Yeni Azərbaycan Partiyasının rayon və şəhər təşkilatları sədrlərinin ümumrespublika müşavirəsi keçirilmişdir

Sentyabrın 24-də Səbail Rayon İcra Hakimiyyətinin inzibati binasının akt zalında Yeni Azərbaycan Partiyasının (YAP) rayon və şəhər təşkilatları sədrlərinin ümumrespublika müşavirəsi keçirilmişdir.

AzərTAc xəbər verir ki, YAP sədrinin müavini-icra katibi, Milli Məclisin deputatı Əli Əhmədov müşavirədə çıxış edərək tədbirin əhəmiyyətindən və qarşıda duran vəzifələrdən danışmışdır.

Ə.Əhmədov demişdir ki, Azərbaycan dövlətinin inkişafının uğurlu nəticələrinin biri də YAP sıralarının genişlənməsi və daha da güclənməsidir. Bu gün partiyanın 550 minə yaxın üzvü vardır ki, onların da 15 mini cari ilin birinci yarısında YAP sıralarına daxil olmuşlar. Sevindirici haldır ki, partiyaya üzv olanların sırasında gənclər çoxluq təşkil edirlər. Bu da Azərbaycan Prezidenti İlham Əliyevin həyata keçirdiyi uğurlu daxili və xarici siyasətin xalqımız, o cümlədən gənclər tərəfindən dəstəkləndiyinin bariz nümunəsidir.

İcra katibi bildirmişdir ki, gənclərin partiyaya üzv olmaları bizim gücümüzü daha da artırır, ictimai-siyasi həyatda mövqelərimizi möhkəmləndirir, eyni zamanda, yeni strategiyanı formalaşdırmağa ruhlandırır.

Ə.Əhmədov YAP-ın rayon və şəhər təşkilatları rəhbərlərinin də bu prinsiplərə diqqət yetirmələrinin vacibliyini vurğulamışdır.

O demişdir ki, müşavirənin əsas məqsədi YAP-ın rayon və şəhər təşkilatlarının konfranslarının keçirilməsinə hazırlıqdır. Ötən bir neçə il ərzində parlament, bələdiyyə və prezident seçkiləri keçirildiyi üçün bu cür konfranslar təşkil olunmamışdır. Bu müşavirədən sonra bir ay ərzində rayon və şəhər təşkilatları hazırlıq işləri görməli və noyabrda konfranslarını keçirməlidirlər. Konfranslarda görülmüş işlərlə bağlı hesabatlar dinləniləcək, gələcək fəaliyyətin əsas istiqamətləri müəyyənləşdiriləcəkdir. Bu konfranslar həm də xalq qarşısında hesabat xarakterli olacaqdır.

YAP sədrinin müavini onu da qeyd etmişdir ki, 2010-2011-ci illərdə 8 rayonda bu cür konfranslar olduğu üçün həmin rayonlarda təkrar konfranslar keçirilməyəcəkdir.

Ə.Əhmədov konfransların yüksək səviyyədə keçiriləcəyinə, təşkilat rəhbərlərinin gənclərlə sıx işləyəcəklərinə, yeni texnologiyalardan istifadə edəcəklərinə əminliyini ifadə etmiş, tövsiyələrini vermişdir.

Sonra çıxışlar olmuş, qarşıda duran vəzifələrlə bağlı rəy və təkliflər səslənmişdir.

Azərbaycan.-2011.-25 sentyabr.-S.7.