Paytaxtımız qısa müddətdə dünyanın qabaqcıl şəhərlərindən birinə çevrilib

Azərbaycan xalqı əlamətdar bir tarixin - dövlətimizin müstəqilliyinin bərpa edilməsinin 20-ci ildönümü ərəfəsindədir. Prezident İlham Əliyevin "Azərbaycan Respublikasının dövlət müstəqilliyinin bərpasının iyirminci ildönümü haqqında" 21 yanvar 2011-ci il tarixli sərəncamına əsasən müstəqilliyimizin bərpasının yubiley tarixi dövlət səviyyəsində təntənəli şəkildə qeyd olunacaqdır. Sərəncama uyğun olaraq Tədbirlər Planı da təsdiq edilib. Keçirilən tədbirlərdə müstəqilliyimizin möhkəmləndirilməsi istiqamətində görülən işlərdən söz açılır, ölkəmizin keçdiyi inkişaf yolunda qazandığı nailiyyətlərə nəzər salınır.

"Azərbaycan" qəzetinin müstəqilliyimizin bərpasının 20 illiyi ilə bağlı təşkil etdiyi "dəyirmi masa"larda şəhər və rayonlarımızın timsalında respublikamızda qazanılan uğurlar geniş təbliğ olunur. Bu günlərdə Yasamal Rayon İcra Hakimiyyəti ilə birgə baş tutan "dəyirmi masa"da rayonun müstəqillik illərində keçdiyi sosial-iqtisadi inkişaf yollarından söz açıldı.

"Dəyirmi masa"nı giriş sözü ilə "Azərbaycan" qəzetinin baş redaktoru, Milli Məclisin deputatı Bəxtiyar SADIQOV açdı:

- Hörmətli "dəyirmi masa" iştirakçıları!

20 il insan ömrü üçün böyük zaman kəsiyidir. Lakin dövlət və tarix üçün 20 il böyük dövr deyil. Bizim üçün son dərəcə sevindiricidir ki, tarix üçün uzun olmayan bu zaman müddətində Azərbaycan çox böyük inkişaf yolu keçib. Müstəqilliyimiz və dövlətçiliyimiz möhkəmlənib, mütərəqqi dövlət quruculuğu, cəmiyyət həyatının bütün sahələrində mükəmməl islahatlar həyata keçirilib. Nəhayət, ölkəmizdə keçid dövrü tam başa çatıb. Bu gün beynəlxalq aləmdə özünün layiqli yerini tutan Azərbaycan həm də ayrı-ayrı ölkələrin sosial-iqtisadi inkişaf yolunda örnək götürdüyü bir dövlətdir.

Lakin bu 20 ilin heç də bütün dövrləri müstəqil Azərbaycan dövlətinin çağdaş tarixində xalqımızın və respublikamızın milli maraqlarına xidmət edən siyasi və iqtisadi proseslərlə, xoş emosiyalarla yadda qalmayıb. Çünki 1991-ci il oktyabrın 18-də "Azərbaycan Respublikasının Müstəqilliyi haqqında Konstitusiya Aktı"nın qəbulu, respublikamızın Azərbaycan Xalq Cümhuriyyətinin varisi olduğunun bəyan edilməsi, habelə dövlət müstəqilliyinin və suverenliyinin beynəlxalq aləmə bildirilməsi bütün cəmiyyətimiz tərəfindən nə qədər böyük razılıq hissi ilə qarşılansa da, sonrakı illərdə ölkəmizdə baş verən xoşagəlməz siyasi və iqtisadi proseslər xalqımızın azadlıq ideyalarının sonadək gerçəkləşməsini şübhə altına almışdı. O dövrdə ölkəyə rəhbərlik edənlər müstəqil dövlətçiliyin nə demək olduğunu dərk edə bilmirdilər. Elə buna görə də Konstitusiya Aktı kağız üzərində qalmışdı. Bu mühüm sənədin Azərbaycanda müstəqil dövlət quruculuğuna yol açan müddəalarının həyata keçirilməsi üçün səy göstərilmirdi. Buraxılan kobud səhvlərin nəticəsi idi ki, Ermənistanın Azərbaycana qarşı ərazi iddiaları getdikcə genişləndi. Qarşıda duran önəmli vəzifələrdən biri ordunun yaradılması olsa da, bu istiqamətdə işlər olduqca ləng və dövlətin prinsiplərilə uzlaşmayan formada aparıldı. Dağlıq Qarabağda azərbaycanlı yaşayış məntəqələrinin ermənilərdən etibarlı müdafiəsi təşkil olunmadı. Məhz o dövrkü ölkə rəhbərliyinin məsuliyyətsizliyinin məntiqi nəticəsi olaraq baş verən Qaradağlı və Xocalı soyqırımları Qarabağ müharibəsinin ən faciəli səhifələri kimi həm də müstəqillik tariximizə qara hərflərlə düşdü.

1992-ci ildə zor gücü ilə hakimiyyəti ələ keçirən AXC-Müsavat cütlüyü isə yaratdığı "hakimiyyətsizliklə" Azərbaycanın müstəqil dövlət kimi taleyini sual altına qoydu. İqtidarda təmsil olunanların siyasi səriştəsinin yoxluğu ucbatından ölkə faktiki olaraq idarə olunmurdu, dövlət aparatı iflic duruma düşmüşdü. Yüksək vəzifə tutan hər bir məmur yalnız öz ambisiyası uğrunda çalışır, qanunların və dövlətin maraqlarının fövqündə dayandığını düşünürdü. Reketçilik, kütləvi cinayətkarlıq, separatçılıq baş alıb gedir, naşı insanların rəhbərlik etdiyi hüquq-mühafizə orqanları kriminogen duruma nəzarət edə bilmirdilər. Həmin dövrdə iqtidardakı dairələrin öz aralarında baş verən çəkişmələrinin nəticə olaraq cəbhədə döyüşən hərbi hissələrin ayrı-ayrı siyasi partiyaların və şəxslərin nəzarətinə keçməsi prosesi daha da gücləndi. 1993-cü ilin iyununda baş verən Gəncə hadisələri isə Azərbaycanı uçuruma və parçalanmağa doğru aparan siyasi-hərbi proseslərin pik nöqtəsi idi.

Bir sözlə, Azərbaycan müstəqilliyinin ilk illərində dəryada batmaqda olan gəmini xatırladırdı. Lakin anarxiya və xaotik proseslər onu da göstərirdi ki, yalnız qətiyyətli, iradəli siyasi lider başımızın üstünü almış bütün təhlükələri aradan qaldıra, kövrək müstəqilliyimizi yaşada bilər. Bu lider isə xalqımızın dahi oğlu Heydər Əliyev idi. Hakimiyyətdə olanlar da yaxşı anlayırdılar ki, ölkədəki hərc-mərcliyin, itaətsizliyin, anarxiyanın, siyasi çəkişmələrin, Gəncədə başlanmış qardaş qırğınının qarşısını yalnız Heydər Əliyev ala bilər.

Heydər Əliyev 1993-cü ildə xalqın çağırışına cavab verərək Azərbaycanın idarəçilik sükanı arxasına keçəndən sonra ilk növbədə ölkədə vətəndaş qarşıdurmasının qarşısını aldı, nizami ordunun yaradılması ilə bağlı təcili tədbirlər həyata keçirdi. Qısa müddətdə seraratçı qüvvələr zərərsizləşdirildi, Azərbaycanın dövlətçiliyinə, müstəqilliyinə və ərazi bütövlüyünə qəsdlər hazırlayan cinayətkar ünsürlər cəmiyyətdən təcrid edildi. Beləliklə, ulu öndərin sayəsində Azərbaycan dünyanın siyasi xəritəsindən silinmək təhlükəsindən, Xalq Cümhuriyyətinin acı taleyini yaşamaq aqibətindən qurtuldu. Müstəqil dövlətimizin daimi mövcudluğunun təməl daşı qoyuldu. Dövlət quruculuğu başladı, yeni neft strategiyası hazırlandı, azad bazar iqtisadiyyatı prinsiplərinin bərqərar edilməsi nəticəsində yeni iqtisadi sistem yaradıldı. Vətəndaşların sosial müdafiəsinin gücləndirilməsi dövlət siyasətinin prioritet istiqamətlərindən biri elan edildi. Prezident İlham Əliyevin "Azərbaycan Respublikasının dövlət müstəqilliyinin bərpasının iyirminci ildönümü haqqında" sərəncamında bu barədə deyilir: "Müstəqilliyimizin ilk illərindəki hərc-mərclik və xalqımızın maraqlarına zidd siyasət, iqtisadiyyatın zəiflədilməsi və milli sərvətlərin talan edilməsi dərin siyasi və iqtisadi-sosial böhranla nəticələndi. 1993-cü ilin iyun ayından ölkədə formalaşmağa başlayan yeni siyasi kurs vətəndaş müharibəsi təhlükəsini aradan qaldırdı, separatçılıq meyillərinə son qoydu və Heydər Əliyevin dövlət quruculuğu siyasətinin gerçəkləşməsinə gətirib çıxardı".

Heydər Əliyev Azərbaycanın taleyinin sınağa çəkildiyi zamanlarda xilaskarlıqdan başlamış müstəqil dövlətimizin yaradılması, möhkəmləndirilməsi və inkişafı kimi şərəfli missiyanı uğurla, uzaqgörənliklə, müdrikliklə yerinə yetirdi. Bu gün Heydər Əliyev siyasətinin Prezident İlham Əliyev tərəfindən layiqincə davam etdirilməsi, bu siyasi kursun daha da zənginləşdirilməsi nəticəsində müstəqil Azərbaycan bütün sahələrdə yüksək sürətlə inkişaf edir, dünya dövlətləri arasında öz yerini daha da möhkəmləndirir. Prezident İlham Əliyevin təbirincə desək, bu gün bizim ən böyük nailiyyətimiz müstəqilliyimizdir, azadlığımızdır.

Bildiyiniz kimi, Prezident İlham Əliyevin "Azərbaycanın dövlət müstəqilliyinin bərpasının iyirminci ildönümü haqqında" sərəncamına əsasən təsdiqlənmiş Tədbirlər Planına əsasən müstəqilliyimizin bərpasının 20-ci ildönümü ölkəmizin hər yerində təntənəli şəkildə qeyd olunur. "Azərbaycan" qəzetinin Yasamal rayon icra hakimiyyəti ilə birgə keçirdiyi "dəyirmi masa" da bu qəbildəndir. "Dəyirmi masa"da paytaxtımızın mərkəzi rayonlarından olan Yasamal rayonunun müstəqillik illərində keçdiyi inkişaf yolu ilə bağlı məsələlərdən söz açılacaq. Bəzi nazirliklər, komitələr, müxtəlif dövlət qurumları, ali təhsil müəssisələri bu rayonun ərazisində yerləşir. Son illərdə Yasamal rayonu sosial-iqtisadi baxımdan böyük inkişaf yolu keçib. "2011-2013-cü illərdə Bakı şəhərinin və onun qəsəbələrinin sosial-iqtisadi inkişafı Proqramı"nın icrasının başlanmasından sonra isə Yasamal rayonunda aparılan tikinti və quruculuq işlərinin miqyası daha da artıb. Görülən bütün işlər Yasamal rayonunun, bütövlüklə paytaxtımızın simasını gözəlləşdirir. Yəqin ki, çıxışlarda bu barədə ətraflı söz açılacaq.

Əvvəlcə söz Yasamal Rayon İcra Hakimiyyətinin başçısı İbrahim Mehdiyevə verilir.

İbrahim MEHDİYEV:

- Hər bir xalqın müstəqil dövlətinin olması, təbii sərvətlərinə özünün sahib çıxması, müqəddəratını özü həll etməsi, müstəqil ölkə kimi beynəlxalq aləmdə layiq olduğu yeri tutması onun hərtərəfli inkişafında müstəsna əhəmiyyət kəsb edir. Azərbaycan xalqı da bütün dövrlərdə öz müstəqilliyi uğrunda mübarizələr aparmış, istiqlalına qovuşmaq üçün çətinliklərdən keçmişdir. Tale elə gətirib ki, xalqımız 1918-ci ildə öz müstəqilliyinə qovuşa bilmişdir. Lakin bu istiqlalın sevincini əbədi yaşaya bilməmişdir. Müsəlman Şərqində ilk demokratik respublika kimi tarixə düşən Azərbaycan Xalq Cümhuriyyəti obyektiv və subyektiv səbəblərdən cəmi 23 ay müstəqil dövlət kimi mövcud olmuşdur. Buna baxmayaraq, Xalq Cümhuriyyəti və adları müstəqillik tariximizə əbədi həkk olunmuş xalqımızın görkəmli şəxsiyyətləri bir çox sahələrdə mühüm işlər görmüş, demokratik dövlət quruculuğu sahəsində tədbirlər həyata keçirmişlər.

Xalq Cümhuriyyətinin süqutundan sonra xalqımız uzun müddət Sovetlər birliyinin tərkibində yaşamasına baxmayaraq, bir millət olaraq öz milli-mənəvi dəyərlərinə sadiq qalmış, müstəqil dövlətçilik amalını daim öz qəlbində yaşatmışdır. Ötən əsrin sonlarında Sovetlər birliyinin dağılması, 70 illik kommunist rejiminin süqutundan sonra digər respublikalar kimi, Azərbaycan da yenidən öz müstəqilliyinə qovuşdu. Amma başqa xalqlardan fərqli olaraq, bu dəfə də müstəqilliyin bərpa olunması, xalqımızın azadlığına qovuşması asan başa gəlmədi. Azadlığı və suverenliyi uğrunda mübarizəyə qalxan xalqımıza qarşı sovet imperiyası tərəfindən təcavüz edildi, 1990-cı ilin 20 yanvarında qanlı faciə törədildi. Xalqımız şəhidlər verdi. Müstəqilliyini qanı, canı bahasına bərpa etmiş qəhrəman xalqımız ilk illərdə çox ciddi sarsıntılar keçirsə də, mübarizlik əzmini itirmədi.

Bununla yanaşı, təəssüflə qeyd etməliyik ki, müstəqilliyin ilk illərində hakimiyyətdə olan dairələrin səbatsızlığı nəticəsində ölkəmizdə xaos hökm sürürdü. Eyni zamanda, Ermənistanın Azərbaycana hərbi təcavüzünün genişlənməsi, erməni separatçıları tərəfindən bəşəriyyətin ən dəhşətli faciələrindən biri olan Xocalı soyqırımının törədilməsi, bu hadisənin ardınca Dağlıq Qarabağın və ona bitişik rayonların bir-birinin ardınca işğal edilməsi, ölkədə ictimai-siyasi sabitliyin olmaması, qanunların addımbaşı pozulması, siyasi qarşıdurmaları son nəticədə dövlətin özünün gələcəyini təhlükə altında saxlayırdı. Ölkəmizin müstəqilliyi və suverenliyi sanki formal xarakter daşıyırdı. Xüsusən AXC- Müsavat iqtidarının 1 illik səriştəsiz fəaliyyəti nəticəsində bütün sahələrdə hərc-mərclik baş alıb gedirdi, dövlət idarəetməsi iflic vəziyyətə düşmüşdü. Ayrı-ayrı siyasətbazların qanunsuz silahlı dəstələr yaratması vəziyyəti daha da mürəkkəbləşdirirdi. İqtisadiyyat tamamilə dağıdılmışdı. Gənclərimiz ayrı-ayrı silahlı birləşmələrə və bir-biri ilə barışmaz mövqedə olan siyasi partiyalara cəlb edilərək üz-üzə qoyulmuşdu. Dağlıq Qarabağda isə torpaqlarımız tamamilə müdafiəsiz qalmışdı. Azərbaycan dövlətçiliyi və müstəqilliyi tamamilə məhv olmaq təhlükəsi ilə üz-üzə idi. Bu azmış kimi, respublika vətəndaş müharibəsi vəziyyətində idi.

Belə bir olum, ya ölüm məqamında müdrik xalqımız nicat yolunu böyük oğlu Heydər Əliyevin hakimiyyətə gəlməsində görürdü. Xalq gözəl bilirdi ki, yaranmış bu mürəkkəb şəraitdə ölkəni düçar olduğu bəladan yalnız Heydər Əliyev qurtara bilər. Belə də oldu. Xalqın bu çətin vəziyyətinə, dövlətin gələcək taleyinə biganə qalmayan müdrik rəhbər Heydər Əliyev 1993-cü ilin iyun ayının 9-da Bakıya gələrək respublikada yaranmış böhranlı vəziyyəti aradan qaldırmaq üçün əməli fəaliyyətə başladı. Ölkəni qısa müddət ərzində xaos və anarxiya bataqlığından çıxarmağa nail oldu. Bu, yalnız ulu öndər Heydər Əliyevin hakimiyyətə qayıdışı deyil, eyni zamanda Azərbaycan xalqının varlığının, müstəqilliyinin, dövlətçiliyinin qorunub saxlanması idi. Heydər Əliyevin siyasi hakimiyyətə qayıdışı ölkəmizi parçalanmaqdan qorudu, vətəndaş müharibəsinin qarşısını aldı, torpaqlarımızı işğaldan xilas etdi.

Heydər Əliyev hakimiyyətə qayıtdığı ilk günlərdən Azərbaycanın gələcək inkişaf perspektivlərini müəyyən etdi, müstəqilliyimizin əbədi və dönməzliyinin təmin olunması istiqamətində təxirəsalınmaz addımlar atdı. Ordu quruculuğu, sosial-iqtisadi inkişaf istiqamətində ciddi nailiyyətlər əldə edildi. Azərbaycanın demokratik yolla inkişafını təmin edəcək əməli fəaliyyət proqramının həyata keçirilməsinə başlanıldı. Xarici siyasətdə uğurların təməli qoyuldu. Ölkəmiz qısa müddətdə həm regionda, həm də dünyada möhkəm mövqeləri olan dövlətə çevrildi. Cəmiyyət həyatının bütün sahələrində genişmiqyaslı islahatlar aparıldı. "Əsrin müqaviləsi"nin imzalanması ilə xalqın və dövlətin maraqlarına cavab verməklə Azərbaycanın iqtisadi inkişafının əsası qoyuldu. Bugünkü dinamik inkişafımız da o vaxtdan başladı. Məhz Heydər Əliyevin uzaqgörənliyi ilə müstəqil Azərbaycanın özündə bəşəri dəyərləri əks etdirən Konstitusiyası qəbul edildi. Azərbaycan bir sıra mötəbər beynəlxalq qurumların bərabərhüquqlu üzvlüyünə qəbul edildi.

Ümummilli lider Heydər Əliyevin siyasi kursunun Prezident İlham Əliyev tərəfindən layiqincə davam etdirilməsinin, bu kursun daha da zənginləşdirilməsinin nəticəsidir ki, Azərbaycan son 8 ildə böyük inkişaf yolu keçib, əldə etdiyimiz uğurların miqyası daha da genişlənib. Prezident İlham Əliyevin uğurlu siyasəti sayəsində Azərbaycanın dinamik tərəqqisində yeni mərhələ başlanmışdır. Azərbaycan nəinki regionda, həmçinin MDB və Şərqi Avropa məkanında siyasi və iqtisadi cəhətdən inkişaf edən öncül dövlətə çevrilmişdir.

Hazırda ölkəmizdə həyata keçirilən islahatlar iqtisadi inkişafın sürətləndirilməsi ilə müşayiət olunur. Ölkə iqtisadiyyatının ən müxtəlif sahələrinin dövlət proqramı təminatı paytaxtın və regionların tarazlı və davamlı inkişafını təmin edir. Bir-birini tamamlayan həmin dövlət proqramlarının icrası daim Prezident İlham Əliyevin diqqət mərkəzindədir. Dövlət başçısının ölkənin bütün bölgələrinə tez-tez səfərlər edərək proqramların icrası ilə yerindəcə tanış olması bunun bariz göstəricisidir.

Dinamik sosial-iqtisadi inkişafa xidmət edən siyasətin nəticəsidir ki, 2004-2010-cu illərdə ölkədə ümumi daxili məhsulun həcmi 3, o cümlədən qeyri-neft sektorunda 2 dəfə çoxalmışdır. Sənaye məhsulunun istehsalı 2,8 dəfə, əsas kapitala qoyulan investisiyalar 2,9, əhalinin gəlirləri 4,5, orta aylıq əməkhaqqı 7,1, pensiyaların orta məbləği isə 4,7 dəfə artmışdır.

Sosial-iqtisadi nailiyyətlərin qazanılmasında və ən mühüm siyasi tədbirlərin müvəffəqiyyətlə həyata keçirilməsində Yasamal rayonunun da özünəməxsus payı vardır. Yasamal rayonu da paytaxtımızın mərkəzi rayonlarından biri olduğundan hər zaman xüsusi diqqət mərkəzindədir. Son illərdə rayonda coxsaylı təhsil, səhiyyə və mədəniyyət müəssisələrinin, yol qovşaqlarının, yeraltı piyada keçidlərinin, yeni inzibati binaların tikintisi, tarixi memarlıq abidələrinin, dini-mənəvi dəyərləri özündə əks etdirən obyektlərin bərpası və yenidən qurulması sahəsində genişmiqyaslı işlər görülmüşdür. Bizim üçün sevindiricidir ki, ötən 5 ildə Prezident İlham Əliyev 36 dəfə rayonumuzda olmuş, 34 obyektin açılışında iştirak etmişdir.

Artıq bir neçə ildir ki, Yasamal rayonunun iqtisadi göstəriciləri xeyli yüksəlib. Sənaye məhsulunun istehsalı 2010-cu ildə 2003-cü ilə nüsbətən 7 dəfə, əsas kapitala yönəldilmiş investisiya 12 dəfə, tikinti-quraşdırma işləri 21 dəfə, nəqliyyat xidməti 6 dəfə, rabitə xidməti 3 dəfə artmışdır. İşləyən vətəndaşların orta aylıq əməkhaqqı 2003-cü illə müqayisədə 4 dəfə artmışdır. 2003-2011-ci illər ərzində rayonda 20790 daimi iş yeri açılmışdır. Son 8 ildə ölkə Prezidentinin daimi diqqəti və sosial yönümlü siyasəti sayəsində rayonun imtiyazlı kateqoriyadan olan ailələrinin mənzil-məişət şəraitinin yaxşılaşdırılması üçün 138 ailəyə yeni mənzillər verilmişdir. Təkcə bu faktın özü əyani şəkildə sübut edir ki, ölkə Prezidenti tərəfindən sosial müdafiəyə ehtiyacı olan insanlara qayğı hansı səviyyədədir.

Yasamal rayonunda 2003-2010-cu illərdə 2976 şagird yerlik 3 yeni məktəb binası, 4 məktəbdə isə 1500 şagird yerlik əlavə tədris korpusları tikilib istifadəyə verilmişdir. 7 məktəb binası və uşaq yaradıcılıq mərkəzi əsaslı təmir edilmişdir. Xatırlatmaq istərdim ki, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafı Proqramı"na Yasamal rayonu üzrə 67 tədbir salınmışdır. Artıq proqramda qarşımıza qoyulmuş vəzifələrin icrası ilə əlaqədar 3 orta məktəbdə əsaslı təmir və yenidənqurma işləri yüksək səviyyədə başa çatdırılaraq yeni dərs ilində istifadəyə verilmiş, 8 körpələr evi-uşaq bağçasında isə təmir işləri başa çatmaq üzrədir.

Son 5 ildə rayonumuzun ərazisində yerləşən və paytaxtımızın ən görkəmli gəzinti yerlərindən olan Hüseyn Cavid, İzmir, Elmlər Akademiyası, Nəriman Nərimanov, Mehdi Hüseynzadə adına parklarda, Füzuli, Mikayıl Müşfiq küçəsi ilə H.Cavid küçəsinin kəsişməsindəki meydanlarda ən müasir səviyyədə əsaslı təmir və yenidənqurma işləri aparılaraq sakinlərin istifadəsinə verilmişdir. Mətbuat prospekti ilə Nazim Hikmət küçəsinin kəsişməsində yerləşən (keçmiş Musabəyov heykəlinin yerləşdiyi sahədə), uzun illərdən bəri baxımsız vəziyyətdə qalmış ərazidə ən müasir standartlara cavab verən yeni istirahət parkı salınmışdır. Həmin ərazinin görkəminə xələl gətirən 7 yaşayış binasının fasad hissəsi tamamilə yenidən qurulmuşdur. Bundan başqa, ölkəmizin müstəqillik tarixində ilk dəfə olaraq Yasamal Rayon İcra Hakimiyyətinin inzibati binası və Heydər Əliyev məktəb-muzeyinin binası yüksək səviyyədə tikilib istifadəyə verilmişdir. Ümummilli liderin əziz xatirəsinin əbədiləşdirilməsi, onun zəngin irsinin öyrənilməsi baxımından böyük əhəmiyyəti olan məktəb-muzeydə Heydər Əliyevin həyat və fəaliyyətinin müxtəlif dövrlərini əks etdirən fotoşəkillər və eksponatlar nümayiş olunur. Fəaliyyətə başladığı gündən bu günə kimi məktəb-muzeyə 30 mindən çox tələbə, şagird və digər təbəqələrdən olan insanlar gələrək ulu öndərin zəngin irsi ilə yaxından tanış olmuşlar. Məktəb-muzeydə müxtəlif mövzularda konfranslar, "dəyirmi masa"lar, açıq dərslər və digər tədbirlər keçirilir. Burada müxtəlif tədbirlərin keçirilməsi ənənə halını almışdur və Heydər Əliyev məktəb-muzeyi öz fəaliyyəti ilə rayonumuzun ideoloji mərkəzinə çevrilmişdir.

Son beş ildə Yasamal rayonunda genişmiqyaslı abadlıq və yaşıllaşdırma tədbirləri də görülmüşdür. 50-dən çox müxtəlif yaşayış məhəlləsində nümunəvi "abad məhəllə" yaradılmışdır. Həmin məhəllələrdə sakinlərin istirahəti üçün zəruri olan bütün şərait tam təmin edilmişdir. Yeniyetmə və gənclərin asudə vaxtlarının səmərəli təşkili, idmanla məşğul olmaları üçün Murtuza Muxtarov və Süleyman Dadaşov küçələrində müasir standartlara cavab verən süni ot örtüklü mini- futbol meydançaları tikilib gənclərimizin istifadəsinə verilmişdir.

"20 Yanvar" faciəsinin 20-ci ildönümü ilə əlaqədar faciə qurbanlarının xatirəsinə 20 Yanvar dairəsində "20 Yanvar" memorial abidə kompleksi yaradılmışdır. Bu möhtəşəm abidə kompleksinin yaradılması cənab Prezidentin bilavasitə təşəbbüsü ilə həyata keçirilmişdir.

Tarixi və mədəni abidələrimiz də daim diqqət mərkəzində olmuşdur. Rayon ərazisində yerləşən N.Nərimanovun, Məhəmməd Füzulinin, Sovet İttifaqı Qəhrəmanı Mehdi Hüseynzadənin, Mikayıl Müşfiqin, Hüseyn Cavidin abidələri əsaslı bərpa olunmuşdur. Milli Dram Teatrının binası əsaslı təmir və yenidənqurmadan sonra ən müasir standartlara cavab verən səviyyədə istifadəyə verilmişdir.

Yasamal rayonunda abadlıq-quruculuq və humanitar yönümlü tədbirlərin həyata keçirilməsində Heydər Əliyev Fondunun və onun prezidenti, Milli Məclisin deputatı Mehriban xanım Əliyevanın xüsusi xidmətləri vardır. Bu günlərdə yüksək səviyyədə əsaslı təmirdən sonra pedaqoji kollektivin və şagirdlərin istifadəsinə verilən 13 saylı orta məktəbdə aparılan yenidənqurma işləri Heydər Əliyev Fondunun təşəbbüsü və maliyyə dəstəyi ilə həyata keçirilmişdir. Milli Konservatoriyanın yeni binası da Heydər Əliyev Fondunun dəstəyi ilə inşa olunur.

Bu gün Yasamal rayonu sürətlə abadlaşır və paytaxtımızın ən gözəl guşəsinə çevrilir. Söz açdığım faktlar isə son illər rayonda aparılan genişmiqyaslı işlərin yalnız bir hissəsinin qısa xronikasıdır. Yasamal rayonunun hər bir sakini Prezident İlham Əliyevin rəhbərliyi altında qazanılan uğurların bəhrəsini öz gündəlik həyatında bariz şəkildə hiss edir, ölkədəki ümumi yüksəliş və tərəqqi xəttini ürəkdən dəstəkləyir.

Qarşıda isə bizi daha böyük işlər gözləyir. Hər zaman çalışacağıq ki, fəaliyyətimizlə vətənimizin inkişafına xidmət edək. Bu, Prezident İlham Əliyevin qarşımıza qoyduğu ən ümdə vəzifədir.

Bəxtiyar SADIQOV:

- Bakı şəhəri üzrə həyata keçirilən iqtisadi layihələr, azad sahibkarlıq üçün münbit şəraitin formalaşdırılmasının nəticəsi olaraq Yasamal rayonunda son illərdə çoxlu sayda yeni istehsal və xidmət sahələri yaranıb. O cümlədən vaxtilə fəaliyyət göstərmiş müəssisələrin işi bərpa edilib. Yasamal rayonunda həm də tikinti işləri sürətlə gedir. Rayon ərazisində tikilən yeni yaşayış binalarının sayı yüzlərlədir. Bu barədə danışmaq üçün söz rayonda fəaliyyət göstərən "Şəfəq" MMC-nin İdarə Heyətinin sədri, Yasamal Bələdiyyəsinin üzvü Vasif İsmayılova verilir:

Vasif İSMAYILOV:

- Azərbaycan dövlət müstəqilliyinə nail olduqdan sonra ölkəmizdə bütün sahələrdə yeni siyasi-ictimai formasiyanın diktə etdiyi islahatlar aparılmalı idi. O cümlədən iqtisadi sahədə islahatlar qaçılmaz idi. "Azərbaycan Respublikasının Dövlət Müstəqilliyi haqqında Konstitusiya Aktı"nda da bu barədə müddəalar yer almışdı. Həmin ərəfədə keçid dövrünü yaşayan Azərbaycanın hansı iqtisadi modelə üstünlük verəcəyi ilə bağlı müxtəlif fikirlər söylənsə də, 1991-1993-cü illərdə hakimiyyətdə olan dairələr, ümumiyyətlə, hər hansı bir sahədə islahat həyata keçirməyə təşəbbüs belə göstərmədilər.

Yalnız Heydər Əliyevin hakimiyyətə qayıdışından sonra Azərbaycanda bütün sahələrdə islahatlar həyata keçirildi, iqtisadi sahədə tənəzzülün qarşısı alındı. Ulu öndər respublikamızın özünəməxsus cəhətlərini, coğrafi mövqeyini, təbii resurslarını hərtərəfli nəzərə alaraq azad bazar iqtisadiyyatı prinsiplərini əsas götürdü və beləliklə, Azərbaycanın yeni dövr üçün inkişaf xəttini müəyyənləşdirdi.

Aydındır ki, hər bir ölkənin iqtisadi inkişafı, xalqın maddi rifah halının yaxşılaşması müxtəlif amillərlə yanaşı, azad sahibkarlıq fəaliyyəti üçün yaradılan şəraitlə də bağlıdır. Məhz buna görə ulu öndər Heydər Əliyev sahibkarlığın inkişafına əngəl yaradan bütün maneələri aradan qaldırdı. Ölkəmizdə sərbəst biznes mühitinin yaradılması üçün zəruri sənədləri imzaladı. O illərdən etibarən əlverişli sahibkarlıq mühitinin formalaşması istiqamətində həyata keçirilən ardıcıl islahatların nəticəsi olaraq ölkəmizdə güclü iqtisadi resurslara və potensiala malik sahibkarlar sinfi yarandı.

Ümummilli lider Heydər Əliyev tərəfindən müəyyən edilmiş sosial-iqtisadi inkişaf strategiyası bu gün Prezident İlham Əliyev tərəfindən yeni keyfiyyət mərhələsinə qaldırılaraq uğurla həyata keçirilir. Dövlətimizin başçısı azad sahibkarlığın inkişafı məsələlərini daim diqqət mərkəzində saxlayır.

Bakının iri rayonlarından olan Yasamal rayonu 1993-cü ildən sonra böyük inkişaf yolu keçib. Xüsusən son illərdə həyata keçirilən irimiqyaslı layihələrin nəticəsi olaraq rayonumuzun iqtisadi göstəriciləri artan dinamika ilə inkişaf etmişdir. Hazırda "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" Yasamal rayonunda uğurla icra edilir. Rayonumuz üzrə bu müddət ərzində icrası nəzərdə tutulan 53 bənddən ibarət tədbirlər planı həlli tələb olunan bütün sahələri əhatə edir.

Bizim üçün sevindiricidir ki, hazırda Yasamal rayonunda aparılan quruculuq və abadlıq işlərində özəl sektorun, iş adamlarının böyük rolu var. Xüsusilə tikinti sektorunda ayrı-ayrı iş adamları tərəfindən rayonda aparılan işlər daha nəzərəçarpandır. Belə ki, 2003-cü illə müqayisədə təkcə keçən il tikinti sahəsinə yönəldilmiş sərmayə 20 dəfə çox olmuşdur.

Təmsil etdiyim "Şəfəq" MMC də tikinti və layihələndirmə işləri ilə məşğuldur. Ölkəmizdə sahibkarlığın inkişafı üçün yaradılmış şəraitin nəticəsidir ki, 1998-ci ildən fəaliyyət göstərən şirkətimiz tərəfindən bu müddət ərzində təkcə Yasamal rayonunda 64 min kvadratmetr fərdi yaşayış mənzilləri inşa edilmiş, 600-ə yaxın yeni iş yeri açılmışdır.

Azərbaycanın bütün regionlarında, xüsusilə Bakıda aparılan yenidənqurma işlərinin keyfiyyəti və sürəti qonşu respublikalarda da bizim şirkətlərə maraq yaradır və fəaliyyət sərhədlərimizi genişləndirir. "Şəfəq" MMC də artıq 3 ildir ki, Belarusun Moqilyov vilayətində fəaliyyət göstərir. Bu müddət ərzində Belarusda 20 min kvadratmetr fərdi yaşayış evi tikib istifadəyə vermişik, 70 min kvadratmetr mənzil sahəsinin layihələndirmə işləri isə yekunlaşmaq üzrədir.

Ölkəmizdə azad sahibkarlığın inkişafına yaradılan şəraitin nəticəsidir ki, iş adamları müxtəlif sahələrə sərmayələr yatırır. Bu da öz növbəsində, ölkə üzrə ümumi daxili məhsulun artımına, yeni iş yerlərinin yaradılmasına, əhalinin sosial rifahının yüksəlişinə öz töhfələrini verir. Biz gələcək fəaliyyətimizdə də respublikamızın və Yasamal rayonunun sosial-iqtisadi inkişafı istiqamətində səylərimizi əsirgəməyəcəyik.

Bəxtiyar SADIQOV:

- Bu, bir həqiqətdir ki, iqtisadi inkişaf sosial sahəyə diqqətin artırılmasına da təkan verir. Yeni yaranan müəssisələr həm də iş yerləri, ailələrin gəlir mənbəyi deməkdir. Son illərdə dövlətimizin maliyyə imkanlarının çoxalması əməkhaqlarının, pensiyaların artımına ciddi təsir göstərib. Sosial məsələlər, xüsusən əlillərin, müharibə veteranlarının, qaçqın və məcburi köçkünlərin sosial problemlərinin yoluna qoyulması Yasamal rayonunda da diqqət mərkəzindədir. Bu barədə danışmaq üçün söz Yasamal rayon sakini, şəhid atası, "20 Yanvar" fondunun sədri Yusif Bünyadzadəyə verilir:

Yusif BÜNYADZADƏ:

- Dövləti qurmaq siyasi bacarıq və dünyagörüş, titanik əmək tələb edir. Lakin müstəqilliyimizin ilk illərində iqtidarda olanlar bu missiyanın öhdəsindən gələ bilmədilər. 1993-cü ilə qədər ölkədə gedən hakimiyyət dartışmaları, bunun nəticəsində yaranan hakimiyyətsizlik, baş qaldıran separatçılıq meyilləri, tüğyan edən cinayətkarlıq və cəbhədəki uğursuzluqlar müstəqilliyimizin gələcəyini təhlükə altına qoymuşdu.

Ona görə həmin ağır günlərdə səriştəsiz iqtidarın "idarəçiliyindən" cana doyan, yeritdiyi siyasətin müstəqilliyimizi məhvə apardığını görən Azərbaycan xalqı ölkəni düşdüyü böhrandan xilas etmək üçün Heydər Əliyevə müraciət etdi. Zaman göstərdi ki, xalq öz seçimində yanılmayıb.

Bu mənada Azərbaycanın dövlət müstəqilliyinin yaşadılması və əbədi olması xalqımızın böyük oğlu Heydər Əliyevin adı ilə qırılmaz surətdə bağlıdır. Çünki 1991-1993-cü illərin təhlili göstərir ki, əgər ulu öndər Heydər Əliyev siyasi hakimiyyətə gəlməsəydi, müstəqilliyimizi qoruyub saxlamaq mümkün olmazdı.

Ulu öndər Heydər Əliyevin siyasi kursunu, onun iqtisadi inkişaf strategiyasını uğurla davam etdirən Azərbaycan Prezidenti İlham Əliyev ölkəmizin dövlət müstəqilliyinin möhkəmləndirilməsi və daha da inkişaf etdirilməsi üçün əzmkar siyasət həyata keçirir. Son illərdə icra olunan dövlət proqramları nəticəsində Azərbaycanın iqtisadi potensialı tam hərəkətə gətirilib, iqtisadiyyatımız üç dəfə artıb.

Ölkəmizin sürətli sosial-iqtisadi inkişafına paralel olaraq vətəndaşların sosial rifahı yüksəlir, maddi gəlirləri mütəmadi olaraq artır.

Bütün bunlar ölkəmizin inkişaf strategiyasını inamla davam etdirərək yeni dövrün tələblərinə uyğun müasirləşdirən Prezident İlham Əliyevin həyata keçirdiyi məqsədyönlü siyasətinin nəticəsidir. Əhalinin maddi rifah halının davamlı şəkildə yüksəlməsi, insanların layiqli həyat tərzinin təmin olunması baxımından Azərbaycan dünyanın ən nümunəvi dövlətləri sırasında yer almaqdadır.

Ölkəmizin hər yerində olduğu kimi, Yasamal rayonunda da şəhid ailələrinin, müharibə əlilləri və veteranlarının, o cümlədən aztəminatlı əhalinin sosial müdafiəsi prioritet məsələlərdən biridir. Hazırda Yasamal rayonunda 10327 nəfər ailə üzvünü əhatə edən 2648 aztəminatlı ailə dövlətdən ünvanlı sosial yardım alır, 368 nəfər tənha və kimsəsizə sosial xidmət göstərilir. Şəhid ailələrinə, əlillərə, digər aztəminatlı ailələrə mütəmadi olaraq maddi və ərzaq yardımları edilir.

Yeni Yasamal yaşayış massivində Qarabağ müharibəsi əlilləri, şəhid ailələri və digər imtiyazlı insanlar üçün inşa edilmiş 81 mənzilli 9 mərtəbəli yaşayış binasında rayonumuzun 50-dən çox imtiyazlı ailəsinə yeni mənzil verilmişdir. Ümumiyyətlə isə, 2003-2011-ci illər ərzində 138 mənzil verilmişdir. Beləliklə, rayonumuzda əlil və şəhid ailələrinin mənzillə təminatı məsələsi əsasən öz həllini tapmışdır. Dövlətin qayğısı onu göstərir ki, yaxın 2-3 ildə bu cür insanların mənzil problemi qalmayacaqdır.

Ölkəmizdə sosial rifah halının yüksəlişi, insanların həyat səviyyəsinin yaxşılaşması, doğma torpaqlarının nisgili ilə yaşayan bir milyondan artıq qaçqın və məcburi köçkünün timsalında özünü aydın büruzə verir. Ölkə rəhbərliyinin xüsusi diqqət və qayğısının nəticəsidir ki, qaçqın və məcburi köçkünlərin həyat səviyyəsi, mənzil-məişət şəraitləri əhəmiyyətli dərəcədə yaxşılaşmışdır. Hazırda Yasamal rayonu ərazisində 23427 nəfər məcburi köçkün yaşayır. Onların böyük əksəriyyəti rayon ərazisindəki ali və orta ixtisas məktəblərinin yataqxanalarında, uşaq bağçalarında və digər inzibati binalarda məskunlaşmışdır. Məcburi köçkünlərin sosial və məişət problemləri daim rayon İcra Hakimiyyətinin diqqət mərkəzindədir, onlara hər zaman lazımi kömək göstərilir. Fərəhli haldır ki, son dövrlərdə məcburi köçkünlərin bir qismi dövlət proqramına əsasən inşa edilmiş mənzillərlə təmin olunmuşlar.

Onu da nəzərinizə çatdırmaq istəyirəm ki, ötən il "20 Yanvar" faciəsinin 20-ci ildönümü ilə əlaqədar faciə qurbanlarının xatirəsinə 20 Yanvar dairəsində - Həsən bəy Zərdabi və Müzəffər Həsənov küçələrinin kəsişməsində "20 Yanvar" memorial abidə kompleksi yaradılmışdır. Kompleksin arxa hissəsində 2000 kvadratmetr sahədə abadlıq işləri aparılmışdır.

Bütövlükdə, Yasamal rayonunda ehtiyacı olan vətəndaşların sosial müdafiəsinin gücləndirilməsi diqqət mərkəzində saxlanılır. Respublikamızın inkişafı və maliyyə imkanlarının ildən-ilə artması rayonumuzda da xüsusi qayğıya ehtiyacı olan vətəndaşların sosial müdafiəsinin daha keyfiyyətlə həyata keçirilməsinə yol açır.

Bəxtiyar SADIQOV:

- Gənclik istənilən cəmiyyətdə böyük qüvvədir. Hər bir ölkənin gələcəyi gənclərin sosial-siyasi fəallığından əhəmiyyətli dərəcədə asılıdır. Ümummilli lider Heydər Əliyev tərəfindən müəyyənləşdirilmiş və Prezident İlham Əliyev tərəfindən uğurla davam etdirilən dövlət gənclər siyasətinin aparıcı xəttini həm də bu mühüm konsepsiya təşkil edir. Bunun nəticəsidir ki, Yasamal rayonunda qazanılan uğurlarda gənclərin rolu artır. Yasamal rayonunun gəncləri adından danışmaq üçün söz Yeni Azərbaycan Partiyasının Yasamal rayon təşkilatının Gənclər Birliyinin sədr müavini Vüsalə Niftəliyevaya verilir:

Vüsalə NİFTƏLİYEVA:

- Müstəqillik tariximizin ən şanlı səhifələrinin yazılmasında Azərbaycan gənclərinin mühüm rolu var. Gənclər hər zaman xalqımızın azadlıq mübarizəsinin önündə olmuşlar. Ölkəmizin ərazi bütövlüyü uğrunda gedən döyüşlərdə, dövlətçiliyimizə qarşı yönəlmiş qəsdlərin qarşısının alınmasında yüzlərlə gənc şəhidlik zirvəsinə ucalmışdır.

Lakin müstəqilliyimizin ilk çağlarında gənclər siyasəti başlı-başına buraxılmış, cəmiyyətin aparıcı qüvvəsinin potensialından səmərəli istifadə olunmamışdır. Əksinə, ayrı-ayrı başabəla liderlər, "siyasi qüvvələr" həyat təcrübəsi az olan gənclərdən öz məkrli niyyətlərini həyata keçirmək üçün bəhrələnmişlər.

Azərbaycan dövlətçiliyi tarixində ilk dəfə olaraq müstəqillik dönəmində ümummilli lider Heydər Əliyevin təşəbbüsü ilə 1994-cü ildə gənclərlə iş sahəsində dövlət qurumu olan Gənclər və İdman Nazirliyinin yaradılması mühüm əhəmiyyət kəsb edirdi. Nazirliyin yaradılması böyük sayda gənclər ordusunun potensialının Azərbaycanın dövlət müstəqilliyinin möhkəmləndirilməsi işinə yönəltmək, onlar arasında dövlətçilik ənənəsinin formalaşması üçün mühüm vasitə oldu.

Son illər respublikamızda hər bir sahədə inkişafla yanaşı, gənclər siyasətində də mühüm irəliləyişlər müşahidə edirik. Ulu öndər Heydər Əliyevin siyasi xəttini uğurla davam etdirən Prezident İlham Əliyev tərəfindən həyata keçirilən gənclər siyasəti bu gün gənclərimizin hərtərəfli inkişafını, ölkənin ictimai-siyasi həyatında fəal iştirakını təmin edir. Ümumiyyətlə, gənclər siyasəti dövlət siyasətinin mühüm tərkib hissəsinə çevrilib. Qəbul edilmiş bütün normativ hüquqi sənədlər, o, cümlədən 2005-2009-cu illəri əhatə etmiş Azərbaycan Gəncliyi Dövlət proqramı dövlət gənclər siyasətinə olan diqqət və qayğının bariz nümunəsidir. Gənclərlə düzgün iş strategiyasının qurulması sayəsində Azərbaycan gənci idman, elm, təhsil, mədəniyyət, incəsənət və s. sahələrdə böyük nailiyyətlər əldə edir, dövlətçilik ənənələrini daim uca tutur, islahatların həyata keçirilməsində yaxından iştirak edir.

Prezident İlham Əliyev tərəfindən imzalanmış "Azərbaycan Gəncliyi 2011-2015 -ci illərdə" Dövlət Proqramı dövlət gənclər siyasətinin davamlılığını və bu sahədə yeni mərhələnin başlandığını ehtiva edir. Bu proqram qəbul olunmazdan öncə ictimai müzakirəyə çıxarılmışdır. Müzakirədə Yasamal rayon gəncləri də fəal iştirak etmişlər. Toplanmış təkliflər dövlət proqramı üzərində çalışan işçi qrupuna təqdim edilmişdir. Rayon gənclərinin müraciətinə əsasən Yeni Yasamal yaşayış massivində idman və sağlamlıq kompleksinin tikilməsi dövlət proqramında öz əksini tapmışdır. Proqramın Yasamal rayonunda geniş şəkildə həyata keçirilməsi məqsədi ilə rayon İcra Hakimiyyəti başçısı tərəfindən müvafiq sərəncam imzalanmışdır.

Yasamal rayonu əhalisinin 35 faizini gənclər təşkil edir. Eyni zamanda, rayon ərazisində yerləşən ali və orta təhsil müəssisələrində təqribən 40 minə yaxın gənc təhsil alır. Dünyanın nüfuzlu ali məktəblərində təhsil alan Yasamal rayon gəncləri həm də Azərbaycan həqiqətlərini təbliğ edirlər. Bu sahədə dövlətimiz gənclərə güclü dəstək verir.

Yasamal rayon Gənclər və İdman İdarəsi dövlət proqramlarını əldə rəhbər tutaraq yeniyetmə və gənclər arasında sağlam həyat tərzinin təbliği, asudə vaxtın səmərəli təşkil olunması istiqamətində tədbirlər həyata keçirir. Son illər respublikamızın hər yerində olduğu kimi, rayonumuzda da abadlıq və səliqə-sahman işlərinin aparılması, idman qurğularının bərpası və yenilərinin quraşdırılması böyüməkdə olan gənc nəslin sağlamlığının möhkəmləndirilməsində xüsusi rol oynayır. Rayon ərazisində onlarla nümunəvi məhəllələrin abadlaşdırılması və həmin məhəllələrdə idman qurğularının quraşdırılmasının hər birimiz şahidiyik. Eyni zamanda son 3 il ərzində rayonun daxili imkanları hesabına müasir standartlara uyğun süni ot ortüklü 2 mini-futbol meydançasının istifadəyə verilməsi gənclərin idmana kütləvi cəlb olunmasına səbəb olmuşdur. Bu, bir daha dövlətimizin gəncliyimizə olan diqqət və qayğısının təcəssümüdür.

Ölkəmizin sağlam düşüncəli vətəndaşları kimi Yasamal rayon gəncləri də Prezident İlham Əliyevin dövlətçiliyimizin inkişafı və çiçəklənməsi naminə həyata keçirdiyi siyasətə öz əməlləri ilə dəstək verirlər. Gənclərimiz Prezident İlham Əliyevin uğurlu fəaliyyətindən, Azərbaycanın dövlət müstəqilliyinin möhkəmləndirilməsi naminə göstərdiyi xidmətlərdən qürur duyurlar.

Bəxtiyar SADIQOV:

- Dinamik inkişaf yolunda aparılan abadlıq-quruculuq işləri də əsas fəaliyyət istiqamətidir. Bu gün rayonun bütün küçə və prospektləri, park və xiyabanları yenidən qurulur, yaşayış binalarının fasadları yenilənir. Biz də Yasamal rayonu ərazisində fəaliyyət göstərdiyimiz üçün bütün bunların əyani şahidiyik. Rayonda aparılan abadlaşdırma və quruculuq işləri barədə fikirlərini bölüşmək üçün söz Yasamal rayon sakini, Bakı Dövlət Universitetinin professoru, kimya elmlər doktoru İsmayıl Əliyevə verilir:

İsmayıl ƏLİYEV:

- Milli iqtisadi modeli, makroiqtisadi uğurları ilə dünyanın aparıcı maliyyə mərkəzlərinin diqqət mərkəzində olan, insan amilinin yüksəlişinə xidmət edən qlobal infrastruktur layihələrini inamla həyata keçirən, sosial məsələlərə geniş diqqət ayıran Azərbaycan, eyni zamanda, böyük tikinti meydanını xatırladır. Prezident İlham Əliyev inzibati mərkəz statusu daşıyan Bakının Şərq və Qərb arxitekturasının uğurlu sintezi əsasında yenidən qurularaq modern Avropa şəhərinə çevrilməsi üçün müəyyənləşdirdiyi kompleks tədbirlərin icrasını gündəlik nəzarətdə saxlayır.

Prezident İlham Əliyevin 4 may 2011-cu il tarixli sərəncamı ilə təsdiq edilmiş "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" da dövlət başçısının verdiyi hər bir vədə sadiqliyini nümayiş etdirir. Bakı şəhərinin və ətraf qəsəbələrin problemlərinin həllini önə çəkən məqsədyönlü və ardıcıl tədbirlər sistemi paytaxtın qədim tarixi ənənələrə, mədəni-mənəvi irsə malik rayonlarından olan Yasamalın da simasını əsaslı şəkildə dəyişib. 20 il əvvəllə müqayisədə Yasamal rayonu tanınmaz dərəcədə müasirləşib desək, hansısa mübaliğəyə yol vermiş olmarıq. Hələ Sovetlər birliyi dövründən Bakının ziyalı, alim və tələbə kontingentinin sıx yaşadığı bu rayon müstəqilliyin ilk illərində ciddi problemlərlə üzləşmişdi. Bütün respublikada olduğu kimi, bu rayonda da iri müəssisələr fəaliyyətini dayandırmaq məcburiyyətində qalmış, istehsal prosesi zəifləmiş, işsizliyin səviyyəsi dözülməz həddə çatmış, əhalinin sosial vəziyyəti pisləşmişdi. Rayonun sosial-mədəni infrastrukturu tamamilə yararsız hala düşmüş, ekoloji problemlərin kəskinləşməsi insanların sağlamlığı üçün ciddi təhlükəyə çevrilmişdi. Qısası, bütövlükdə respublikada hökm sürən sosial-iqtisadi tənəzzül prosesinin doğurduğu ciddi problemlər və depressiv ovqat Yasamalda da özünün kəskinliyi ilə duyulurdu.

1993-cü ildə xalqın tələbi ilə respublikada hakimiyyətə qayıdan ulu öndər Heydər Əliyev bu rayonun problemlərinə xüsusi diqqət və qayğı ilə yanaşdı. Yasamal rayonu tədricən iqtisadi potensialını bərpa etdi, əvvəlki şöhrətini özünə qaytardı. İnsanların rifahında, yaşayış tərzində əsaslı keyfiyyət dəyişiklikləri baş verdi.

Son illərdə Azərbaycanın təkcə dövlət büdcəsinin gəlirlərinin deyil, ümumən valyuta ehtiyatlarının dinamik artımı Yasamal rayonunun da problemlərinin həllinə imkanlar yaradıb. Yasamaldakı real sosial-iqtisadi inkişaf əsla quru, cansız rəqəmlərdə deyil, rayon sakinlərinin gündəlik həyatında, məişətində, maddi rifah halında əksini tapır. Ötən 8 ildə Prezident İlham Əliyevin dəfələrlə Yasamal rayonunda olması, onun inkişaf perspektivləri ilə bağlı dəyərli tövsiyə və tapşırıqlarını verməsi görülən işlərin səmərəsini və keyfiyyətini artırıb. Ümumiyyətlə, bu illər ərzində mövcud potensialın səmərəli realizə edilməsi, rayonun malik olduğu əmək ehtiyatlarının və digər resursların konkret məqsədlərə yönəldilməsi, ən başlıcası, Azərbaycan Prezidentinin imzaladığı dövlət proqramlarından, fərman və sərəncamlarından irəli gələn vəzifələrin əzm və bacarıqla həyata keçirilməsi Yasamal rayonunun bugünkü uğurlarını şərtləndirən başlıca məqamlar sırasındadır.

Xüsusilə də son aylarda buraya yolu düşənlər rayondakı genişmiqyaslı abadlıq və quruculuq, yenidənqurma işlərinə heyrətlərini gizlədə bilmirlər. Ən müasir şəhərlərə xas arxitektura əsasında abadlaşdırılan rayonun əksər küçə, meydan, park və xiyabanlarında, sosial-mədəni, inzibati obyektlərində, o cümlədən çoxsaylı yaşayış binalarında aparılan təmir və yenidənqurma işləri, həqiqətən, göz oxşayır. İlk baxışdan aydın görünür ki, görülən işlər kampaniyaçılıqdan, kosmetik dəyişikliklərdən tamamilə uzaq olub rayonun uzun illərdən bəri həllini gözləyən problem və qayğılarının kompleks həlli məqsədinə hesablanıb.

Yasamal sakinlərinin rahat, firavan yaşayışının təmin edilməsi baxımından müxtəlif sahələr üzrə infrastrukturun yeniləşdirilməsinə, kommunal xarakterli problemlərin həllinə xüsusi diqqətlə yanaşılır. Ötən dövrdə rayonda elektrik təchizatı, su və kanalizasiya sisteminin yenidənqurulması, yolların əsaslı bərpası, sosial infrastrukturun müasirləşdirilməsi istiqamətində mühüm tədbirlər görülüb.

Yasamal Rayon İcra Hakimiyyətinin təşəbbüsü əsasında aidiyyəti strukturlarla birgə rayonda qəza vəziyyətində olan binaların təmiri, fasadların yenidən qurulması, yaşayış binalarının həyətlərində abad məhəllələrin yaradılması, idman meydançalarının tikilməsi, ərazinin ekoloji cəhətdən sağlamlaşdırılması və abadlaşdırılması işlərinə başlanılmışdır. Qısaca demək olar ki, ötən 8 il müddətində 60-dan çox məhəllə abadlaşdırılmış, o cümlədən yaşadığım A.Abbasov küçəsi, 11 saylı binanın həyətində nümunəvi məhəllə yaradılmışdır. 2 mini - futbol meydançası tikilmiş, 2 yeni park salınmış, mövcud 10 parkda isə əsaslı yenidənqurma işləri görülmüşdür.

Rayonun daxili imkanları hesabına reallaşdırılan mühüm layihələr sırasında müstəqilliyimizin memarı Heydər Əliyevin xatirəsinin ədədiləşdirilməsi tədbirlərini xüsusi vurğulamaq lazımdır. 2009-ci ildə Prezident İlham Əliyev Yasamal Rayon İcra Hakimiyyətinin yeni inzibati binasının və Heydər Əliyev Məktəb-Muzeyinin, habelə yaxınlıqda yeni salınmış parkın açılış mərasimlərində iştirak edib, görülən işlərdən razılığını bildirib.

Bəli, Azərbaycanın 20 illik müstəqillik tarixinin möhtəşəm izləri bu gün Yasamal rayonunda da özünü qabarıq göstərir. Rayonun son illərdə əldə etdiyi nailiyyətlər isə ünvanlı və məqsədyönlü olmaqla, hər bir sakinin sosial rifah halının yüksəldilməsi, mənafeyinin qorunması məqsədini önə çəkir. Yasamal sakinləri inanırlar ki, dövlət başçısı İlham Əliyevin diqqət və qayğısı nəticəsində rayonun narahatlıq doğuran bütün problemləri ən qısa zamanda uğurlu həllini tapacaqdır.

Bəxtiyar SADIQOV:

- 2004-cü ildə yaradılan Heydər Əliyev Fondu möhtəşəm fəaliyyəti ilə qısa zamanda nəinki ölkəmizdə, bir sıra xarici ölkələrdə də xeyirxahlıq və mərhəmət ünvanına çevrilib. YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərlik etdiyi Fond ulu öndərin irsinin təbliği və öyrənilməsi ilə yanaşı, xeyriyyəçiliyi, müxtəlif humanitar aksiyalar, sosial layihələr gerçəkləşdirməyi fəaliyyətinin prioritet istiqamətlərindən hesab edir. Heydər Əliyev Fondu Yasamal rayonunda da xeyirxahlığın və quruculuğun əsas ünvanına çevrilib və bu mövzuda danışmaq üçün söz 13 nömrəli məktəbin direktoru Rəfiqə Məmmədovaya verilir:

Rəfiqə MƏMMƏDOVA:

- Şərqlə Qərbin qovuşduğu məkanda Azərbaycanda iki sivilizasiyanın konseptual parametrlərini özündə birləşdirən dövlət modelini ümummilli lider Heydər Əliyev yaratmışdır. Heydər Əliyevin sayəsində Azərbaycanın dövlət müstəqilliyi bərqərar edilmiş, demokratik dövlət qurulmuş, onun təsisatları formalaşmışdır.

Ümummilli liderin zəngin dövlətçilik irsinin öyrənilməsi, onun ölməz ideyalarının təbliğ olunaraq praktik həyatda tətbiqi və gələcək nəsillərə çatdırlması müasir qloballaşma dövründə xüsusi əhəmiyyət kəsb edir. Yarandığı gündən məhz bu ali məqsədi qarşısına məqsəd qoyan Heydər Əliyev Fondu öz fəaliyyətilə cəmiyyətin ümid, nicat ünvanına çevrilmişdir. Azərbaycanın birinci xanımı, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərliyi etdiyi Heydər Əliyev Fondu yarandığı gündən dahi öndərin mərhəmət, nəciblik və yüksək humanizmə əsaslanan saf ideallarının ictimai şüurda möhkəmlənməsi, xalqımızın gələcəyi naminə müxtəlif sosial layihələri inamla həyata keçirir. Respublikamızda aparılan quruculuq işlərində, təhsil, elm, mədəniyyət, səhiyyə və digər sahələrdə Heydər Əliyev Fondunun səmərəli fəaliyyəti xalqa qayğı və diqqətin, xeyirxahlığın bariz nümunəsidir. Qəlbən vətənə, xalqa bağlı Prezident İlham Əliyevlə çiyin-çiyinə çalışan ölkəmizin birinci xanımının fəaliyyəti cəmiyyətimizdə humanizm ənənələrinin yaşamasına, xeyriyyəçiliyə yönəlmişdir ki, bu da xalqın sabaha, ölkə hakimiyyətinə olan inamını və etimadını artırır.

Mən təhsil işçisi olduğum üçün Heydər Əliyev Fondunun bu sahədə gördüyü işlərə toxunmaq istəyirəm. Fondun təhsillə bağlı fəaliyyəti genişmiqyaslıdır. Ali və orta məktəblər, uşaq evləri, uşaq bağçaları daim Fondun diqqət mərkəzindədir. Mehriban xanım Əliyevanın təşəbbüsü, göstərişi, diqqət və qayğısı ilə respublikanın şəhər, rayon, kənd və qəsəbələrində tikilmiş, abadlaşdırılmış yüzlərlə məktəb, uşaq bağçaları, uşaq evləri xalqın ixtiyarındadır.

Heydər Əliyev Fondu sosial problemlərin həlli ilə yanaşı, təhsilin inkişafına da sanballı töhfələrini verir. Son 7 ildə rayonda Fondun təşkilatçılığı və dəstəyi ilə çox mühüm humanitar tədbirlər keçirilmişdir. Buna misal olaraq Heydər Əliyev Məktəb-Muzeyində "Diabet xəstəlikləri" mövsuzunda həkim terapevtlər üçün treninq kurslarının, şəkərli diabet xəstələri olan uşaqlar üçün seminarların keçirilməsini göstərmək olar.

Heydər Əliyev Fondu Yasamal rayonunda məskunlaşan qaçqın və məcburi köçkün ailələrinə, o cümlədən şəhid ailələrinə daim qayğı göstərir. Bundan başqa, Fond tərəfindən uşaqlar üçün keçirilən "Novruz bayramı", "Yeni il" şənliklərinə Yasamal məktəblilərinin dəvət alması, yeni dərs ilinin əvvəlində birinci siniflərə və xüsusi qayğıya ehtiyacı olan uşaqlara məktəb çantalarının və dərs ləvazimatlarının verilməsi ənənə halını almışdır. Rayon ərazisində Milli Konservatoriyanın tikilməkdə olan inzibati binası da Heydər Əliyev Fondu tərəfindən icra olunur.

Yasamal rayonundakı Ş.Əfəndizadə adına 13 nömrəli tam orta ümumtəhsil məktəbin uzun illər idi ki, təmirə ehtiyacı vardı. Kollektivimiz tezliklə bu təhsil ocağının binasının da təmir olunacağına inanırdı. Bizim arzumuz bu il gerçəkləşdi, məktəb Heydər Əliyev Fondunun təşəbbüsü və dəstəyi ilə kompleks şəklində əsaslı təmir olunaraq şagirdlərin ixtiyarına verildi. İndi burada yaradılan gözəllik, səliqə və sahman hər kəsi sevindirir. Məktəbdə 1200-dən yuxarı şagirdin təlim - tərbiyəsi ilə 130 müəllim məşğul olur. Müəllimlər, valideynlər, ələlxüsus məktəblilər görülən bütün bu işlərə görə Mehriban xanım Əliyevaya olan minnətdarlıqlarını ilk dərs günündə bəyan etdilər.

Bütün bunları nəzərə alaraq əminliklə söyləmək olar ki, Heydər Əliyev Fondunun ən müxtəlif layihələrini birləşdirən bir ortaq xətt var. Bu, millətə layiqli xidmətdir. Bu ali mərama xidmət etmək hər bir addımda Heydər Əliyev Fondu üçün eyni səviyyədə prioritet səciyyə daşıyır. İstər "Yeniləşən Azərbaycana yeni məktəb" layihəsi, istər yeni tikilən və ya bərpa edilən uşaq evləri, orta və internat məktəbləri, istərsə də mədəni irsin təbliği üçün həyata keçirilən irimiqyaslı layihələr məhz bu məqsədə xidmət edir. İnsan amilinin yüksəlişinə hesablanan mühüm layihələr, şübhəsiz, Heydər Əliyev ideyalarına sədaqətin, vətənə, millətə məhəbbətin, Azərbaycan Prezidenti İlham Əliyevin siyasətinə dəstək vermək istəyinin əməli təzahürüdür.

Daha sonra çıxış edən Yeni Azərbaycan Partiyası Yasamal Rayon Təşkilatının sədri Fikrət İsmayılov rayon fəallarının iştirakı ilə müstəqilliyimizin bərpasının 20 illiyinə həsr olunmuş "dəyirmi masa"nın keçirilməsini əlamətdar hadisə kimi dəyərləndirdi:

- Biz Azərbaycan xalqının çox xoşbəxt nəslinin nümayəndələriyik. Çünki biz müstəqil Azərbaycan dövlətinin vətəndaşlarıyıq. Bu müstəqilliyin banisi isə Heydər Əliyevdir. Ulu öndər hələ sovetlər dövründəki fəaliyyəti ilə xalqımızın milli kimliyini, mənəvi dəyərlərini cəsarətlə qoruyur, hətta sovet ideologiyası ilə uzlaşmayan islahatları, tədbirləri həyata keçirirdi. Məhz ulu öndərin təşəbbüsü ilə 1978-ci ildə Azərbaycan dilinin dövlət dili olması barədə Konstitusiyaya maddə əlavə olundu. Bu asan məsələ deyildi. Sovet dövlətinin dünyaya meydan oxuduğu bir dövrdə bu addımı atmaq çox böyük cəsarət tələb edirdi. Heydər Əliyevin sayəsində ölkəmizdə inşa olunan Bakı Dərin Özüllər Zavodu müstəqillik illərində Azərbaycanın neft strategiyasının uğurla həyata keçirilməsində mühüm rol oynadı. C.Naxçıvanski adına hərbi məktəbdə neçə-neçə azərbaycanlı hərbçilər yetişdi. Dərindən düşünəndə bir daha əmin oluruq ki, bütün bunlar cəsarətli və son dərəcə gərəkli addımlar olmaqla yanaşı, həm də məhz müstəqillik dövrünə hesablanmış strateji tədbirlər idi.

Bu gün ölkəmiz geniş miqyasda, hərtərəfli inkişaf edir. Bir neçə il əvvəl Azərbaycanı tərk edənlər geri qayıdanda ölkəmizi tanımırlar. Çünki Azərbaycan artıq tək il, ay ərzində deyil, günbəgün inkişaf edir, abadlaşır, gözəlləşir, insanların rifahı yüksəlir. Bu, Heydər Əliyevin siyasətinin layiqli davamçısı olan Prezident İlham Əliyevin dövlətimizin və xalqımızın xoşbəxtliyi naminə əzmkar fəaliyyətinin nəticəsidir. Biz də müstəqil dövlətimizin inkişafı naminə üzərimizə düşən vəzifələri şərəflə yerinə yetirməliyik. Bu müstəqilliyin qədrini bilməliyik!

Bəxtiyar SADIQOV:

- Hörmətli "dəyirmi masa" iştirakçıları!

"Dəyirmi masa"dakı çıxışlara, səslənən fikirlərə görə hər birinizə təşəkkür edirəm. Burada Yasamal rayonunun timsalında sadalanan bütün uğurlar bizim dövlət müstəqilliyimizin, ölkəmizdə həyata keçirilən düşünülmüş və davamlı kompleks inkişaf strategiyasının bəhrələridir.

Bir məsələni xüsusilə qeyd etmək istəyirəm. Əgər Azərbaycan 20 il öncə dövlət müstəqilliyinə digər sovet respublikaları ilə müqayisədə daha əziyyətlə nail olmuşdusa, müstəqilliyinin 20-ci ildönümünü daha böyük nailiyyətlər və daha xoş əhval-ruhiyyə ilə qarşılayır. Çünki Azərbaycan, sözün əsl mənasında, müstəqil dövlətdir. Heç bir sahə üzrə xarici asılılığı yoxdur. Xalqımız bir sıra keçmiş sovet respublikalarından fərqli olaraq, özünün iqtisadi resurslarının, təbii sərvətlərinin tam sahibidir və bunlardan xalqın rifahı naminə bacarıqla istifadə edib.

Azərbaycan.-2011.-29 sentyabr.-S.4-5.