«Şeytan işığı»nın zülməti

Azərbaycan ədəbiyyatında bir çox povest və hekayələrin müəllifi kimi imzası qəbul olunan, dünya klassiklərinin ədəbi nümunələrini orijinaldan dilimizə çevirən tərcüməçi və yazıçı Kamran Nəzirlinin "Şeytan işığı" pyesi özünün səhnə ömrünü yaşamağa başlayıb. Lənkəran Dövlət Dram Teatrı yeni mövsümü məhz bu tamaşanın premyerası ilə açıb.

Tamaşanın quruluşçu rejissoru xalq artisti Kamran Quliyev, səhnə tərtibatçısı teatrın rejissoru Adil Zeynalov, quruluşçu rəssam, Naxçıvan Muxtar Respublikanın əməkdar artisti Əbülfəz Axundov, musiqi tərtibatçısı isə əməkdar mədəniyyət işçisi İmamqulu Əhmədovdur.

"Şeytan işığı"nın zülmətində xalq artisti Qabil Quliyev, aktyorlardan Qızılgül Quliyeva, Aynur Əhmədova, Zemfira Nəcəfova, Məqsudə Əliyeva, Sücəddin Mirzəyev, Niftulla Əsgərov və digər səhnə fədailərinin yaratdığı obrazlar parlayır.

Əsərin mövzusu bugünkü həyatımızda baş verən hadisələrdən götürülüb: müqəddəs ailə dəyərlərinin milli-mənəvi, əxlaqi zəmində müdafiəsi və qorunması uğrunda Azərbaycan vətəndaşlarının mübarizəsi dramatik şəkildə ortaya qoyulur. Əsas "qəhrəmanlar" sayılan Con ilə Fira müxtəlif dünyaları təmsil edirlər.

Azərbaycan.-2011.-29 sentyabr.-S.7.