Azərbaycanla viza rejiminin sadələşdirilməsi ilə bağlı danışıqlara dair mandate təsdiqlənmək üçün Avropa İttifaqı Şurasına təqdim olunmuşdur

Avropa İttifaqı (Aİ) Azərbaycanla viza rejiminin sadələşdirilməsi ilə bağlı danışıqlara dair mandatı təsdiqləmək üçün Avropa İttifaqı Şurasına təqdim etmişdir. AzərTAc xəbər verir ki, bu sözləri jurnalistlərə müsahibəsində xarici işlər nazirinin müavini Mahmud Məmmədquliyev demişdir. Azərbaycanın Aİ ilə əməkdaşlığa hazır olduğunu bildirən M.Məmmədquliyev demişdir: "Biz həlli tapılmamış bəzi məsələlərin olduğunu istisna etmirik və bu məsələlərlə bağlı sıx əməkdaşlığa hazırıq".

M.Məmmədquliyev xatırlatmışdır ki, Azərbaycan ilə Aİ arasında demokratiya üzrə xüsusi yaradılmış alt komitənin ilk iclası və vətəndaş cəmiyyətinin inkişafına dair konfransı keçirilmişdir. Komitənin ikinci iclası isə noyabrda Brüsseldə keçiriləcəkdir. Azərbaycanın Dünya Ticarət Təşkilatına (DTT) üzvlüyü məsələsinə toxunan M.Məmmədquliyev bildirmişdir ki, noyabr-dekabr aylarında DTT-yə daxil olmaq üzrə işçi qrupun növbəti iclasının keçiriləcəyi nəzərdə tutulmuşdur. O demişdir: "Azərbaycan DTT-yə daxil olmaqda maraqlıdır, lakin üzvlük şərtləri Azərbaycanın da maraqlarına uyğun olmalıdır. Buna görə də danışıqları davam etdiririk".

Azərbaycan.- 2011.- 24 sentyabr.- S. 7.