KİV nümayəndələri üçün Şamaxıda seminar keçirilmişdir

Vergilər Nazirliyinin Şamaxı rayonunda yerləşən Tədris Mərkəzində KİV nümayəndələri üçün "Müstəqil Azərbaycanın vergi sistemi" mövzusunda seminar keçirilmişdir.

Əvvəlcə KİV nümayəndələri mərkəzin yeni inşa edilmiş tədris kompleksi ilə tanış olmuşlar. Mərkəzin rəhbəri Yaşar Kəlbiyev media nümayəndələrini salamlayaraq seminarın bu müasir kompleksdə ilk tədbir olduğunu nəzərə çatdırmış, mərkəzin fəaliyyəti və onun iş prosesi ilə bağlı KİV nümayəndələrini məlumatlandırmış, onun vəzifələri, tədris metodları barədə danışmışdır.

Seminarda çıxış edən Vergilər Nazirliyinin Vergi Siyasəti və Strateji Araşdırmalar Baş İdarəsinin rəisi Akif Musayev media nümayəndələrinə müstəqillik dövründə ölkəmizin vergi sisteminin formalaşdırılması mərhələləri, aparılan islahatlar barədə məlumat vermişdir.

Kommersiya Hüquqi Şəxslərin Dövlət Qeydiyyatının Təşkili və İqtisadi Təhlil Baş İdarəsinin rəisi Natiq Şirinov isə "Müasir vergi sistemi və perspektivlər" mövzusunda çıxış edərək vergi inzibatçılığının təkmilləşdirilməsi, mütərəqqi informasiya texnologiyalarının tətbiqi sahəsində görülən işlər barədə danışmışdır. Vergi Ödəyicilərinə Xidmət İdarəsinin rəisi Elçin Məmmədov da, öz növbəsində, seminar iştirakçılarına vergi ödəyicilərinə göstərilən xidmətlər, bu sahədə nazirlik tərəfindən qəbul olunmuş "Vergi ödəyicilərinə xidmətin təkmilləşdirilməsi Konsepsiyası", eləcə də vergi sistemində yaxın gələcəkdə həyata keçirilməsi nəzərdə tutulan yeniliklər barədə məlumat vermişdir.

Sonra Vergilər Nazirliyinin rəsmiləri media nümayəndələrinin suallarını cavablandırmışdır. Seminar iştirakçılarına sertifikatlar təqdim olunmuşdur.

Məlumat üçün bildirək ki, Vergilər Nazirliyi sistemində kadrların bilik və peşə hazırlığı səviyyəsinin yüksəldilməsi istiqamətində işlər nazirliyin Tədris Mərkəzində həyata keçirilir. Mərkəz ixtisasartırma və yenidən hazırlama tədris müəssisəsi statuslu elm və təhsil ocağı olmaqla dövlət vergi orqanlarının vəzifəli şəxslərinin peşə hazırlığının təkmilləşdirilməsini və ixtisaslarının artırılmasını, habelə vergi siyasətinə dair elmi tədqiqatların aparılmasını təmin edir.

Tədris Mərkəzi "Dövlət vergi orqanlarında xidmət haqqında" Əsasnamənin təsdiq edilməsi barədə" Azərbaycan Respublikası Qanununun tətbiq edilməsi haqqında" Prezidentin 2001-ci il 19 iyul tarixli Fərmanına əsasən yaradılmış və bu ilin sentyabr ayında dövlət başçısının iştirakı ilə Şamaxı rayonunda onun yeni tədris kompleksi istifadəyə verilmişdir. Yeni bina memarlıq üslubuna, texniki və texnoloji cəhətdən avadanlıqlarla təchizatına, otaqlarda əlverişli iş şəraitinə və infrastrukturuna görə beynəlxalq standartlara cavab verir. Burada təlim-təhsil üçün əlverişli şərait və bu məqsədə xidmət edən infrastruktur sahələri yaradılmışdır. Mərkəzin ekoloji baxımdan əlverişli məkanda yerləşdirilməsi də beynəlxalq təcrübə nəzərə alınmaqla həlledici amillərdən biridir.

Kompleksin texniki imkanları genişdir. Onun tərkibinə üçmərtəbəli tədris, ikimərtəbəli inzibati, üçmərtəbəli yataqxana, əməkdaşlar üçün üçmərtəbəli iki yaşayış binası və dəvət olunan ekspertlər üçün ikimərtəbəli iki kottec, qapalı idman-sağlamlıq kompleksi, qazanxana, elektrik yarımstansiyası və digər xidmətedici tikililər daxildir. Burada seminar və məşğələlərin aparılması üçün kompyuterlərlə tam təmin edilmiş və hər birində proyektor olan auditoriyalar, konfrans zalı, iclas zalı, kompyuterlərlə təmin olunmuş kitabxana, İntranet və internetə qoşulmuş kompyuterlə təmin olunmuş oxu zalı, akt zalı, üzgüçülük hovuzu, idman-sağlamlıq kompleksi, camaşırxana, yeməkxana, kafe və digər xidmət sahələri yaradılmışdır.

Azərbaycan.-2011.-27 sentyabr.-S.6.