Azərbaycanın xarici işlər naziri BMT Baş Məclisinin 66-cı sessiyası çərçivəsində ikitərəfli görüşlər keçirmişdir

BMT Baş Məclisinin 66-cı sessiyasının ümumi müzakirələrində iştirak edən Azərbaycanın xarici işlər naziri Elmar Məmmədyarov Rusiya, İsrail, Botsvana, Ukrayna, Gürcüstan, Lüksemburq, Fici, Fələstin, İordaniya və Əlcəzairin xarici işlər nazirləri ilə görüşlər keçirmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşlərdə ikitərəfli münasibətlərin inkişaf perspektivləri, xüsusilə də iqtisadi, enerji, turizm və kənd təsərrüfatı sahələrində iş birliyinin imkanlarının dəyərləndirilməsi məqsədi ilə qarşılıqlı səfərlərin həyata keçirilməsi və iqtisadi əməkdaşlığın genişləndirilməsi üçün biznes forumların təşkili məsələləri müzakirə olunmuşdur.

Bundan əlavə, Azərbaycanın həmin ölkələrlə beynəlxalq təşkilatlar çərçivəsində əməkdaşlığının möhkəmləndirilməsi məsələsi ətrafında da fikir mübadiləsi aparılmışdır.

Azərbaycan.-2011.-23 sentyabr.-S.3.