Nazirlər Kabinetində görüş

Yanvarın 12-də Azərbaycanın Baş naziri Artur Rasizadə ölkəmizdə rəsmi səfərdə olan Bosniya və Herseqovinanın xarici işlər naziri Sven Alkalayın başçılıq etdiyi nümayəndə heyəti ilə görüşmüşdür.

Qonaqları səmimiyyətlə salamlayan Baş nazir onların Bakıya ilk səfərinin ikitərəfli münasibətlərin inkişafına təkan verəcəyinə əminliyini söyləmiş, bunun üçün ən əvvəl lazımi hüquqi bazanın yaradılmasının vacibliyini bildirmişdir. Fəaliyyətlərimizin gücləndirilməsi üçün tövsiyələrini dilə gətirmişdir.

A.Rasizadə Ermənistan-Azərbaycan, Dağlıq Qarabağ münaqişəsi barədə də qonaqlara məlumat vermişdir.

Nümayəndə heyətinə göstərilən qonaqpərvərliyə görə minnətdarlıq edən Sven Alkalay demişdir ki, Bakıya səfərinin məqsədi Azərbaycan ilə Bosniya və Herseqovina arasında münasibətlərin inkişaf perspektivlərini müzakirə etmək, gələcək əməkdaşlığın prioritet istiqamətlərini müəyyənləşdirməkdir. Onun ölkəsi belə bir əməkdaşlığın qurulmasında maraqlıdır.

S.Alkalay ölkəsinin Dağlıq Qarabağ münaqişəsində Azərbaycanın mövqeyini birmənalı şəkildə dəstəklədiyini də vurğulamışdır.

Görüşdə qarşılıqlı maraq doğuran digər məsələlər də müzakirə olunmuşdur.

AzərTAc

Azərbaycan.- 2011.- 13 yanvar.- S. 1.