Fatmayı kəndində yeni kitabxana istifadəyə verilib

Abşeron Rayon Mədəniyyət və Turizm Şöbəsinin kitabxana sisteminin 9 nömrəli Fatmayı kənd filialının yeni binasının rəsmi açılışı keçirilib. Mədəniyyət və Turizm Nazirliyinin dəstəyi ilə inşa edilmiş kitabxananın ümumi sahəsi 90 kvadratmetr, kitab fondu isə 10 min nüsxədən artıqdır.

Açılışda çıxış edən Mədəniyyət və Turizm Nazirliyinin aparat rəhbəri Firudin Qurbanov Fatmayı kənd camaatına təhvil verilən yeni mədəniyyət müəssisəsini əlamətdar hadisə kimi qiymətləndirib. Onun sözlərinə görə, 1950-ci ildən fəaliyyət göstərən Fatmayı kənd kitabxanası uzun müddət yararsız vəziyyətdə olub. Mədəniyyət və Turizm Nazirliyinin təşəbbüsü ilə həmin bina sökülərək kəndin başqa yerində yenisi ilə inşa edilib.

Abşeron Rayon İcra Hakimiyyəti başçısının müavini Fatmayı kəndində bir çox tanınmış simaların yetişdiyini və bu kitabxananın da yenilərini yetişdirəcəyinə inandığını, M.F.Axundov adına Milli Kitabxananın direktoru Kərim Tahirov isə filialın kitabxana-informasiya mərkəzinə çevrilməsi yolunda lazımi köməyi əsirgəməyəcəklərini söyləyib.

Azərbaycan.- 2011.- 9 yanvar.- S. 4.