Əsir və itkin düşmüş, girov götürülmüş vətəndaşlarla əlaqədar Dövlət Komissiyasının iclası keçirilmişdir

Yanvarın 26-da Əsir və itkin düşmüş, girov götürülmüş vətəndaşlarla əlaqədar Dövlət Komissiyasının ötənilki fəaliyyətinin yekunlarına həsr edilmiş iclası keçirilmişdir.

Tədbiri giriş sözü ilə açan Dövlət Komissiyasının sədri Eldar Mahmudov qeyd etmişdir ki, Ermənistan-Azərbaycan, Dağlıq Qarabağ münaqişəsi hələ də öz həllini tapmamışdır və müharibə vəziyyəti davam edir. Ötən il Ermənistan hərbçilərinin hücumunu dəf edərkən şəhid olmuş hərbçilərimizin meyitlərinin uzun müddət qaytarılmaması ilə bağlı hadisəni xatırladan sədr vurğulamışdır ki, bu, həmin ölkənin beynəlxalq humanitar hüquq normalarına əməl etmədiyini bir daha təsdiqləyir.

Qeyd olunmuşdur ki, Prezident, Ali Baş Komandan İlham Əliyevin ciddi səyləri nəticəsində şəhid hərbçilərimizin meyitləri Ermənistandan alınmışdır. Prezident İlham Əliyevin iştirakı ilə onların xatirəsinə həsr olunmuş vida mərasimi keçirilmişdir.

Sədr iclasın gündəliyinə dair məlumat verdikdən sonra Dövlət Komissiyasının 2010-cu ildəki fəaliyyəti barədə işçi qrupun rəhbəri Firudin Sadıqov hesabat məruzəsi ilə çıxış etmişdir. Bildirilmişdir ki, son iclasdan keçən müddətdə Dövlət Komissiyasının beynəlxalq əlaqələri daha da genişlənmiş, itkin düşmüş şəxslərlə bağlı aparılan axtarış-araşdırma tədbirləri gücləndirilmişdir. 2010-cu il dekabrın 1-nə olan məlumata görə, Dövlət Komissiyasında qeydiyyatdan 4048 nəfər itkin düşmüş, 1399 nəfər əsir və girovluqdan azad olunmuş şəxs kimi keçir.

Komissiyada olan məlumatların dəqiqləşdirilməsi və itkin düşmüş şəxslərin axtarışı ilə əlaqədar müxtəlif dövlət orqanlarına və beynəlxalq təşkilatlara 923 nəfər barədə 1412 sorğu göndərilmişdir. Komissiyada və BQXK-də itkin düşmüş şəxs kimi qeydiyyata alınmış 588 şəxslə bağlı cavablar təhlil edilmiş və sistemləşdirilərək müvafiq bazalara əlavə edilmişdir. Müxtəlif dövlət orqanlarından və beynəlxalq təşkilatlardan daxil olmuş 110 sorğu icra olunmuş, əlaqədar orqanlara cavablar göndərilmişdir.

Azərbaycan Respublikasının Prezidenti İlham Əliyevin Ermənistan-Azərbaycan, Dağlıq Qarabağ münaqişəsi ilə əlaqədar informasiya mübarizəsində hücum taktikasına dair tövsiyələrinə uyğun olaraq, hesabat dövründə müxtəlif beynəlxalq tədbirlərdə - elmi konfrans, seminar və simpoziumlar, habelə komissiya üzvlərinin gördüyü digər işlərdə problemin həlli ilə bağlı aparılmış müzakirələr, qurum tərəfindən hazırlanmış elmi və elektron nəşrlər barədə ətraflı məlumat verilmişdir.

Hesabat məruzəsi ətrafında müzakirələrdə komissiyanın üzvləri Yaqub Mahmudov, Xələf Xələfov, Rəbiyyət Aslanova və başqaları çıxış edərək qurumun fəaliyyətinin qənaətbəxş olduğunu, görülən işlərin mühüm əhəmiyyət kəsb etdiyini, ölkə və beynəlxalq ictimaiyyətdə maraq doğurduğunu bildirmişlər.

Komissiyanın katibi Şahin Sayılov və Azərbaycan Qırmızı Aypara Cəmiyyətinin sədri Novruzəli Aslanov "Ermənistan-Azərbaycan, Dağlıq Qarabağ münaqişəsi ilə bağlı itkin düşmüş şəxslər haqqında Ante Mortem məlumatların toplanması və mərkəzləşdirilmiş şəkildə idarə olunması üzrə çərçivə Sazişi"nin icrası ilə bağlı görülmüş işlər və qarşıda duran vəzifələr barədə məlumat vermiş, müzakirələr aparılmışdır.

Sonra BQXK ilə Dövlət Komissiyası arasında BQXK tərəfindən irəli sürülmüş "Ante Mortem/Post Mortem məlumat bazasının istifadəsi" üzrə proqram təminatı Müqaviləsi imzalanmışdır.

İclasda müzakirə olunan məsələlərlə bağlı müvafiq qərarlar qəbul edilmişdir.

AzərTAc

Azərbaycan.- 2011.- 28 yanvar.- S. 4.