İnam olan yerdə

Sahibkar qadınlarımız

Yaxşı deyiblər ki, inam olan yerdə insan hər cür çətinliklərə sinə gərib öz arzusuna, istəyinə yetişir. Sovetlər birliyi 70 il ömür etdikdən sonra süquta uğradı. Onun yerinə yeni iqtisadi-siyasi sistem gəldi. İşlə, qazan və əvvəlkindən fərqli olaraq, istəyini həyata keçir, bacardığını et, qur, tik, əvəzində firavan yaşa. Müstəqil fəaliyyət göstərməyə meyilli adamlar üçün bu, çox sərfəli oldu. Onu da qeyd edək ki, o zaman çoxları çaşbaş qalmışdılar. "Bəlkə də qaytardılar" xülyası ilə yaşayanlar, sosializmin tezliklə bərpa olunacağına ümid bəsləyənlər də az deyildi.

Xuraman Əliyeva belələrindən olmadı. O zaman ticarət sahəsində çalışırdı. Moskva Kooperativ İnstitutunun Bakı filialını bitirərək Cəlilabad Rayon Göytəpə Şəhər İstehlak Cəmiyyətində şöbə müdiri vəzifəsində işləyirdi. Dövran dəyişəndə isə seçdiyi peşəsindən ayrılmadı, əksinə, onu daha da inkişaf etdirdi. Əvvəlcə işlədiyi Göytəpə mağazasını icarəyə götürdü. Müxtəlif istehsal, ticarət təşkilatları ilə əlaqə yaradaraq əhali üçün zəruri olan mallarla mağazanı işlətməyə başladı. Göytəpə şəhər, habelə yaxın qəsəbə və kəndlərin əhalisi özlərinə lazım olan ərzaq və təsərrüfat mallarını almaq üçün başqa yerə üz tutmadılar. "İnsaf dinin yarısıdır" deyirlər. Biznes fəaliyyətində o, insaflı olmağı, satdığı malların üstünə mümkün qədər az faiz qoymağı başlıca meyar götürdü. Belə xüsusiyyətlər onun ticarət dövriyyəsinə müsbət təsir göstərdi. Gətirdiyi mallar yerdə qalmadı, tez bir zamanda satıldı. Bütün bunlar isə Xuramana fəaliyyətini genişləndirməyə imkan yaratdı. Bir neçə il keçəndən sonra icarəyə götürdüyü ticarət obyektini özəlləşdirdi. Ölkədə gedən özəlləşdirmə proqramına əsasən, "Namiq-84" Müstəqil Müəssisəsini yaratdı.

İndi o, artıq sahibkar idi. İlk uğurlar Xuramanı əhaliyə gərəkli olan digər məsələlərin həllinə ruhlandırdı. Göytəpə şəhərində 14 minə yaxın əhali yaşayır. Elə vaxt olur ki, burada bir gündə bir neçə toy olur. Amma camaat şəhərdə şadlıq sarayı olmadığından əziyyət çəkirdi. Xüsusilə küləkli, yağışlı, qarlı havalarda çadırda məclis qurmaq mümkünsüz olurdu. Bunları nəzərə alan Xuraman tezliklə şadlıq evi yaratmağı qərara aldı. Belə bir məsəl var: "Niyyətin hara, mənzilin də ora". Sahibkar qadın neçə-neçə gənc oğlan və qızın arzusuna çatmasına, ailə həyatı qurmasına öz töhfəsini verdi.

Yuxarıda qeyd etdiyimiz kimi, X.Əliyeva peşə etibarilə ticarətçidir. Lakin o, qonşu Masallıya və digər yerlərə gedib işbirliyi qurarkən mebel götürdüyü müəssisələrin fəaliyyəti, istehsal prosesi ilə də tanış olurdu. Bir gün öz-özünə belə bir sual verdi: "Mən niyə belə sex yaratmayım? Həm ora-bura getməkdən canım qurtarar, həm də yeni iş yerləri açmış olaram". Bu istəyinə çatmaq üçün də xeyli zəhmət çəkdi, müxtəlif ünvanlara üz tutdu, lazım olan avadanlıqları alıb gətirərək bir damın altına yığdı. İstehsal üçün xammal məsələsini də həll etdikdən sonra bacarıqlı mebel ustalarını işə cəlb etdi. Qısa vaxt ərzində bu sahədə də uğurlar qazandı. Müəssisəsinin hazırladığı müxtəlif növ mebel dəstləri alıcılar tərəfindən rəğbətlə qarşılandı.

Sahibkar qadın xeyirxah əməlləri ilə də adamların hörmətini qazanıb. İmkansıza, kimsəsizə əl tutmağı özünə mənəvi borc hesab edir. Dindirsən, Göytəpə şəhər sakinlərinin hər biri onun haqqında xoş sözlər deyəcək. Çünki Xuramanın yanına gələnlərin heç biri əliboş qayıtmayıb.

Cəlilabad rayonunun ictimai-siyasi həyatında fəal iştirak edən sahibkar qadın xalqımız üçün əziz olan Novruz, Qurban, Ramazan bayramlarında şəhid ailələrinə, əlillərə, imkansızlara sovqat göndərir. Qarabağ əlilləri, şəhidləri həmişə onun diqqət mərkəzindədir.

- İndi Cəlilabad şəhərində ticarət obyekti tikirik, - deyə Xuraman xanım bildirdi. - İstəyirik, fəaliyyətimizi genişləndirək, ölkəmizdə sahibkarlar üçün yaradılan imkandan yararlanaq. Sağ olsun Prezidentimiz, bizim üçün hər bir şərait yaradıb. Heç kəs dəyib-dolaşmır. Əksinə, kömək edirlər. Bu yerdə rayon rəhbərliyinin də dəstəyini qeyd etmək istəyirəm. Lakin hələlik həyata keçirə bilmədiyim arzularım da var. Ölkə başçısı ərzaq təhlükəsizliyi proqramını imzalamışdır. Cəlilabad torpağı məhsuldardır. Zəhmət çəksən, əvəzini birə-yüz qat qaytarır. Biz isə heyvandarlıq sahəsində öz gücümüzü sınamaq fikrindəyik. İstəyirik, əhalinin ekoloji cəhətdən təmiz ət, süd məhsulları ilə təmin olunmasında iştirak edək. Maliyyə vəsaitimizin çatışmazlığı hələlik bunu reallaşdırmağa imkan vermir. Sahibkarlığın İnkişafına Dəstək Fondunun kreditinə ehtiyacımız var. Ümid edirik ki, kömək göstərəcəklər.

X.Əliyeva qabaqcıl iş adamı kimi daim öz təcrübəsini artırır. O, Azərbaycan Sahibkarlar Assosiasiyasının üzvü olaraq indiyədək Almaniya, Rumıniya, Yunanıstan, Türkiyə və digər ölkələrdə keçirilən müxtəlif tədbirlərdə iştirak edib onların qabaqcıl iş üsullarını öyrənmişdir.

X.Əliyeva həm də qayğıkeş, mehriban anadır. 1999-cu ildə həyat yoldaşı vəfat etdikdən sonra 2 oğul, 1 qız övladına həm ata olub, həm də ana. Minbir əzab-əziyyətlə onları böyüdüb, oxutdurub, hər birinə ali təhsil verib, ev-eşik edib. İndi 4 nəvəsi var. "Onları görəndə bütün yorğunluğum, ağrı-acılarım çıxır, yadıma keçən günlər düşür, fikirləşirəm ki, onları yelə verməmişəm", - deyir.

Seyran CAVADOV

Azərbaycan.-2011.-23 sentyabr.-S.5.