Azərbaycanın birinci xanımı Mehriban Əliyevanın müsahibəsi Almaniyada «Qadın liderliyi - Qadınların gücü. Dünyanın ən uğurlu qadınlarından öyrənək» adlı kitabda dərc olunmuşdur

Bu günlərdə Almaniyada nüfuzlu "Hanseatic Lichthouse" nəşriyyatında Berlində fəaliyyət göstərən Siyasət və İctimaiyyət Beynəlxalq İnstitutunun direktoru xanım Kerstin Plevenin müəllifliyi ilə "Qadın liderliyi-Qadınların gücü. Dünyanın ən uğurlu qadınlarından öyrənək" adlı kitab nəşr olunmuşdur. Kitabda dünyanın 30 ölkəsindən 60-a yaxın ən uğurlu, nüfuzlu və tanınmış qadının məqaləsi və ya verdiyi müsahibələr dərc olunmuşdur.

Nəşrdə Azərbaycanın birinci xanımı, Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri Mehriban Əliyevanın müsahibəsi dərc olunmuşdur. Kitabın nəşrində məqsəd şəxsi və ictimai fəaliyyətlərində uğurlar qazanmış qadınların əldə etdikləri nailiyyətlərin sirlərini öyrənmək, eləcə də onların ictimai fəaliyyətlə bağlı dəyərli məsləhətlərini işıqlandırmaqdan ibarətdir. Nəşrdə Mehriban xanım Əliyeva ilə birlikdə dünyanın digər siyasi və ictimai xadimləri, o cümlədən Almaniya Federativ Respublikasının federal kansleri Angela Merkel, ABŞ-ın dövlət katibi Hillari Klinton, YUNESKO-nun baş direktoru İrina Bokova və digər şəxslərin müsahibələri və onlar haqqında yazılan məqalələr dərc olunmuşdur.

Mehriban xanım Əliyevanın müsahibəsində rəhbərlik etdiyi Heydər Əliyev Fondunun həyata keçirdiyi mühüm layihələr, Azərbaycan qadınlarının ölkəmizin ictimai-siyasi və mədəni həyatında rolu, Azərbaycanın dünyada qadınlara seçki hüququ verən ilk ölkələrdən biri olması və digər mövzularla bağlı məsələlər barədə geniş məlumat verilmişdir. Azərbaycanın birinci xanımı Ermənistan-Azərbaycan, Dağlıq Qarabağ münaqişəsinə toxunaraq qaçqın və məcburi köçkün soydaşlarımızın problemlərindən bəhs etmişdir. Mehriban xanım Əliyeva Azərbaycan Respublikasında təhsilə, o cümlədən qadınların təhsilinə mühüm əhəmiyyət verildiyini qeyd edərək dövlət qurumlarında, elmi müəssisələrdə və özəl sektorda çalışan qadınların sayının getdikcə artdığını vurğulamışdır. Mehriban xanım Əliyeva Azərbaycan qadınının tarixən ictimai həyatda daim fəal iştirak etdiyini qeyd etmişdir. Heydər Əliyev Fondunun prezidenti Mehriban xanım Əliyeva Xurşidbanu Natəvan, Məshəti Gəncəvi kimi tanınmış Azərbaycan qadınlarının xalqımızın mədəni irsinə böyük töhfələr verdiyini qeyd etmişdir. Mehriban xanım Əliyeva belə bir maraqlı faktı da dünya ictimaiyyətinin diqqətinə çatdırmışdır ki, XIX əsrin ortalarında görkəmli ictimai xadim və şairə Xurşidbanu Natəvanın xeyriyyəçilik fəaliyyəti nəticəsində ilk dəfə olaraq Şuşada su təchizatı sistemi qurulmuş, 1990-cı illərin əvvəllərinə qədər fəaliyyət göstərmiş və Ermənistanın işğalı zamanı dağıdılmışdır.

Mehriban xanım Əliyevanın müsahibəsi beynəlxalq ictimaiyyət tərəfindən maraqla qarşılanmışdır.

AzərTAc

Azərbaycan.-2011.-27 sentyabr.-S.3.