Konstitusiya Məhkəməsinin sədri Kiyevdə

beynəlxalq konfransda iştirak etmişdir

Azərbaycan Respublikası Konstitusiya Məhkəməsinin sədri Fərhad Abdullayevin başçılıq etdiyi nümayəndə heyəti Ukrayna Konstitusiya Məhkəməsinin sədri Anatoli Qolovinin dəvəti ilə Kiyev şəhərində keçirilən beynəlxalq konfransda iştirak etmişdir.

Konstitusiya Məhkəməsinin mətbuat xidmətindən AzərTAc-a bildirmişlər ki, Ukrayna Konstitusiya Məhkəməsinin 15 illik yubileyinə həsr olunmuş beynəlxalq məhkəmə konfransında MDB və Avropa ölkələrinin konstitusiya məhkəmələrinin sədrləri və tanınmış hüquqşünaslar konstitusiya hüququ mövzusunda müxtəlif müzakirələr aparmışlar.

Tədbirin proqramına uyğun olaraq konfransda Azərbaycan Respublikası Konstitusiya Məhkəməsinin sədri Fərhad Abdullayev "Azərbaycan Respublikası Konstitusiya Məhkəməsində insan hüquqları müdafiəsinin mexanizmi" mövzusunda çıxış etmişdir. Səfər çərçivəsində həmçinin Azərbaycan ilə Ukrayna arasında məhkəmə-hüquq sahəsində əməkdaşlıq məsələləri müzakirə edilmişdir.

Azərbaycan.-2011.-23 sentyabr.-S.3.