Müəllifin narahatçılığı başa düşülür

“Azərbaycan”a cavab verirlər

Orta məktəblərdə musiqi dərslərinin tədrisindəki qüsurlarla bağlı "Azərbaycan" qəzetinin 11 dekabr 2010-cu il tarixli nömrəsində dərc edilmiş "Orta məktəblərdə musiqi fənninin tədrisi qaneedici deyil" sərlövhəli yazıya Təhsil Nazirliyindən mütəxəssislərin münasibət bildirmələrini xahiş etmişdik. Məktubumuza diqqətlə yanaşan təhsil naziri Misir Mərdanov özü münasibət bildirmişdir. Məktubda deyilir:

- Bəstəkar Oqtay Rəcəbovun "Azərbaycan" qəzetinin 11 dekabr 2010-cu il tarixli nömrəsində dərc edilmiş "Orta məktəblərdə musiqi fənninin tədrisi qaneedici deyil" sərlövhəli məqalə Təhsil Nazirliyində araşdırılmışdır.

Qeyd edək ki, Oqtay Rəcəbov ümumtəhsil məktəblərində istifadə olunan bütün "Musiqi" dərsliklərinin həmmüəllifidir və bu mənada onun narahatçılığı başadüşüləndir.

Məlumat üçün bildiririk ki, tarixən ümumtəhsil məktəblərinin ibtidai siniflərində musiqi fənnini əsasən ibtidai sinif müəllimləri tədris etmişdir və bu ənənə hələ ki, ixtisaslı musiqi müəllimləri olmayan məktəblərdə davam etdirilir.

Nəzərə almaq lazımdır ki, ibtidai sinif müəllimləri hazırlayan ali və orta ixtisas məktəblərində musiqi fənni digər fənlər kimi tədris olunur və O.Rəcəbovun dediyi kimi, bütün müəllimlər musiqidən xəbərsiz deyillər. Sadəcə, onların çoxunun musiqi ixtisası yoxdur. Ona görə də ibtidai siniflər üçün "Musiqi" dərslikləri hazırlanarkən bu, mütləq nəzərə alınmalıdır.

Təhsil Nazirliyi musiqi fənninin tədrisi ilə bağlı monitorinq keçirmiş və nəticələr təhlil olunmuşdur. Problemlərin həlli istiqamətində tədbirlər görülür.

Misir MƏRDANOV,

təhsil naziri

Azərbaycan.- 2011.-20 yanvar.- S. 8.