İçərişəhərlə tanışlıq

Azərbaycanda rəsmi səfərdə olan Avropa Komissiyasının sədri Xose Manuel Barrozu yanvarın 14-də paytaxtın görməli yerlərindən olan İçərişəhərlə tanış olmuşdur.

AzərTAc xəbər verir ki, gəzinti zamanı qonağa dünya şəhərsalma sənətinin nadir nümunələrindən biri, YUNESKO-nun "Dünya irsi siyahısı"na daxil edilmiş "İçərişəhər" Dövlət Tarix-Memarlıq Qoruğu haqqında, eləcə də burada aparılmış son təmir və abadlıq işləri barədə ətraflı məlumat verilmişdir.

Avropa Komissiyasının sədri gəzintiyə Qız qalası ilə tanışlıqdan başlamışdır. Bakının rəmzi sayılan Qız qalasının tarixi barədə qonağa məlumat verilmiş, əsrlərin şahidi olan bu qədim abidənin YUNESKO-nun "Dünya irsi siyahısı"na daxil edildiyi bildirilmişdir.

X.M.Barrozu Bazar meydanındakı daş eksponatlarından ibarət ekspozisiya, Buxara karvansarası, qoşa qala qapıları ilə də tanış olmuş, Kiçik Qala küçəsində təzə təndir çörəyinin dadına baxmışdır.

Qonağa XI əsrdə inşa edilmiş Məhəmməd məscidi, burada avstriyalı və almaniyalı mütəxəssislər tərəfindən aparılmış bərpa və konservasiya işləri barədə məlumat verilmişdir.

Gəzintinin sonunda "Kiçik Karvansara" abidəsindəki təsviri və dekorativ-tətbiqi incəsənət mərkəzində - "İncəsənət bağı"nda hörmətli qonağın şərəfinə çay süfrəsi təşkil olunmuşdur. X.M.Barrozu burada taxta üzərindəki oyma işlərinə, xalçalara baxmışdır.

Avropa Komissiyasının sədri İçərişəhərin Fəxri qonaqlar kitabına ürək sözlərini yazmışdır.

Qonağa xatirə hədiyyələri təqdim olunmuşdur.

Azərbaycan.- 2011.- 15 yanvar.- S. 5.