlər" və s. mövzularda çıxışlar dinlənilmişdir.

Qeyd edək ki, Avropanın qaz təchizatına həsr olunmuş üçgünlük beynəlxalq konfransda regionun, xüsusilə Xəzər qazının qitənin enerji təhlükəsizliyi məsələlərinin həllində rolu əsas müzakirə obyektidir. Tədbirdə qaz hasilatı və istehlakçılar üçün enerji təhlükəsizliyi, dünyadakı qaz qiymətlərinin Xəzər regionuna təsiri, boru kəməri layihələri, Xəzər dənizində qaz hasilatı, tranzit qaz ölkələrinin rolu, qaz təchizatında əlavə mənbələr, Xəzərin qaz bazarının perspektivləri və s. məsələlər müzakirə olunacaqdır.

Konfransın sponsorları "Trans Adriatic Pipeline" (TAP), "RWE Supply & Trading", "ING Commercial Banking", "OMV Gas & Power", "Public Gas Corporation" (DEPA S.A.), "GDF Suez" və "Terrapinn" şirkətləridir.

Azərbaycan.-2011.-22 sentyabr.-S.6.