Dağlıq Qarabağ separatçıları növbəti dəfə biabırçı duruma düşdülər

Xəbər verildiyi kimi, Dağlıq Qarabağın separatçı rejimi sentyabrın 18-də Azərbaycanın işğal olunmuş ərazisində "yerli özünüidarə orqanlarına seçkilər" "keçirmişdir". Əgər buna seçki demək olarsa. Çünki hansısa bir beynəlxalq təşkilatın müşahidə missiyası tərəfindən izlənilməyən və təbii ki, nəticələri hələ əvvəlcədən tanınmayan bu seçki imitasiyası, sadəcə, Dağlıq Qarabağın "müstəqil respublika" olduğunu dünayada tanıtmağa hesablanmış bir vasitədir.

Separatçıların "seçkilər"i bu dəfə də beynəlxalq ictimaiyyətin diqqətindən kənarda qalmayıb. Təbii ki, yenə də ermənilərin arzulamadığı bir şəkildə. "Seçkini" pisləyən ilk bəyanat ABŞ-ın Dövlət Departamentindən gəldi. Departamentin mətbuat xidmətinin rəsmisi bu məsələyə münasibət bildirərkən demişdir: "Bu "qondarma" seçkilər Dağlıq Qarabağın yekun hüquqi statusunun münaqişənin danışıqlar yolu ilə dinc həlli prosesinin geniş çərçivəsində müəyyənləşdirilməsinə maneə törətməməlidir. Biz ATƏT-in Minsk qrupunun həmsədri kimi tərəflərlə işləyərək Dağlıq Qarabağ münaqişəsinin Helsinki Yekun Aktının prinsipləri, o cümlədən zorakılıqdan çəkinmə, ərazi bütövlüyü, insanların bərabər yaşamaq hüquqları əsasında uzunmüddətli və dinc həlli yolunun tapılmasına sadiq qalırıq".

Ermənistan tərəfinin işğalçılıq siyasətindən irəli gələn destruktiv mövqeyinə söykənən bu hərəkəti Azərbaycan Konstitusiyası və beynəlxalq hüququn norma və prinsipləri ilə ziddiyyət təşkil etməklə yanaşı, hazırda davam edən sülh danışıqlarına maneçilik törədir. Bu, rəsmi Yerevanın dəstəyi ilə separatçı rejim tərəfindən keçirilən birinci belə "seçki" deyil. Əvvələr də işğal olunmuş Azərbaycan ərazilərində qondarma respublika tərəfindən bir neçə dəfə "parlament" və "prezident seçkiləri" keçirilmişdir. Hər dəfə də beynəlxalq təşkilatlar konkret sərt mövqelərini ortaya qoymuş, yaydıqları bəyanatlarda bu cür "seçkilər"i qeyri-legitim adlandıraraq onun aparılan sülh danışıqlarına kölgə saldığını xüsusi vurğulamışlar. Dağlıq Qarabağın separatçı rejiminin keçirdiyi "seçkilər"i birmənalı olaraq tanımayan beynəlxalq təşkilatlar bu ərazidə hər hansı bir legitim seçkinin problemin yoluna qoyulmasından sonra keçirilməsinin mümkünlüyünü bəyan etmişlər.

Beynəlxalq təşkilatlar tərəfindən səslənən bəyanatlardan o da hiss olunur ki, Ermənistan belə "seçkilər"lə Dağlıq Qarabağın və Azərbaycanın digər ərazilərinin işğalı və bu ərazilərdə azərbaycanlı əhaliyə qarşı həyata keçirdiyi etnik təmizləmə siyasəti barədə kifayət qədər xəbərdar olan beynəlxalq ictimaiyyəti hec vaxt aldada bilməyəcək.

Sülh danışıqlarının intensivləşdiyi, Dağlıq Qarabağ probleminin həllinə maraq göstərən beynəlxalq təşkilatların nikbin bəyanatlarının çoxaldığı bir vaxtda qondarma respublikada keçirilən seçkilər göstərir ki, rəsmi Yerevan problemin masa ətrafında çözülməsində qətiyyən maraqlı deyil.

Təbii ki, hadisələrin bu səpkidə cərəyan etməsi Azərbaycanın mövqelərini daha da gücləndirir və bu problemin tezliklə ölkəmizin ərazi bütövlüyü çərçivəsində həll olunacağını söyləməyə əsas verir.

Elçin CƏFƏROV

Azərbaycan.-2011.-22 sentyabr.-S.8.