Əmək və Əhalinin Sosial Müdafiəsi Nazirliyinin kollegiya iclası keçirilmişdir

Yanvarın 28-də Əmək və Əhalinin Sosial Müdafiəsi Nazirliyinin (ƏƏSMN) 2010-cu ilin yekunlarına və qarşıda duran vəzifələrə həsr olunmuş kollegiya iclası keçirilmişdir.

Nazir Füzuli Ələkbərov bildirmişdir ki, ƏƏSMN tərəfindən əhalinin sosial müdafiəsinin gücləndirilməsi, aztəminatlı əhali qruplarına dövlət qayğısının layiqli səviyyədə çatdırılması məqsədi ilə həyata keçirilən tədbirlər ölkəmizin davamlı inkişafına uyğun olaraq, 2010-cu ildə də uğurla davam etdirilmişdir.

2011-ci il yanvarın 1-nə olan məlumata əsasən, ölkəmizdə 552 min 514 nəfər ailə üzvünü əhatə edən 122 min 781 aztəminatlı ailə dövlətdən ünvanlı sosial yardım alır. Hər ailəyə ödənilən yardımın orta aylıq məbləği 108,54 manat, bir ailə üzvünə düşən orta aylıq yardımın məbləği isə 24,12 manat təşkil edir. Ünvanlı sosial yardım təyin olunan ailələrdən 48 min 675-i tərkibində 3 və daha çox uşaq olan ailələrdir ki, bu da yardım alanların 39,6 faizini təşkil edir. Ünvanlı sosial yardım təyin olunan ailələrdən 95,8 faizi vəsaiti plastik kart vasitəsilə alır. 2010-cu ildə əvvəlki illə müqayisədə orta hesabla 899 nəfər və ya 0,2 faiz çox vətəndaşa, yəni orta hesabla 397 min 388 nəfərə aylıq və birdəfəlik sosial müavinət təyin olunaraq ödənilmişdir. Ölkəmizdə 340 min 405 nəfərin aylıq və birdəfəlik sosial müavinətlərinin məbləği 2010-cu il sentyabrın

1-dən orta hesabla 12 faiz artırılmışdır. Ümumiyyətlə, görülən tədbirlər nəticəsində sosial müavinətlərin orta aylıq məbləği 2006-cı illə müqayisədə 2,2 dəfə artırılaraq 46,2 manata çatdırılmışdır. Ölkəmizin ərazi bütövlüyü və Konstitusiya quruluşu uğrunda fiziki sağlamlığını itirmiş vətəndaşların və şəhid ailələrinin mənzil-məişət şəraitinin yaxşılaşdırılması məqsədi ilə nazirlik tərəfindən görülən işlər ötən il də uğurla davam etdirilmişdir. Dövlət başçısının tapşırığına uyğun olaraq, 2010-cu ildə mənzil tikintisi yüksək templə davam etdirilmiş və ötən ilin tikinti planı üzrə 715 mənzil inşa edilmişdir. Nəticədə bu vaxtadək dövlət hesabına mənzillə təmin olunmuş əlil və şəhid ailələrinin sayı 3600-ü ötmüşdür. Artıq yeni tikilən binaların hündürmərtəbəli olmasına üstünlük verilir. Belə ki, ötən il paytaxtın Qaradağ, Xəzər, Yasamal və Sabunçu rayonlarında hər biri 9 mərtəbəli 81 mənzilli binalar istifadəyə verilmişdir. Sumqayıt şəhərində əlil və şəhid ailələri üçün ilk dəfə olaraq 12 mərtəbəli binanın inşasına başlanmışdır. Əlillərin minik avtomobilləri ilə təminatı işləri davam etdirilmiş, 1998-ci ildən 2010-cu ilin sonuna kimi ölkəmizə əlillər üçün 2 min 940 ədəd "OKA" və "Slavuta" markalı avtomaşınlar alınıb gətirilmiş, növbədə olan müharibə əlillərinə təqdim olunmuşdur. O cümlədən bu avtomobillərin 352 ədədi ötən il gətirilərək Qarabağ müharibəsi və Böyük Vətən müharibəsi əlillərinə paylanmışdır. Cari ildə də əlillər üçün avtomaşınların gətirilməsi planlaşdırılır. Tibbi-sosial ekspertiza xidmətinə nəzarətin gücləndirilməsi əlillərin reabilitasiya göstəricilərinin yaxşılaşmasına səbəb olmuş, ötən il ərzində əlillərin tam reabilitasiyası 5,7 faizə yüksəlmişdir. Əlillərin problemlərinə kompleks şəkildə yanaşmanı təmin etmək məqsədi ilə respublika üzrə lazımi məlumatları özündə əks etdirən vahid məlumat bazasının yaradılması işləri uğurla davam etdirilir. Bu məqsədlə hazırlanmış sorğu anketi xüsusi proqram təminatı əsasında şəbəkəyə qoşulmuşdur. İndiyədək bazada 101 min nəfərə yaxın əlil haqqında məlumat toplanmışdır. 2010-cu ildə Dövlət Məşğulluq Xidməti orqanları tərəfindən əvvəlki illə müqayisədə 3,6 faiz çox, yəni 29 min 399 nəfər işsiz və işaxtaran vətəndaş münasib işlə təmin olunmuş, 3 min 921 nəfər vətəndaş müasir əmək bazarının tələblərinə uyğun peşələr üzrə hazırlıq kurslarına cəlb edilmişdir. O cümlədən Naxçıvan MR də daxil olmaqla, respublikanın 68 şəhər və rayonunda 58 "Əmək yarmarkaları" keçirilmişdir ki, bu yarmarkalarda 7 min 500 nəfər işsiz vətəndaş münasib işlərlə təmin olunmuşdur. Ötən il Dövlət Əmək Müfəttişliyi tərəfindən iş yerlərində əmək qanunvericiliyinə əməl edilməsinə dövlət nəzarətinin həyata keçirilməsi işləri davam etdirilmiş və mülkiyyət və təşkilati-hüquqi formasından asılı olmayaraq, 3 min 201 müəssisədə həyata keçirilən dövlət nəzarəti nəticəsində 9 min 511 halda əmək qanunvericiliyinin tələblərinin pozulduğu aşkar olunmuşdur. Bu müddətdə işəgötürənlərə yol verdikləri hüquq pozuntularına görə, ümumilikdə 827 min 200 manat məbləğində cərimə tətbiq olunmuşdur.

Əmək və Əhalinin Sosial Müdafiəsi Nazirliyi yanında Miqrasiya İdarəsi tərəfindən verilən fərdi icazə əsasında respublikada 2010-cu ildə 88 ölkənin vətəndaşı əmək fəaliyyəti ilə məşğul olmuşdur. Ötən il 5 min 900 əcnəbiyə fərdi icazə verilmiş və əvvəlki illər ərzində verilmiş 2 min 808 fərdi icazənin müddəti uzadılmışdır. 2010-cu ildə Azərbaycanda fərdi icazə əsasında 1007 müəssisədə 8 min 708 əcnəbi işləmişdir. Bu da 2009-cu ilin müvafiq dövründəkindən (5 min 784) 1,5 dəfə çoxdur.

İclasda keçən ilin yekunları ilə bağlı məruzələr dinlənilmiş, ünvanlı dövlət sosial yardımının təyinatı, qeyri-məşğul vətəndaşların məşğulluğunun təminatı, əlillərin tibbi-sosial reabilitasiyası, iş yerlərində əmək qanunvericiliyinin tətbiqinə dövlət nəzarətinin həyata keçirilməsi və digər sahələrdə görülən işlər, həmçinin qarşıda duran vəzifələr geniş müzakirə olunmuş və struktur rəhbərlərinə müvafiq tapşırıqlar verilmişdir.

AzərTAc

Azərbaycan.- 2011.- 29 yanvar.- S.5.