Birləşmiş Ərəb Əmirliklərində Explorer Publishing & Distribution nəşriyyatında çap edilmiş Azerbaijan-Live Work ExploreBaku Mini Visitors\' Guide bələdçi kitablarının təqdimat mərasimi olmuşdur

 

27 sentyabr - Dünya Turizm Gününə həsr olunmuş tədbirlər çərçivəsində Birləşmiş Ərəb Əmirliklərinin "Explorer Publishing & Distribution" nəşriyyatı tərəfindən çap edilmiş "Azerbaijan-Live Work Explore" və "Baku Mini Visitors' Guide" bələdçi kitablarının təqdimat mərasimi keçirilmişdir.

Mədəniyyət və Turizm Nazirliyinin mətbuat xidmətindən AzərTAc-a bildirmişlər ki, tədbiri nazir Əbülfəs Qarayev açaraq Azərbaycanın zəngin mədəniyyətini, tarixini, adət-ənənələrini və turizm potensialını əks etdirən bu bələdçi kitabların ölkəmizin beynəlxalq aləmdə təbliği üçün faydalı vasitə olacağına əminliyini bildirmişdir. Nazir qeyd etmişdir ki, bu layihənin həyata keçirilməsi üçün dünyanın müxtəlif nəşriyyat evlərinə göndərilən müraciətlərə ilk olaraq müsbət cavab verənlərdən biri məhz "Explorer Publishing & Distribution" nəşriyyatı olmuşdur.

Ə.Qarayev həmçinin bildirmişdir ki, başlanan işin davamı olaraq ərəb dilində "Baku Mini Visitors' Guide" kitabının hazırlanması üçün "Explorer Publishing & Distribution" nəşriyyatı ilə müzakirələr aparılacaqdır.

"Explorer Publishing & Distribution" nəşriyyatının icraçı direktoru Alisteyr Makkenzi bu layihənin həyata keçirilməsi üçün təmsil etdiyi şirkətin seçilməsinə görə Mədəniyyət və Turizm Nazirliyinə dərin təşəkkürünü bildirmişdir. Qonaq müvafiq danışıqlardan sonra bağlanmış müqavilə əsasında iki ilə yaxın müddətdə müxtəlif işlərin görüldüyünü diqqətə çatdırmışdır. Bu müddətdə kitabın müəlliflərinin, fotoqraflarının, xəritəçəkənlərin Azərbaycana səfər etdiklərini və həmin işlərin nəticəsi olan nəfis tərtibatlı bələdçi kitabların nəşr edildiyini vurğulamışdır.

Sonra tədbir iştirakçıları təqdim edilən "Azerbaijan-Live Work Explore" və "Baku Mini Visitors' Guide" bələdçi kitabları ilə yaxından tanış olmuşlar.

Bu iş Mədəniyyət və Turizm Nazirliyinin təşəbbüsü və bir sıra xarici nəşriyyat evlərinin iştirakı ilə "Azərbaycanı kəşf edək" layihəsi çərçivəsində həyata keçirilməkdədir. Layihə çərçivəsində indiyədək Mədəniyyət və Turizm Nazirliyinin dəstəyi ilə Rusiyanın "Vokruq sveta", Fransanın "Mondeos", Birləşmiş Krallığın "Bravo Ltd" və "Filmer Limited" nəşriyyatları tərəfindən Azərbaycanı təbliğ edən bələdçi kitablar hazırlanmış və müxtəlif ölkələrdə satışa çıxarılmışdır.

 

 

Azərbaycan.-2011.-29 sentyabr.-S.6.