Azərbaycan Diplomatik Akademiyasında Kitab Mərkəzində «Argentina günü» keçirilmişdir

Sentyabrın 27-də Azərbaycan Diplomatik Akademiyasının (ADA) Kitab Mərkəzində "Argentina günü" keçirilmişdir.

AzərTAc xəbər verir ki, Azərbaycan Respublikasının dövlət müstəqilliyinin bərpasının 20-ci ildönümü ilə bağlı ölkəmizdə səfərdə olan Argentina parlamentinin üzvlərindən ibarət nümayəndə heyətinin şərəfinə təşkil olunmuşdur.

Tədbirdə ADA-nın "Beynəlxalq münasibətlər və diplomatiya üzrə" magistr proqramında təhsil almaq hüququ qazanmış argentinalı Tomas Qerbasio ölkəsinin müstəqillik uğrunda mübarizəsi, iqtisadiyyatının əsas istiqamətləri və milli mətbəxi barədə təqdimatla çıxış etmişdir. Ermənistan-Azərbaycan, Dağlıq Qarabağ münaqişəsinə toxunan T.Qerbasio vurğulamışdır ki, Argentina bu məsələnin beynəlxalq hüququn normaları və prinsipləri, Azərbaycanın ərazi bütövlüyü çərçivəsində həllinə tərəfdardır.

Argentina-Azərbaycan dostluq qrupunun rəhbəri Federiko Pinedo isə bildirmişdir ki, senatorlar Argentinanın ölkəmizdə səfirliyinin açılması üçün maksimum səylər göstərəcəklər. Ermənistan-Azərbaycan, Dağlıq Qarabağ münaqişəsinə toxunan F.Pinedo vurğulamışdır ki, bu problem regionun inkişafını ləngidən əsas amillərdən biridir.

Argentina parlamentinin digər üzvləri Roberto Mario Mouilleron, Arturo Vera, Joze Maria Roldin də Prezident İlham Əliyevin uğurlu iqtisadi siyasəti nəticəsində Azərbaycanda gedən sürətli inkişafı yüksək qiymətləndirmişlər. Deputatlar qeyd etmişlər ki, Argentinaya qayıtdıqdan sonra Azərbaycan haqqında həqiqətləri öz xalqına çatdıracaqlar.

Tədbir Argentinanın məşhur tanqosu ilə davam etmişdir.

Sonda iştirakçılar Argentina mətbəxinin ləziz yeməklərindən dadmışlar.

Azərbaycan.- 2011.- 28 sentyabr.- S.3.