Hər bir azərbaycanlı gənc çalışır ki, ölkəmiz daha da çiçəklənsin və böyük uğurlar əldə etsin

AzərTAc xəbər verir ki, Gənclər Təşkilatları Milli Şurasına üzv olan təşkilatların nümayəndələri yanvarın 31-də Milli Şuranın yaradılmasının 15 illiyi və 2 fevral - Gənclər Günü ilə əlaqədar Fəxri xiyabanda müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə gül qoymuşlar.

Görkəmli oftalmoloq alim, akademik Zərifə xanım Əliyevanın məzarı üzərinə də tər çiçəklər düzülmüşdür.

Sonra Şəhidlər xiyabanında Azərbaycanın azadlığı və suverenliyi uğrunda şəhid olmuş qəhrəman Vətən övladlarının məzarları üzərinə tər çiçəklər düzülmüş, "Əbədi məşəl" abidəsi ziyarət olunmuşdur.

Milli Şuranın sədri, Milli Məclisin deputatı Fuad Muradov bildirmişdir ki, Azərbaycanda müstəqilliyin bərpa olunmasında gənclərin böyük rolu olmuşdur. Bu gün də hər bir azərbaycanlı gənc çalışır ki, ölkəmiz daha da çiçəklənsin, böyük uğurlar əldə etsin. Gənclərə daim diqqət və qayğı göstərmiş ulu öndər Heydər Əliyev Gənclər Təşkilatları Milli Şurasının yaranmasına və gənclər siyasətində fəal iştirakına böyük önəm vermişdir.

Azərbaycan.- 2011.-1 fevral.- S. 2.