Bir gün əvvəl

Bu fotoşəklə diqqətlə baxın. Bəlkə kimisə tanıdınız, kimisə xatırladınız. Bəlkə elə siz özünüzü onların arasında tapdınız. Fotonun müəllifi Fərman Bağırov onu belə adlandırıb: "Salyan kazarmasının qarşısında". Mənası çox böyükdür. Şəkil də, elə o sözlər də 1990-cı ilin 19 yanvarına aiddir.

Aradan illər ötsə də, o dövrkü ab-hava, qışın soyuğu, insanların əzmi, iradəsi, bir də o gecə olacaq qətliamın nəfəsi bu şəkildən də duyulmaqdadır. Amma nə qışın soyuğu, nə şəhərdə dolaşaraq qan və təhlükədən danışan şayiələr, nə ölümün özü xalqı getdiyi yoldan döndərə bilmədi. O gün xalq bütün gücü-qüvvəsi, iradəsi, yaddaşı, şərəfli keçmişi və tarixi ilə ayaq üstə idi. İnsanlar heç nədən qorxmurdu, çəkinmirdi.

Vaxtilə - 1918-20-ci illərdə bu kazarmada Azərbaycanın istiqlalı üçün canından keçən oğullarımız xidmət keçmişdilər, 20 Yanvardan bir az sonra o məkan yenə azərbaycanlı zabit və əsgərlərin hərbi düşərgəsinə çevriləcək. Amma buna hələ vardı, hələ Salyan kazarması, bir çox hərbçilər və hərbi hissələr kimi, bizim deyildi...

Hələlik xalq əliyalın vəziyyətdə Salyan kazarmasının, eləcə də şəhərə girə biləcək təhlükənin digər yollarını bağlamağa çalışırdı.

Azərbaycan.- 2011.- 20 yanvar.- S. 4.