CEİBC-yə daxil olan şirkətlərin ARDNŞ ilə əməkdaşlığının perspektivləri müzakirə olunub

Sentyabrın 22-də "Avropa" mehmanxanasında Xəzər-Avropa İnteqrasiya İşgüzar Klubunun (CEİBC) üzvləri Azərbaycan Respublikası Dövlət Neft Şirkətinin (ARDNŞ) birinci vitse-prezidenti akademik Xoşbəxt Yusifzadə ilə görüşmüşlər.

AzərTAc xəbər verir ki, CEİBC-in prezidenti və baş icraçı direktoru Telman Əliyev əvvəlcə klubun tarixindən və görüşün məqsədindən bəhs etmişdir. Bildirmişdir ki, görüşün əsas məqsədi kluba daxil olan şirkətlərin ARDNŞ ilə əməkdaşlığının perspektivlərinin müzakirə edilməsidir.

Sonra çıxış edən ARDNŞ-in birinci vitse-prezidenti X.Yusifzadə ölkənin neft və qaz hasilatı tarixindən və əldə olunan uğurlardan danışmışdır. Qeyd etmişdir ki, ARDNŞ ilk dəfə olaraq öz hesabına ötən il "Ümid" yatağında kəşfiyyat işləri aparmış və burada böyük qaz yatağı kəşf olunmuşdur. Bu qaz yatağının ehtimal olunan ehtiyatları 200 milyard kubmetr qaz və 40 milyon ton kondensat təşkil edir. Eyni zamanda, bu il kəşf olunan "Abşeron" yatağında da ilkin qiymətləndirmələrə əsasən, 350 milyard kubmetr qaz vardır. Hazırda Azərbaycanın təsdiq olunmuş qaz ehtiyatları 2 trilyon 550 milyard kubmetrdir.

Bundan başqa, biz gələcəkdə "Babək", "Asiman", "Şəfəq", "Zəfər", "Məşəl" "Naxçıvan" və s. perspektiv strukturlarda da işləyəcəyik. Əlbəttə hesab edirik ki, bunlar əsasən qaz yataqları olacaqdır. Çünki bu cür yataqların dərinliyi təxminən 6-7 min metr təşkil edir ki, belə dərinlikdən də əsasən qaz-kondensat çıxarılır.

ARDNŞ-in beynəlxalq əlaqələrinə də toxunulduğu görüşün sonunda kluba daxil olan şirkət nümayəndələrinin sualları cavablandırılmışdır.

Tədbirdə Xoşbəxt Yusifzadə klubun fəxri üzvü seçilmiş, CEİBC-yə yeni qəbul edilən şirkətlərin nümayəndələrinə sertifikatlar təqdim edilmişdir.

Sonda xatirə şəkli çəkdirilmişdir.

Azərbaycan.-2011.-23 sentyabr.-S.3.