Nazirlər Kabineti son günlər daha 3 qərar qəbul etmişdir

Nazirlər Kabineti son günlər daha 3 qərar qəbul etmişdir. "Müəlliflik hüququ və əlaqəli hüquqlar haqqında" Azərbaycan Respublikasının Qanununa dəyişikliklər və əlavələr edilməsi barədə" Azərbaycan Respublikasının 2008-ci il 1 aprel tarixli 580-IIIQD nömrəli qanununun tətbiq edilməsi haqqında" Azərbaycan Respublikası Prezidentinin 2008-ci il 7 may tarixli fərmanının 1.3-cü bəndinin icrası ilə əlaqədar Nazirlər Kabineti "Müəlliflərin və əlaqəli hüquqların sahiblərinin əmlak hüquqlarını kollektiv əsasda idarə edən təşkilatların qeydiyyatdan (akkreditasiyadan) keçirilməsi Qaydaları"nın təsdiq edilməsi haqqında" qərar qəbul etmişdir.

Azərbaycan Respublikası Konstitusiyasının 119-cu maddəsinin səkkizinci abzasına əsasən, "İçərişəhər" Dövlət Tarix-Memarlıq Qoruğu İdarəsinin əlaqədar təşkilatlarla razılaşdırılmış təklifini nəzərə alaraq Nazirlər Kabineti "İşərişəhər" Dövlət Tarix-Memarlıq Qoruğunun mühafizə (bufer) zonasının xüsusi hüquqi rejimi haqqında Əsasnamə"nin təsdiq edilməsi haqqında" qərar qəbul etmişdir.

Hər iki qərar sentyabrın 22-dən qüvvəyə minmişdir.

Azərbaycan Respublikası Konstitusiyasının 119-cu maddəsinin səkkizinci abzasına əsasən, Xüsusi Dövlət Mühafizə Xidmətinin İqtisadi İnkişaf, Maliyyə və Ədliyyə nazirlikləri ilə razılaşdırılmış təklifini nəzərə alaraq Nazirlər Kabineti "Azərbaycan Respublikası Xüsusi Dövlət Mühafizə Xidmətinin hərbi qulluqçularının hərbi geyim və əşya əmlakı ilə təminat normaları"nın təsdiq edilməsi haqqında" özünün 2006-cı il 17 aprel tarixli qərarında dəyişiklik edilməsi barədə qərar qəbul etmişdir.

Qərar sentyabrın 23-dən qüvvəyə minmişdir.

Nazirlər Kabinetinin mətbuat xidmətindən AzərTAc-a verilən məlumata görə, bu qərarların tam mətni ilə Nazirlər Kabinetinin www.cabmin.gov.az ünvanlı internet saytında və Azərbaycan Respublikasının Qanunvericilik Toplusunda tanış olmaq mümkündür.

Azərbaycan.-2011.-27 sentyabr.-S.2.