II Bakı Beynəlxalq kitab sərgi-yarmarkası keçirilir

Ötən gün Bakıda Mədəniyyət və Turizm Nazirliyinin təşkilatçılığı ilə Əl Oyunları İdman Sarayında II Bakı Beynəlxalq Kitab Sərgi-Yarmarkası öz işinə başladı. Hər bir millətin azadlıq və müstəqillik uğrunda mübarizəsi o xalqın tarixinin ən parlaq səhifəsini təşkil edir.

Bu səhifələr kitablar vasitəsilə də gələcəyə daşınır. Azərbaycanın dövlət müstəqilliyinin bərpasının iyirminci ildönümünə həsr olunan sərgi-yarmarka da bu məqsədə xidmət edir. Beynəlxalq tədbirdə son üç ildə ölkə nəşriyyatlarında, eləcə də ABŞ, Rusiya, İran, Türkiyə, Portuqaliya, Macarıstan, Makedoniya, Slovakiya, Belarus, Latviya, Moldova, Özbəkistan, Qırğızıstan, Tacikistan və digər xarici ölkələrdə nəşr edilən kitablar və başqa nəşr məhsulları nümayiş olunur.

Sərgi-yarmarka təntənəli mərasimlə açıldı. Baş nazirin müavini, xalq yazıçısı Elçin Əfəndiyev tədbirə gələn yerli və xarici qonaqları salamlayaraq kitab bayramı münasibətilə hamını təbrik etdi. Bildirdi ki, paytaxtımızda kitab sərgi-yarmarkasının keçirilməsi son bir neçə ildə ənənə halını alıb: "Məqsəd kitabı sevmək və yetişən nəsilə sevdirməkdir. Son illər latın qrafikalı nəşrlər hesabına kitabxanaların zənginləşdirilməsi istiqamətində xeyli iş görülüb".

Mədəniyyət və turizm naziri Əbülfəs Qarayev üç gün davam edəcək sərgi-yarmarka çərçivəsində kitab təqdimatları, tanınmış yazarlarla görüşlər, ədəbi-bədii gecələr, simpoziumlar və müzakirələr də keçiriləcəyini bildirdi: "Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsü ilə son illər müxtəlif səpkili kitablar nəşr edilmişdir. Azərbaycan həqiqətlərindən, Qarabağ müharibəsinin əsl mahiyyətindən və onun yaratdığı humanitar fəlakətdən, erməni təcavüzü nəticəsində dağıdılmış tarixi-mədəni abidələrimizdən bəhs edən bu kitablar müxtəlif dillərdə nəşr olunmaqla dünya ictimaiyyətinə obyektiv informasiya çatdırır...".

Sonra sərgi-yarmarkanın açılışı oldu. Azərnəşrdə müasir Azərbaycan dövlətinin banisi Heydər Əliyevin oxuculara təqdim olunan "Müstəqilliyimiz əbədidir" çoxcildliyinin 36-cı cildi yaxın günlərdə nəfis tərtibatda işıq üzü görüb. Bu cildlərdə ulu öndərin gərgin fəaliyyəti, neft müqavilələri, həmçinin Dağlıq Qarabağ münaqişəsinin nizama salınması ilə əlaqədar ölkəmizin prinsipial mövqeyindən bəhs edən materiallar və başqa mühüm sənədlər toplanmışdır. Azərnəşr Prezident İlham Əliyevin "İnkişaf - Məqsədimizdir" çoxcildliyinin də nəşrinə başlayıb. Bu cildlərdə müstəqil Azərbaycan dövlətinin möhkəmləndirilib inkişaf etdirilməsi, respublikamızın sürətli iqtisadi tərəqqisi və yüksəlişi, xalqımızın rifahının yaxşılaşdırılması üçün aparılan islahatlara həsr olunmuş materiallar toplanıb. Sərgilənən maraqlı poliqrafiya məhsullarından biri də Milorad Paviçin "Xəzər lüğəti" kitabıdır. Ölkəmizin Serbiyadakı səfirliyinin təşəbbüsü ilə işıq üzü görən bu kitabı hələ ilk dəfə 1691-ci ildə Daubmanmus yazmış, lakin kitab 1692-ci ildə 1 yaşı tamam olmamış məhv edilmişdir. "Xəzər lüğəti" tarixi məlumatlarla zəngin, sadə və anlaşıqlı dildə yazılmış dəyərli kitabdır. Burada müəllif Xəzər məsələsi haqqında islam mənbələrini "Yaşıl kitab", yəhudi mənbələrini isə "Sarı kitab" adlandırıb.

İştirakçılar son illərdə ölkəmizdə və dünyada nəşr olunmuş kitablara, jurnal və dərsliklərə baxdılar, eyni zamanda, Mədəniyyət və Turizm Nazirliyinin təşəbbüsü ilə çapdan çıxmış nəşrlər, "Azərbaycan dünya çapında", "Yaddan çıxmaz Qarabağ" adlı bölmələrdə yer alan çap məhsulları ilə də tanış oldular. Qondarma erməni soyqırımı iddialarını təkzibedilməz faktlarla ifşa edən unikal sənədlər də sərgi-yarmarkada mühüm yer tuturdu.

Uşaq ədəbiyyatı bölmələrində də maraqlı kitablar sərgiyə çıxarılmışdı. "Altun klassika" seriyasında azərbaycanlı balalar dünyanın məşhur uşaq yazıçılarının əsərləri ilə tanış ola bilərlər.

Rəsmiyyə RZALI

Azərbaycan.-2011.-29 sentyabr.-S.8.