Pakistan həmişə Azərbaycanı dəstəkləyir və hər zaman onun yanındadır

Pakistan həmişə Azərbaycanı dəstəkləyir və hər zaman onun yanındadır. AzərTAc xəbər verir ki, bu sözləri sentyabrın 22-də Pakistan İslam Respublikasının Azərbaycandakı səfiri İnayatullah Kakar ölkəsinin cənubundakı Sind əyalətində baş vermiş təbii fəlakətin ağır fəsadları ilə bağlı keçirdiyi mətbuat konfransında demişdir.

Seldən ümumilikdə 23 rayonda milyonlarla insanın zərər çəkdiyini, 361 nəfərin isə həlak olduğunu qeyd edən diplomat Pakistan hökumətinin yardım üçün beynəlxalq ictimaiyyətə müraciət etdiyini bildirmişdir. Bundan əvvəl də baş vermiş təbii fəlakətlər zamanı Azərbaycanın Pakistana ilk yardım edən ölkələrdən olduğunu vurğulayan səfir demişdir: "Biz azərbaycanlı dostlarımızdan çətin vəziyyətdə olan qardaşlarına maddi yardım göstərmələrini xahiş edirik. Yardım etmək istəyənlər pul vəsaitlərini Pakistan Milli Bankının Bakı filialında Baş nazirin Yardım Fondunun 4501000000203000 nömrəli bank hesabına köçürə bilərlər".

Ermənistan-Azərbaycan, Dağlıq Qarabağ münaqişəsinə toxunan səfir diplomat vurğulamışdır ki, Pakistan bu problemin beynəlxalq hüququn normaları və prinsipləri çərçivəsində ədalətli həllinin tərəfdarıdır. Münaqişə həll olunmayana qədər Pakistan Ermənistan dövlətini tanımayacaqdır.

Azərbaycan.-2011.-23 sentyabr.-S.1.