Azərbaycan regionun iqtisadi güc mərkəzinə çevrilib

Prezident İlham Əliyevin Qobustan və Şamaxı rayonlarına `1səfəri böyük sosial obyektlərin açılışı ilə əlamətdar oldu

Demokratik cəmiyyət quruculuğu yolunda sürətlə irəliləyən, sosial-iqtisadi sahədə gündən-günə daha böyük yüksəlişlərə nail olan Azərbaycan regionun mühüm iqtisadi güc mərkəzinə çevrilib. Ötən 8 il ölkədə həyata keçirilən liberal iqtisadi siyasət makroiqtisadi və maliyyə sabitliyinin qorunmasının təmin edilməsi, dayanıqlı iqtisadi artım və iqtisadiyyatın modernləşməsinə dəstək verən siyasətin yürüdülməsi, qeyri-neft sektorunun sürətlə inkişaf etdirilməsi kimi yadda qalmışdır. Bölgələrin tarazlı və davamlı inkişafına xidmət edən dövlət proqramlarının uğurlu icrası yeni iş yerlərinin açılmasına, infrastrukturun yeniləşdirilməsinə, sahibkarlığın inkişafına böyük imkanlar açmışdır.

2009-2013-cü illəri əhatə edən regionların sosial-iqtisadi inkişafına dair Dövlət Proqramının qəbulundan ötən müddət ərzində regionlarda infrastrukturun bərpası və inkişafı, əhalinin kommunal xidmətlərlə təminatının, elektrik enerjisi, qaz və su ilə təchizatının yaxşılaşdırılması, səhiyyə və təhsil müəssisələrinin tikintisi, əhalinin sosial vəziyyətinin daha da yaxşılaşdırılması istiqamətində mühüm əhəmiyyətli tədbirlər həyata keçirilmiş, bu sahəyə irihəcmli dövlət investisiyaları yönəldilmişdir. Əhalinin sosial təminatı, yerli əhəmiyyətli yolların təmiri və bərpası sahəsində böyük irəliləyişlər əldə edilmişdir. Regional inkişafa xidmət edən kompleks tədbirlərin həyata keçirilməsi milli iqtisadiyyatın neft amilindən asılılığının qeyri-neft sektorunun tərəqqisi hesabına aradan qaldırılması üçün geniş imkanlar açmışdır. Bölgələrin tarazlı inkişafına xidmət edən proqramların icrasının başlanmasından, yəni 2004-cü ilin fevralından bugünə qədər ölkəmizdə 900 mindən artıq iş yeri açılmışdır. İş yerlərinin açılması, yeni müəssisələrin işə salınması nəticəsində isə ölkə daxilində istehsal olunan mal-məhsulların sayı artır, ixracdan asılılıq azalır.

Azərbaycan Prezidentinin indiyə qədər imzaladığı strateji əhəmiyyətli dövlət proqramları vətəndaşları uzun illərdən bəri narahat edən, qayğılandıran bir sıra problemlərin kompleks həllini nəzərdə tutur. Ölkə başçısı mövcud problemlərin aradan qaldırılması məqsədilə imzaladığı dövlət proqramlarının, fərman və sərəncamların icrası vəziyyəti ilə yerindəcə tanış olmaq, sıravi vətəndaşlarla birbaşa ünsiyyət quraraq mövcud çətinliklər barədə informasiyaları ilkin mənbədən almaq üçün vaxtaşırı Azərbaycanın müxtəlif rayonlarına səfərlər edir. Ölkə başçısının bölgələrə hər bir səfəri isə mühüm sosial obyektlərin açılışı ilə əlamətdar olur.

Azərbaycanın müxtəlif guşələrində müşahidə olunan abadlıq, yüksəliş Qobustan və Şamaxı rayonlarında da qabarıq görünür. Adıçəkilən rayonlarda ötən müddətdə tikinti-quruculuq işləri geniş vüsət almış, yol-nəqliyyat sisteminin əsaslı təmirinə və yenidən qurulmasına başlanılmış, əhalinin kommunal problemlərinin həlli, infrastrukturun yeniləşdirilməsi istiqamətində vacib addımlar atılmışdır. Azərbaycan Prezidenti İlham Əliyevin Qobustan və Şamaxı rayonlarına səfəri də mühüm sosial infrastrukturların açılışı ilə əlamətdar olmuşdur. Ölkə başçısı Qobustanda müasir taxıl anbarı kompleksi ilə tanış olmuş, Qobustan Eksperimental Poliqonu və Tədris Mərkəzinin açılışında iştirak etmişdir. Məlumat üçün bildirək ki, 38 hektar ərazidə inşa olunan mərkəz külək, günəş və bioqaz stansiyaları ilə təchiz edilmişdir. Bu mərkəz ölkədə alternativ enerjinin hər üç yolla əldə edilməsi istiqamətində görülən işlərin real nümunəsidir. Poliqon ərazisində hər birinin gücü 0,9 meqavata çatan üç külək turbini, 1,8 meqavat gücündə günəş enerjisi stansiyası və 1 meqavat gücündə bionerji qurğusu quraşdırılmışdır. Burada, eyni zamanda tənzimləyici qurğu, su anbarı, sınaq meydanı, emalatxana fəaliyyət göstərir. Ərazidə yaradılan xüsusi avtodayanacaqda isə elektrik enerjisi ilə işləyən avtomobillərin akkumulyatorlarını cərəyanla doldurmaq mümkündür. Bir neçə dəqiqə ərzində enerji ilə təchiz edilən avtomobil 250 kilometr qət edə bilər. Ərazidə birmərtəbəli 10 yaşayış binası inşa olunmuşdur ki, onların da işıqlandırma sistemi günəş enerjisi ilə işləyir. Prezident İlham Əliyev bildirmişdir: "Azərbaycan inkişaf edir. Azərbaycanda bütün qabaqcıl texnologiyalar tətbiq edilir. Ölkəmizdə istənilən sahədə, o cümlədən bizim üçün yeni olan bərpa edilən enerji sahəsində dünyada mövcud olan ən yüksək standartlar tətbiq edilir. Sual yarana bilər: Azərbaycanın zəngin neft-qaz yataqları olduğu təqdirdə nə üçün biz bu işə o qədər böyük maraq göstəririk?! Mən hesab edirəm, məhz o ölkələr ki, təbii ehtiyatlarla zəngindirlər, onlar bu işlərdə qabaqcıl rol oynamalıdırlar. Bizim təbii ehtiyatlarımız vardır. Biz enerji təhlükəsizliyimizi tam şəkildə təmin edə bilmişik. Bu gün nəinki özümüzü, qonşu ölkələri də həm elektrik enerjisi ilə, həm qazla, neftlə təmin edirik. Ancaq biz istəyirik ki, bu işlər daha da səmərəli şəkildə görülsün. Təbii ehtiyatlarımızdan daha da az, bərpa olunan alternativ enerji mənbələrindən isə tam şəkildə istifadə edək".

Prezident İlham Əliyev Şamaxı rayonuna səfəri çərçivəsində Olimpiya İdman Kompleksində, Gümə məscidində, "Şirvan" mehmanxanasında aparılan yenidənqurma işlərinin gedişi ilə də tanış olmuşdur. Qeyd edək ki, Olimpiya İdman Kompleksində yenidənqurma işləri ötən il başlanmışdır. Layihəyə əsasən 2,5 min kvadratmetr sahəsi olan əsas binanın və digər yardımçı binaların fasadı müasir örtüklə və xüsusi dizayna malik şüşələrlə üzlənir. Kompleksdə məşqlər üçün 1500 kvadratmetrlik yeni idman zalı yaradılır. Binanın daxilində trenajor, fitnes, konfrans zalları və sauna qurulacaqdır. Ərazidə müasir tələblərə uyğun 8 kottec inşa edilir ki, burada ümumilikdə 60 nəfəri yerləşdirmək mümkün olacaqdır. Ölkə başçısı Şamaxıda Vergilər Nazirliyinin Tədris Mərkəzinin açılışında da iştirak etmişdir. Tədris Mərkəzi ən müasir standartlara cavab verən avadanlıqlarla təchiz olunmuşdur. Bu avadanlıqların istifadəyə verilməsi vergi sistemində həyata keçirilən islahatların daha dolğun yerinə yetirilməsinə geniş imkanlar açacaqdır.

Milli-mənəvi dəyərlərimizin qorunmasını və inkişaf etdirilməsini daim diqqətdə saxlayan Prezident İlham Əliyevin tapşırıqlarına əsasən, paytaxtda və bölgələrimizdə son 8 ildə dini ziyarətgahların əsaslı təmiri və yenidən qurulması istiqamətində mühüm işlər həyata keçirilmişdir. Azərbaycan Prezidentinin islam mədəniyyəti nümunələri olan tarixi-memarlıq abidələrinin, məscidlərin, ziyarətgahların, müqəddəs dini sitayiş və inanc yerlərinin təmiri, bərpası ilə bağlı xüsusi sərəncamlar imzalaması və bu işi şəxsi nəzarətinə götürməsi deyilənləri bir daha təsdiqləyir. Prezident İlham Əliyevin ötən illərdə Şamaxıya səfəri zamanı Cümə məscidində olması və "Şamaxıdakı Cümə məscidi Dövlət Tarix-Memarlıq Abidəsinin bərpası ilə əlaqədar tədbirlər haqqında" sərəncam imzalaması buna əyani misaldır.

Azərbaycanın dini-etnik sivilizasiyaların qovuşduğu məkan kimi tanınmasında ictimai statusla fəaliyyət göstərən Heydər Əliyev Fondu da yaxından iştirak edir. 2004-cü il mayın 10-dan fəaliyyətə başlayan Neydər Əliyev Fondu bu istiqamətdə həyata keçirdiyi layihələrlə, irəli sürdüyü nəcib və xeyirxah təşəbbüslərlə ümumxalq məhəbbətini özü üçün təmin etmiş, xalqın dərin inam və etimadını qazanmışdır. Fondun Prezidenti Mehriban xanım Əliyevanın təşəbbüsü ilə reallaşan "Tolerantlığın ünvanı: Azərbaycan" layihəsi çərçivəsində Şamaxıdakı Cümə məscidində aparılan işlər Azərbaycan-Şərq memarlığının incisi olan bu abidəyə də ikinci həyat verir.

Ölkəmizin başçısı Şamaxı Astrofizika Rəsədxanasında aparılan yenidənqurma işləri ilə də tanış olmuşdur. Azərbaycan elminin inkişafına böyük diqqət göstərən Prezident İlham Əliyev rəsədxananın yenidən qurulması, burada təmir-bərpa işlərinin aparılması ilə bağlı sərancam və tapşırıqlar vermişdir. Ölkə başçısının 2008-ci ilin sentyabrında və 2009-cu ilin iyulunda imzaladığı sərəncamlarla rəsədxananın maddi-texniki bazasının gücləndirilməsi və əsaslı təmir-tikinti işlərinin aparılması üçün Prezidentin Ehtiyat Fondundan 8 milyon manat vəsait ayrılmışdır. Prezident İlham Əliyev bununla bağlı bildirmişdir: "Bu rəsədxananın yenidən qurulması və burada gözəl şəraitin yaradılıması məni çox sevindirir. Hələ üç il bundan əvvəl rəsədxananın yenidən qurulması, burada aparılacaq təmir-tikinti işləri ilə əlaqədar sərəncam imzalamışdım. Sərəncam icra edilir və bu gün həm inzibati binalar gözəl tikilir, demək olar ki, yenidən tikilir. Həm də yaşayış binaları tikilir, alimlər üçün beşmərtəbəli iki bina bu gün istismara verilir. Əvvəlki dövrdə tikilmiş binalar, demək olar ki, yararsız vəziyyətə düşmüşdür və yeni binaların, uşaq bağçasının, tibb məntəqəsinin, gözəl ictimai yerlərin tikintisi, görülən bütün bu işlər bir də onu göstərir ki, Azərbaycan güclü dövlətdir. Azərbaycan dövləti elmə və elmi işçilərə həmişə böyük diqqətlə yanaşmışdır".

Regional inkişaf sahəsində əldə olunmuş yüksək nəticələr deməyə əsas verir ki, respublikamız yeni inkişaf mərhələsinə qədəm qoymuşdur. Hər bir vətəndaşın maraq və mənafeyinə hesablanan iqtisadi siyasətin uğurla davam etdirilməsi Azərbaycanın daha böyük nailiyyətlər qazanacağına deməyə əsas verir.

Azərbaycan.-2011.-23 sentyabr.-S.1.